بىرىككەن ۇشاق پەن پويىز

شۆەيتساريانىڭ لوزاننا قالا­سىنداعى فەدەرالدى پوليتەح­نيكالىق مەكتەپتىڭ ءبىر توپ زەرت­تەۋشىلەرى تەمىرجول ۆاگونى مەن ۇشاقتى بىرىكتىرۋ تۋرالى جاڭا جوبانى ۇسىندى. ولار بۇل جوبانى Clip-Air دەپ اتاپ وتىر. ماماندار بۇل ءىس جۇزەگە اسقان جاعدايدا كوپ­تەگەن نارسەنى ءتيىمدى ءارى جىلدام ورىنداۋعا بولاتىنىن ايتادى. ەگەر قاجەتتى قاراجات بولىنسە, جوبا شامامەن 50 جىلدىڭ كولە­مىندە ىسكە اسۋى مۇمكىن. ءبۇ­گىندە جە­رگىلىكتى ماماندار Clip-Air ءبىر­لەستىگىن دايىنداپ قويدى. وسى ارقىلى الداعى 5-10 جىلدا بيزنەس-دجەتكە ساي كولەمدە ۆاگون مەن تاسىمالداۋشى ۇشاقتىڭ ءپروتوتيپىن جاساپ شىعارادى. ۆاگون ءپروتوتيپى 150 جولاۋشىعا دەيىن تاسىمالداي الادى. بولجام بويىنشا, الداعى ۋا­قىتتا ۆاگوندار مەن اۆتوبۋستار ۇشاق كورپۋسى تۇرىندە جاسالۋى مۇمكىن. ارقايسىسى 450 جولاۋشى نەمەسە 30 تونناعا دەيىن جۇك تاسىمالداي الادى. مۇنداي كولىك تۇرلەرىنە ارنايى بەكىتۋ جۇيەسى ورناتىلادى. وسى ارقىلى اەروپورتقا كەلگەننەن كەيىن تاسىمالداۋشى ۇشاققا تىركەلەدى. وتكەن جىلدىڭ قاراشا ايىندا اقش-تىڭ پاتەنت بيۋروسى Airbus اۆياقۇرىلىس كومپانياسىنا اجىرامالى ۇشاققا پاتەنت بەرگەن. بۇرىن-سوڭدى بولماعان جاڭا اپپاراتتا المالى-سالمالى كاپسۋلا, ياعني جولاۋشىلار سالونى مەن جۇك تيەيتىن ورىن قاراستىرىلعان. مالىمەتتەرگە سايكەس, كاپسۋلالار اەروپورت تەرمينالىنىڭ ءبىر بولىگى بولۋى ابدەن مۇمكىن. ۇشاق كەلمەي تۇرىپ, وعان جۇكتەردى تيەيدى, ال جولاۋشىلار وسى ۋاقىت ارالىعىندا ءوز ورىندارىنا وتىرادى. ۇشاق اۋەجايعا كەلگەن بەتتە ارنايى كران جولاۋشى تولى كاپسۋلانى ۇشاقتان الىپ, ورنىنا جاڭا كاپسۋلانى قويادى. وسىدان كەيىن ۇشاق جەرگە قونباستان, قايتا ۇشىپ كەتە الادى. وسى ارقىلى ءبارىن جىلدام جۇزەگە اسىرىپ, ۇشاقتىڭ جەردەگى ۋاقىتىن ايتارلىقتاي قىسقارتۋعا بولادى. شۆەيتساريا عالىمدارى العاش رەت بۇل جوبانى 2011 جىلى ۇسىنعان ەكەن. ايان ءابدۋالي, «ەگەمەن قازاقستان»