CASIE-2016 سيمپوزيۋمى

استانادا ورتالىق ازيانىڭ ءبىلىم بەرۋدەگى اقپاراتتىق-كوممۋنيكاتسيالىق تەحنولوگيالار جونىندەگى سيمپوزيۋمى (CASIE-2016) ءوتتى. ورتالىق ازيا مەملەكەت­تەرىنىڭ ءبىلىم بەرۋ جۇيەسى ايماق­تاردىڭ جىلدام دامىپ وتىرعان ەكونوميكالارىنىڭ سۇرانىستارىنا ساي ءىس-ارەكەتتەر جاساپ وتىر. بۇل وقۋشىلاردىڭ ءححى عاسىردا قاجەت بولىپ وتىرعان داعدىلاردى يگەرۋىن جانە ورتالىق ازيا ەلدەرىندە كوپتەگەن مۇمكىندىكتەردى ىسكە اسىرۋ ماقساتىندا مەكتەپ تۇلەكتەرىنە جاعداي جاساۋ قاجەتتىگىن تۋعىزۋدا. اقپاراتتىق-كوممۋنيكا­تسيا­لىق تەحنولوگيالار (اكت) حا­لىق­تىڭ جۇمىسپەن قامتىلۋىن ارتتىرۋ, ءبىلىم بەرۋ مەن كاسىپتىك دايارلاۋ ساپاسىن ءوسىرۋ, سونداي-اق, جىلدام يكەم­دەلەتىن ەڭبەك نارىعى مەن ءتيىستى ءبىلىم بەرۋ جانە كادرلار دايارلاۋ سەكتورىن قۇرۋ سياقتى وزەكتى ماسەلەلەردى شەشۋگە, سونداي-اق, ءبىلىم بەرۋ جۇيەلەرىن جەتىلدىرۋگە ايتارلىقتاي سەپتىگىن تيگىزىپ وتىر. اتالعان سيمپوزيۋمنىڭ كۇن ءتار­تىبىندەگى نەگىزگى ماسەلە وسى الەۋەت­تى اشۋ جولدارىن ايقىنداۋ بولماق. ورتالىق ازيانىڭ كوپتەگەن ەلدەرىندە حالىقتىڭ ساۋاتتىلىق دەڭگەيى ايتارلىقتاي جوعارى, باستاۋىش جانە ورتا ءبىلىم بەرۋ دەڭگەيى دە جوعارى, سونداي-اق, گەندەرلىك تەڭدىك قامتاماسىز ەتىلگەن. اي­ماقتا ترانسفورماتسيالىق ۇدە­رىستەر مەن ەكونوميكانى ءارتا­راپتاندىرۋ ورىن الۋدا. ورتالىق ازيا حالقىنىڭ باسىم كوپشىلىگى اۋىل تۇرعىندارى, ولار جۇمىس الەمىنە ءتيىستى دايارلىق جاساۋ ءمۇم­كىندىگىن يەلەنە بەرمەيدى, بۇل ەلدەردەگى جاستاردىڭ اراسىن­دا جۇمىسسىزدىقتىڭ جوعارى دەڭگەيدە بولىپ وتىرعانىنىڭ بىردەن-ءبىر سەبەبى وسى. CASIE ماقساتى – وسى ارتتا قالۋشىلىقتى قىسقارتىپ, ەڭبەك نارىعىنىڭ مۇقتاجدىقتارىنا قاراي ءبىلىمدى بارىنشا قولجەتىمدى ەتىپ, كاسىپتىك داعدىلاردى دامىتۋمەن نەعۇرلىم تىعىز بايلا­نىستىرۋعا اكت قالاي جاردەم بەرە الاتىنىن زەرتتەۋ. سيمپوزيۋم جاستاردىڭ كاسىپتىك ءبىلىمىن قول­داۋ ماقساتىندا اقپاراتتىق-كوممۋنيكاتسيالىق تەحنولوگيالار دامۋىنىڭ بىرقاتار ماڭىزدى اسپەكتىلەرىن قاراستىرۋعا باعىت­تالعان. سونىڭ ىشىندە: بارشاعا اشىق, يكەمدى جانە الۋان ءتۇرلى وقۋ مۇمكىندىكتەرىن جاساۋ, وقى­تۋدىڭ ءىس جۇزىندەگى ءتاجىري­بەسىنە قولداۋ كورسەتۋ, اقپاراتتىق ءبىلىمدى نى­عايتۋ جانە وقۋدى ەڭبەك نا­رىعىنداعى وزگەرىستەرگە بەيىمدەۋ ساياساتىن دامىتۋ, اكت-دى ءبىلىم بەرۋ جانە وقۋ سالاسىنا بارىنشا تەرەڭ كىرىكتىرۋ باعىتىنداعى ىنتىماقتاستىق ماسە­لەلەرى قاراس­تىرىلدى. اكت-دى تابىستى تۇردە ەندىرىپ, قولدانۋ ءۇشىن ۇكىمەتتەردىڭ, ءبىلىم بەرۋ سالاسىنداعى ارىپتەستەر مەن وسى سالاداعى بارلىق مۇددەلى تاراپتاردىڭ اراسىندا بەرىك ارىپتەستىك قاتىناستار ورناتۋ قاجەت. سونداي-اق, حالىقارالىق كۇن تارتىبىنە ساي اكت الەۋەتىن تولىق اشۋ ءۇشىن قاجەتتى ماتە­ريالدىق قوردى قامتاماسىز ەتۋ ءۇشىن يننوۆاتسيالىق تەتىكتەردى پايدالانۋ كەرەك. وسىعان بايلانىستى CASIE-2016 سيمپوزيۋمىندا جەرگىلىكتى جانە حالىقارالىق ۇيىمدار وسى ايماقتا جانە ودان تىسقارى جەرلەردە كاسىپتىك-تەح­نيكالىق ءبىلىم بەرۋ سالاسىندا اق­پارات تاراتۋ, ىنتىماقتاستىقتى دامىتۋ جانە تاجىريبە الماسۋ ءۇشىن ءوز جوبالارى مەن رەسۋرستارىن كورسەتەتىن كورمە ۇيىمداستىردى. سيمپوزيۋم شەڭبەرىندە 6 ەلدەن (قازاقستان, قىرعىزستان, موڭعوليا, تاجىكستان جانە ءوز­بەكستاننان) كەلگەن 60-تان اسا مامان بىرلەسكەن تالقىلاۋ جا­ساۋعا شاقىرىلدى. CASIE-2016 قاتىسۋشىلارى ورتالىق ازيا ەلدەرىنىڭ كاسىپتىك-تەحنيكالىق ءبىلىم بەرۋ سالاسىندا اكت-دى پايدالانۋ داعدىلارىن دامىتۋداعى پروبلەمالار مەن ۇردىستەردىڭ احۋالى تۋرالى شولۋ دايىنداپ, ايماقتا جانە ودان تىسقارى جەرلەردە ونى قولدانۋ تاجىريبەسىن جيناقتاپ, بۇدان كەيىنگى جۇمىستى جۇرگىزۋ ءۇشىن ۇسىنىس-كەڭەستەر ازىرلەۋى جانە جاڭا ىنتىماقتاستىق جوسپارلارىن قۇرۋى ءتيىس. راۋشان تاۋىرحانقىزى, جۋرناليست