الماتىدا جاڭا باعىتتاعى جولدار اشىلدى

الماتىنىڭ بۇگىنگى ءنومىرى ءبىرىنشى, ەڭ كوكەيتەستى ماسەلەسى – كولىك كەپتەلىسى. قۇرىلىسى 2011 جىلى باستالىپ قازىر پايدالانۋ ۇستىندەگى الماتىنىڭ كۇنشىعىس اينالما جولىنىڭ (7,8 شاقىرىم) ءبىر تارماعى حالىقارالىق اۋەجايعا بارىپ تىرەلەدى. قالا ىشىندەگى كۇرە جولدىڭ ءبىرى – تولە ءبيدىڭ سول اينالما جولعا ء(ال-فارابي داڭعىلىنا) قوسىلۋىنا 110-اق مەتر جەر قالعان. قالا حالقى كوپتەن كۇتكەن ەكى كوشە قوسىلىپ, جاڭا باعىتتاعى كولىكتىك جول ايرىعى اشىلدى. قالا تۇرعىندارى شىن قۋانىشىن جاسىرا المادى. ساراپشىلاردىڭ ايتۋىنشا, وسى جول قيىلىسى ارقىلى ءبىر تاۋلىكتە 60 مىڭ اۆتوكولىك ءجۇرىپ وتەدى ءارى اۋماقتاعى جول كەپتەلىسى بەلگىلى ءبىر مولشەردە ازايادى. «ەلباسىنىڭ سارابدال ساياساتىنىڭ ارقاسىندا ەلىمىزدىڭ بولاشاعى ءۇشىن قانشاما ينفروقۇرىلىمدىق جوبالار جۇزەگە اسىپ, جولدار سالىنىپ, جاڭادان جۇمىس ورىندارى اشىلىپ كەلەدى. الماتىنىڭ كولىكتىك-لوگيستيكالىق مۇمكىندىگىن كەڭەيتۋ ماقساتىنداعى بۇگىنگى شارا سونداي ۇلكەن ءىستىڭ ءبىر عانا كىشكەنتاي كورىنىسى», – دەدى قالا اكىمى باۋىرجان بايبەك. اتالعان جول ايرىعى راسىندا دا قالانىڭ بۇرىنعى «ساياحات» اۆتوبەكەتى اۋماعىنان باستالاتىن – رايىمبەك, ءسۇيىنباي, فۋرمانوۆ, پۋشكين, جانگەلدين كوشەلەرىندەگى كەپتەلىستى تورتتەن ءبىر ەسەگە ازايتادى ەكەن. قالانىڭ سولتۇستىك باعىتتاعى كولىك لەگىنىڭ كەپتەلىسسىز ءجۇرۋىن قامتاماسىز ەتەتىن رىسقۇلوۆ پەن سايىن كوشەلەرىندەگى جول ايرىعى تاياۋ ارادا بىتۋگە ءازىر. بوكەيحانوۆ كوشەسىندەگى شەڭبەرلى كوپىر الداعى 2017 جىلى پايدالانۋعا بەرىلەدى. تالعات ءسۇيىنباي