يننوۆاتسيا ينۆەستيتسيامەن يگەرىلمەك

كەشە پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن كەزەكتى ءباسپاسوز ءماسليحاتىندا قازاقستان ەكونوميكاسىنىڭ جاڭا سالالارىن قالىپتاستىرۋدا «يننوۆاتسيالىق تەحنولوگيالار پاركى» دەربەس كلاستەرلىك قورى قىزمەتىنىڭ ۇلەسى جايىندا اڭگىمە قوزعالدى. ءباسپاسوز ءماسليحاتىنا «يننوۆاتسيالىق تەحنولوگيالار پاركى» دەربەس كلاستەرلىك قورىنىڭ باس ديرەكتورى سانجار كەتتەبەكوۆ, قۇقىقتىق ماسەلەلەر جونىندەگى باسقارۋشى ديرەكتورى ايگەرىم كايۋپوۆا جانە «McKinsey&Company, Inc. Kazakhstan» فيليالىنىڭ باسشىسى يۋككا ماكسيماينەن قاتىستى. «يننوۆاتسيالىق تەحنولوگيالار پاركى» دەربەس كلاستەرلىك قورى وتكەن جىلدىڭ ءساۋىر ايىندا قۇرىلعان بولاتىن. بۇل «100 ناقتى قادام» ۇلت جوسپارىنىڭ 63-قادامى اياسىندا ىسكە اسىرىلۋدا. قازىرگى تاڭدا «يننوۆاتسيالىق تەحنولوگيالار پاركى» دەربەس كلاستەرلىك قورى ەكى ءىرى جوبانى قولعا الىپ وتىر. اتاپ ايتقاندا, ءبىرىنشىسى – شەتەلدىك ۇزدىك بيزنەس-كومپانيالارمەن بىرلەسىپ تەحنولوگيالىق دامۋ ورتالىقتارىن ىسكە قوسۋ. ەكىنشىسى – جوعارى تەحنولوگيالىق ەۋرازيالىق ستارتاپ-حاب قۇرۋدى ماقسات ەتكەن «ستارتاپ قازاقستان» باعدارلاماسىن ىسكە اسىرۋ. «يننوۆاتسيالىق تەحنولوگيالار پاركى» ەل ءوندىرىسىنىڭ باسىم سالالارىندا جوعارى تەح­نولوگيالىق ءوندىرىستى دامىتۋ جانە الەمدىك تەح­­نولوگيالىق ترەندتەرگە سايكەس ۇلتتىق ەكونو­ميكانى ءارتاراپتاندىرۋ ءۇشىن جاڭا باعىت­تاردى قالىپتاستىرادى. سوعان وراي ەلدە اشىق عىلىمي-تەحنولوگيالىق پلاتفورما قۇرادى. «يتپ» دكق كوممەرتسيالىق ەمەس, دەربەس ۇيىم مارتەبەسىنە يە جانە «يننوۆاتسيالىق تەحنولوگيالار پاركى» ارنايى ەكونوميكالىق ايماعىنىڭ باسقارۋ ورگانى بولىپ تابىلادى. بۇل, سونداي-اق, Almاty Tech Garden برەندى اياسىندا جەتەكشى جوعارى وقۋ ورىندارى مەن عىلىمي-زەرتتەۋ ينستيتۋتتارىنىڭ جانە «يتپ» ارنايى ەكونوميكالىق ايماعىنا كىر­ە­تىن كومپانيالاردىڭ عىلىمي-تەحنيكالىق بازاسىن شوعىرلاندىرادى. قازىرگى ۋاقىتتا, «يتپ» ارنايى ەكونوميكالىق ايماعىندا 150-گە جۋىق كومپانيا تىركەلگەن, ونىڭ ىشىندە شەتەلمەن سەرىكتەس كومپانيالار دا بار. «يننوۆاتسيالىق تەحنولوگيالار پاركى» نەگىزىنەن ەلگە ينۆەستيتسيا تارتۋ ارقىلى يننوۆاتسيانى يگەرۋگە ۇلەس قوسادى. ماسەلەن, بۇگىندە وندا ترانسۇلتتىق كومپانيالارمەن بىرلەسە كەمىندە 50 پايىزدىق ينۆەستيتسيامەن 5 تەحنولوگيا ورتالىعىن قۇرۋ قولعا الىنعان. ترانسۇلتتىق كومپانيالار ءۇشىن بۇل ءبىرىنشى كەزەكتە ءداستۇرلى جانە جاڭا باعىتتاردىڭ نەگىزىندە وزىق تەحنولوگيالاردى تارتۋ ءۇشىن سىناق الاڭى بولىپ تابىلادى» دەدى قوردىڭ باس ديرەكتورى س.كەتتەبەكوۆ. بريفينگ بارىسىندا, سونىمەن قاتار, «يتپ» دكق جانە «McKinsey & Co» كومپانيا­سى اراسىنداعى ىنتىماقتاستىق اياسىندا تاۋ-كەن مەتاللۋرگيالىق كەشەنى بويىنشا قۇ­زىرەت ورتالىعى قۇرىلاتىنى ايتىلدى. ول وسى جىلدىڭ ەكىنشى جارتىسىندا الماتى قالاسىندا اشىلادى دەپ جوسپارلانعان. ورتالىق جاڭا تەحنولوگيالار بويىنشا جىلىنا 1200-گە دەيىن مامانداردى وقىتادى, سونىمەن قاتار, باسقا دا تەحنولوگيالىق مۇمكىندىكتەرگە ارنالعان الاڭ بولماق. سونداي-اق, بيىل «Google» كومپانياسىن تارتا وتىرىپ, اۆتوماتتاندىرۋ بويىنشا 4 ءمودۋلدىڭ ءبىرىن ىسكە قوسۋ جوسپارلانىپ وتىر. «يننوۆاتسيالىق تەحنولوگيالار پاركى» دەربەس كلاستەرلىك قورى قىزمەتىنىڭ ەكىنشى باعىتى – «Startup Kazakhstan» باعدارلاماسى قازاقستان رەسپۋبليكاسىنىڭ ينۆەستيتسيالار جانە دامۋ مينيسترلىگىنىڭ يننوۆاتسيالىق ساياساتىنىڭ ءبىر بولىگى بولىپ تابىلادى. سونىمەن قاتار, ول يندۋستريالاندىرۋ باعدارلاماسىنىڭ ەكىنشى بەس جىلدىعى جانە «Digital Kazakhstan» باعدارلاماسىنىڭ اياسىندا جۇزەگە اسىرىلۋدا. باعدارلامانىڭ ماقساتى – «جىبەك جولى» اياسىندا بىرىككەن ەەق, كاسپي باسسەينى مەن ازيا ەلدەرىنىڭ پەرسپەكتيۆتى نارىقتارىندا جۇمىس ىستەي الاتىن جوعارى ەكسپورتتىق الەۋەتى بار جوعارى تەحنولوگيالىق كومپانيالاردى قالىپتاستىرۋ, سونداي-اق, ۇزدىك يننوۆاتسيالىق جوبالاردى شوعىرلاندىرۋ. دينارا بىتىكوۆا, «ەگەمەن قازاقستان»