اۋىلداستارىنا ساياحات سىيلادى

ەكى كۇنگە سوزىلعان ەلوردا تويىنان ەن­­تىگىمىزدى ەندى عانا باسقاندايمىز. سان ءتۇرلى سالتاناتتى شارالار, كەرەمەت كەشتەر, كوڭىلدى كونتسەرتتەر, ءبارى-ءبارى وسى تويدىڭ جوعارى دارەجەدە ءوتۋى ءۇشىن جاسالعان جوبالار. ايتۋلى كۇندەر اياقتالعانىمەن, ەس­تە­لىكتەرى ەسكەرتكىش بولىپ سانامىزدا ساپ تۇزەرى ءسوزسىز. بيىلعى استانا كۇنىن اسىعا كۇت­كەندەردىڭ قاتارىنا وقو, ورداباسى اۋدانى, كوكارال اۋىلىنىڭ وقۋشىلارىن قوسۋعا بولادى. وتكەن جىلى اتالعان اۋىلدا رەسپۋب­ليكا­لىق بيۋدجەت ەسەبىنەن سالىنعان 300 ورىندىق مەكتەپ پايدالانۋعا بەرىلگەن-ءدى. جاڭا ءبىلىم ورداسى وقۋعا قاجەتتى قۇ­رال-جابدىقتارمەن قامتاماسىز ەتىلدى. اتاپ ايتساق, كومپيۋتەر كابينەتى مەن ينتەراكتيۆتى تاقتا جانە وقۋشىلاردى ەڭبەككە باۋليتىن ارنايى كابينەتتەر بار. زاماناۋي تالاپتارعا ساي جابدىقتالعان وقۋ وشاعىنىڭ اشىلۋى اۋىل جۇرتىن قۋانتىپ قانا قويماي, سونىمەن قاتار, كەلەلى كەلەشەككە دەگەن سەنىمدەرىن ارتتىرا تۇسكەندەي. اتالمىش مەكتەپتىڭ اشىلۋ سالتاناتىندا شاكىرتتەردىڭ ۇكىلەگەن ۇمىتتەرىن ودان ءارى جىگەرلەندىرۋ ماقساتىندا سول اۋىلدىڭ تۇلەكتەرى اعايىندى مىرزابەك, بابابەك جانە جارقىنبەك كۋجيموۆتار سىيلىق رەتىندە ۇزدىك وقىعان 12 وقۋشى مەن ۇزدىك 3 مۇعالىمدى استانا كۇنى قار­ساڭىندا ەلوردامىزدا تەگىن قوناق قىلۋعا ۋادە بەرگەن بولاتىن. ۋادەنىڭ اتى ۋادە. ورىنداساڭ ساۋاپ. بىراق, شارۋاسىن شارداي دومالاتقان ازاماتتار ءۇشىن ون بەس ادامدى قىدىرتۋ, جاتار ورىنعا جايعاستىرۋ, ارۋ قالانى ارالاتۋ اسا قيىندىق تۋعىزباعان سياقتى. ونىڭ ۇستىنە, ءوز اۋى­لىڭنىڭ تۋمالارى بولسا بولەك اڭگىمە تىپتەن. سونىمەن, جۇردەك پويىزدىڭ جۇگەنىن بوساتىپ, شىرايلى «شىمقالادان», ارايلى استاناعا كورىكتى كوش كەلدى. ەكى كۇنگە جوس­پارلانعان سەرۋەندى سەرگەك, قىزمەتتى قىزىقتى اتقارۋ ءۇشىن ەكى اۆتوبۋس تا دايىن تۇر. جول كورسەتۋشى جاندار دا ءازىر. العاشقى كۇنى «بايتەرەككە» باس سۇعىپ, ۇلتتىق مۋزەيگە ءۇڭىلىپ, «دۋمان» ويىن-ساۋىق ورتالىعىنا جول الىپ, سوڭىندا كەش­كى استانانىڭ كەرەمەتتەرىنە كۋا بولدى. «ەلىمىزدىڭ جۇرەگى, ارمان قالا استانانى كورۋ ءبىز ءۇشىن ارمان بولاتىن. بۇگىن, مىنە, اس­تانانىڭ عاجاپ جەرلەرىن كورىپ كەرەمەت اسەر الدىق. ول ءۇشىن مىرزابەك اعامىزعا ايتار العىسىمىز شەكسىز. وسىنداي يگى شارانى ۇيىمداستىرعان مىرزابەك اعامىزدى ورداباسى اۋدانىنىڭ اكىمى الماسبەك كەڭەسبەك ۇلى جانە ءبىلىم ءبولىمىنىڭ باسشىسى مايحان ىدىرىس ۇلى «العىس حاتپەن» ما­راپاتتادى. بۇل دا ازاماتتىڭ ەڭبەگىن باعالاۋ شىعار. اسەم قالا استانامىز كوركەيە بەرسىن. ەل قامىن ويلايتىن مىرزا­بەكتەي اعالار كوپ بولسىن», – دەدى اتالمىش مەكتەپتىڭ مۇعالىمى بايان ساريەۆا. ۇرپاقتىڭ بولاشاعىنا ۇلتتىڭ ءاربىر ازاماتى جاۋاپتى ەمەس پە. بۇل ورايدا كوكارال اۋىلى ازاماتتارىنىڭ اتقارعان ءىسىن كوزگە ىلمەي كەتۋگە استە بولماس. سەبەبى, قازىر ساداقا بەرمەيتىن ساراڭبايلار كو­بەيگەن زامان بولدى عوي. ال سولارعا ءوز اقشاسىن قيىپ تۇرىپ, اۋىلداستارىن جيىپ تۇرىپ, دۇنيەدەن ازاماتتىقتى بيىك قىلىپ كور­سەتەتىن وسىنداي جىگىتتەر ۇلگى بولۋى كەرەك. «مەن استاناعا كەلگەنىمە قۋانىشتى­مىن. ءبىز العاشقى كۇنى ەسىلگە جول تارت­تىق. ەركە ەسىلدىڭ جاعاسىندا استانا گۇل­دەي قۇلپىرىپ, جايناپ تۇردى. سودان كەيىن بايتەرەككە باردىق, بايتەرەكتە ەلباسىمىزدىڭ قولتاڭباسىنا قولىمدى قويعاندا, بويىمدى ەرەكشە سەزىم بيلەدى. ۇلتتىق مۋزەيگە كىرگەندە بىردەن كوزىمىزگە التىن شارلاردان قۇرالعان قىران جانە كۇن وتتاي باسىلدى. بۇل ءبىزدىڭ ۇلتتىق ءرا­مىزدەرىمىزدى بەينەلەپ تۇردى. سودان سوڭ ءبىز ارنايى شوۋ كورسەتىلىمىنە قاتىستىق. مۋزەيدە قازاق حالقىنىڭ دامۋ كەزەڭدەرىن تۇگەل ارالاپ, ەلىمىزدىڭ تاريحىن كوزبەن كورگەندەي اسەر الدىق. مۋزەيدەن سوڭ «دۋمان» ويىن-ساۋىق كەشەنىنە باردىق. ونداعى ءتۇرلى بالىقتار, دجۋنگلي الەمى قور­قىنىشتى بولعانىمەن ماعان ەرەكشە ۇنادى. استانا تۇندە كۇندىزگىدەن دە جايناي تۇسەدى ەكەن. ءبىز ونى تۇنگى استانادا قىدىرعان ساتتە سەزىندىك. استانا – ارمان­دار ورىندالاتىن قالا. مەن استاناعا كەلەسى جىلى قايتا كەلۋگە ءۇمىتتىمىن», – دەيدى م.جۇماباەۆ اتىنداعى جالپى ورتا مەكتەپتىڭ 11-سىنىپ وقۋشىسى قۇندىزاي قۇدايبەرگەن. راۋان قايدار, «ەگەمەن قازاقستان» استانا