اقيىق اقىنعا ارنالدى

«كەڭ دۇنيە, ءتوسىڭدى اش مەن كەلەمىن» دەپ كۇنى كەشە عانا 80-گە تولعان دارا تالانت مۇقاعالي ماقاتاەۆقا ار­نالعان كەشتەر وتانىمىزدىڭ بارلىق وڭىرلەرىندە ءوتىپ جا­تىر. سونداي ءبىر ءان مەن جىردى اۋەلەتكەن باسقوسۋعا ارقا­ن­ىڭ اجارى سانالاتىن كوكشەتاۋ قالاسىندا كۋا بولدىق. ونىڭ ۇيىتقىسى – ءبىرجان سال اتىنداعى مۋزىكا كوللەدجى دەسەك, اقىننىڭ جىرلارىن وقىپ, سوزىنە جا­زىلعان اندەردى ناقىشىنا كەلتىرە ورىنداعان اتال­مىش ءبىلىم ۇياسىنىڭ ستۋدەنتتەرى مەن دارىندى بالالار مەكتەپ-ينتەرناتىنىڭ وقۋشىلارى ەدى. ءبىر عاجابى, اقىننىڭ شاعىن ولەڭدەرىنەن باستاپ, كولەمدى پوەمالارىنا دەيىن ساحنا تورىندە ساڭ­قىلد­اپ تۇرىپ جاتقا وقىعان جاستاردىڭ جىر جامپوزىنا دەگەن ەرەكشە سۇيىسپەنشىلىگىن اڭعارعان­داي بولاسىڭ. اسىرە­سە, ءبىرىنشى سىنىپ وقۋشىسى ادىلەت قابىكەن مەن ەكىنشى سىنىپ وقۋشىسى ارۋجان قابدوش­تەردىڭ ون شۋ­ماققا دەيىنگى ولەڭدەردى جاڭىلماي جاتقا ايتىپ شىعۋى ءتانتى ەتتى. اراسىندا انگە كەزەك بەرىلىپ, بيمەن اسپەتتەلىپ وتىردى. سۇراپىل سوعىسقا اتتانعان اكە مەن بالانىڭ بەينەسىنەن كورسەتىلگەن كورىنىستەگى جىر جول­دارىنىڭ قيمىل-قارەكەت­پەن ۇشتاسىپ كەلەتىن تۇسى تا­ريحقا اينالعان جىلداردىڭ وشپەس ءىزىن كوز الدىڭا اكەل­گەن­دەي بولدى. بەلگىلى سازگەر بولات ەسمۇحانوۆ اقيىق اقىن­نىڭ سوزىنە جازىلعان «جارى­عىم-اي» اتتى ءانىن ورىندادى. كەشكە استانادان ارنايى بارعان اقىننىڭ ءىزباسار ءىنىسى ەرعوجا تىلەپبەرديەۆ جىردان شاشۋ شاشسا, ا­س­تا­نا­داعى قاليبەك قۋانىشباەۆ اتىنداعى تەاتردىڭ رە­جيس­سەرى قازاقستاننىڭ ەڭبەك سىڭىرگەن قايراتكەرى بولات ۇزاقوۆ ساحنادا العاش رەت اقىن بەينەسىن قالاي سومدا­عانى تۋرالى ويىن ورتاعا سالدى. ودان كەيىن اقمولا وبلىس­تىق مۋزىكالى دراما تەاترىنىڭ ادە­بيەت ءبولىمى­نىڭ مەڭگەرۋشىسى, اقىن ەربولات بايات جىر ءدۇل­دىنىڭ ەكىنشى ولمەس ءومىرى تۋرالى تولعاۋىمەن تانىس­تىردى. ال كوللەدج ديرەكتورى قايىرلى سارسەنباەۆ ءبىرجان سال, اقان سەرى ەلىنىڭ قاشاندا ۇلت رۋحا­نياتىنىڭ ايتۋلى تۇلعا­لارىنىڭ ايتۋلى كۇندەرىنەن قالىس قالماي, ءوز ۇندەرىن قوسىپ وتىراتىنىن, بۇل جاستاردى وتانشىل­دىققا باۋلۋعا, الدىڭعى تولقىندى تانىپ بىلۋگە, تالانتتاردى باعالاپ, قۇرمەت كورسەتۋگە ەرەكشە سەپتىگىن تيگىزەتىنىن اتاپ ءوتىپ, وسىنداي جاقسى ىستەردىڭ باسى قاسىندا جۇرەتىن, مۇقاعاليعا ارنالعان وسى كەشتى وتكەن جىلدان باستاپ قولعا العان, ءبىلىم ورداسى باسشىسىنىڭ ورىنباسارى قۋانىشگۇل ماع­زۇموۆا ەكەندىگىن ايتا كەلىپ, جاستار تاربيەسىمەن اينا­لىسىپ جۇرگەن ءار ازامات وسىنداي يگىلىكتى شارانى ءجۇ­زە­گە اسىرىپ وتىرسا, بۇگىنگى وقۋشى ەرتەڭگى ەلىمىزدىڭ بەلدى ازاماتتارى بولۋعا تالپىنىپ وتىرعان جاستار­دىڭ وي-ساناسى بيىكتەپ, ەلگە دەگەن ءىلتيپاتى مەن سۇيىسپەنشىلىگى ارتا بەرەدى, دەدى. سۇلەيمەن مامەت.