فوتوشەبەر فورابوچي

قازاق ءتىلىن ۇيرەنۋ ءۇشىن سوزدىك ساتىپ الدى وسكەمەندە ايگىلى يتاليالىق فوتوشەبەر دجانني ءفورابوچيدىڭ كورمەسى ءوتتى. شىعىس قازاقستان وبلىستىق ساۋلەت-ەتنوگرافيالىق جانە تابيعي-لاندشافتتى مۋزەي-قورىعىندا ۇيىمداستىرىلعان شاراعا مارتەبەلى مەيماننىڭ ءوزى كەلدى. – مەن فوتوونەرگە ىڭكار جانمىن. سۋرەتتى كوشەدە تۇسىرۋدەن باستادىم. الايدا, اپپاراتتىڭ تەتىگىن اۆتومات سياقتى باسا بەرۋدى ەمەس, كومپو­زيتسيالىق كادر جاساۋعا دەن قويدىم. فو­توگرافياعا اۋەستىك مەنى وركەنيەتىمىزدىڭ تەرەڭ قالتارىستارىنداعى مادەنيەتىمىز بەن تاريحىمىزدى تانۋعا جەتەلەدى, – دەدى وسكەمەندىكتەرمەن كەزدەسۋدە دجانني فورابوچي. ول ۆەرنيساجعا كەلۋشىلەر الدىندا فو­توجۇمىستاردىڭ بارلىعى وڭايعا تۇسە بەرمەيتىنىن, كەيبىر اراب ەلدەرىندە تاسپاعا تۇسىرتكىزبەۋ ءۇشىن تاس لاقتىرعان جاعدايلار دا كەزدەسكەنىن ايتتى. سونداي-اق, ۇندىستانداعى بىرقاتار كاستالار مەن تايپالاردىڭ 500, 1000 جىل بۇرىنعىداي ءومىر ءسۇرىپ جاتقانى دا فوتوسۋرەتشى تاسپاسىنان سىرت قالماعان. ياعني, اتالعان فوتوتۋىندىلاردىڭ كەيىپكەرلەرى كونە داۋىرلەرگە ءتان سياقتى. دەگەنمەن, ولار عىلىمي-تەحنيكالىق توڭكەرىستەن الىس قالعان زامانداستارىمىز. ماسەلەن, ۇندىستانداعى ماحا-كۋمبحا-مەلا فەستيۆالىندە تۇسىرىلگەن سۋرەتتەر سەرياسىنداعى جالاڭاش ەركەكتەردى كورىپ تىجىرىنۋىڭىز مۇمكىن. ال ولار بولسا, ساراسۆاتي, دجامنى مەن گانگا اتتى ءۇندىنىڭ ءۇش وزەنى تۇيىسەتىن ۇلى ساعاسىندا سۋعا شومىلىپ, بار كۇنالارىنان تازاراتىن عۇرىپقا دايىندىق ۇستىندە. بۇل 12 جىلدا ءبىر رەت وتەتىن ءدىني ءراسىم ەكەن. ياعني, كادردى قايتالاپ ءتۇسىرۋ ءۇشىن 4 مىڭنان استام كۇن كۇتۋگە تۋرا كەلەدى. يۋري گاگارين عارىشقا ۇشقاندا ورىس ءتىلىن ۇيرەنىپ العان فورابوچي تاعى توعىز تىلدە ەركىن سويلەيدى ەكەن. ەندى قازاق ءتىلىن ۇيرەنۋ ۇستىندە. «راحمەت!» دەپ جىلى جىميعان فوتوسۋرەتشى جۋىردا قازاقشا-ورىسشا سوزدىك ساتىپ الىپتى. وزىنە وسكەمەن شاھارى وتە ۇناعانىن جەتكىزگەن شەتەلدىك مەيمان كەلەسىدە قازاق ءتىلىن مەڭگەرىپ كەلۋگە ۋادە بەرىپ وتىر. ءفورابوچيدىڭ فاميلياسى ەۋروپا مەن اقش-قا كەڭىنەن تانىس. ول ءوزىنىڭ الەمدى كەڭىنەن ارالاعان ساياحاتتارىندا تۇسىرگەن سۋرەتتەرىمەن travel-فوتو جانرىنىڭ مەترى سانالادى. 67 جاستاعى شەبەردىڭ سۋرەتتەرى باتىس ەلدەرىنىڭ كورنەكتى گالەرەيالارىنان ورىن تەپكەن. فوتوگراف «قازاقستان – يتاليالىقتىڭ كوزىمەن» اتتى جاڭا جوبا اياسىندا قازاق ەلىنىڭ تاريحي ءداستۇرى مەن تۇرمىس-سالتىنا دەن قويۋدى جوسپارلاپ وتىر. دۋمان اناش, «ەگەمەن قازاقستان» وسكەمەن