كەلەسى كەزەڭ كەرۋەنىنىڭ كوشى

فۋتبولدان فرانتسيادا ءوتىپ جاتقان ەۋروپا چەمپيوناتىندا كەشە تۇندە توپتىق كەزەڭ ويىندارى تولىق اياقتالىپ, كەلەسى كەزەڭگە جولداما العان كوماندالار تولىق بەلگىلى بولدى. سول ۋاقىتقا دەيىن وسى كەرۋەن كوشىنە ىلەسكەن قۇرامالاردىڭ نەگىزگى سۇلباسى ايقىندالىپ قويدى. بىراق بۇرناعى كۇنى وينالعان ماتچتار بىرقاتار كۇتپەگەن ناتيجەلەر اكەلىپ, دوپ دوداسىنىڭ دۇرمەگىن بۇرىنعىدان بەتەر كوتەرە ءتۇستى. سونىڭ ىشىندە ءبىز حورۆاتتاردىڭ قۇرلىقتىڭ قازىرگى چەمپيونى – يسپانداردى ۇتۋلارىن, ال تۇرىكتەردىڭ ماديارلاردى تىزە بۇكتىرۋلەرىن وسى قاتارعا قوسار ەدىك. سول كۇنگى سايىستار شىمىل­دىعىن س توبىنداعى سولتۇستىك يرلانديا – گەرمانيا, ۋكراينا – پولشا ارالارىنداعى كەزدەسۋلەر اشتى. بۇل ەكى ويىن 1:0 دەگەن ەسەپپەن اياقتالىپ, نەمىستەر مەن پولياكتاردىڭ جەڭىستەرىن جاريا ەتتى. پاريجدە ويناعان الەم چەمپيوندارى ماريو گومەستىڭ گولى ارقىلى بريتانيالىق يرلاندتاردان باسىم ءتۇستى. بۇل ويىنعا گەرمانيا قۇراماسى سونىڭ ال­دىنداعى پولياكتارمەن كەزدەسۋگە قاراعاندا, ازداعان وزگەرتۋلەرمەن كەلدى. وسىلايشا ستارتتىق قۇ­رامنان تابىلعان گومەس ءوزىنىڭ گولىن 30-مينۋتتا توماس ميۋللەردىڭ پاسىنان كەيىن سالدى. بىراق وندا سوعان دەيىن دە ەسەپ اشۋدىڭ جاقسى مۇمكىندىگى بولعان. جالپى, نەمىستەر ءبىرىنشى تايمنىڭ وزىندە قولايلى مۇمكىندىكتەرىنىڭ ءبارىن ءتيىمدى پايدالانا بىلگەندە, ەسەپ كەمىندە 5:0-گە جەتەر ەدى. ولاردىڭ شابۋىلشىلارىنا ءبىر مەزەت­تەرى ساتتىلىك جەتىسپەي جاتسا, تاعى ءبىر­دە قاقپاشى مايكل ماكگوۆەرن قاۋىپتىڭ بۇلتىن تەز سەرپىپ تاس­تاپ تۇردى. گەرمانيا قۇراماسى ۇزىلىستەن كەيىن دە وسى ويىنىنان جاڭىلعان جوق. وتە جوعارى تارتىپكە قۇرىلعان سىزبا وقتىن-وقتىن ونىڭ ويىنشىلارىن قار­سى قاقپا الدىنان شىعارۋمەن بول­دى. الايدا, الدىڭعى كەز­دەگىدەي سولتۇستىك يرلانديا جا­ماعاتىنىڭ قاقپاسى قۇددى ءبىر سيقىرلانىپ قويىلعانداي الىنبادى. سوندىقتان نەمىستەردىڭ قارقىنى بىرتىندەپ باسىلا بەردى. سوعان قاراماستان, ماكگوۆەرن داربازاسىنا قاۋىپ ءتوندىرىلۋى توقتاتىلمادى. تەك گومەستىڭ ءوزى وسى كەزدەرى ەكى رەت گول سوعاتىن تۇستى ءمۇلت جىبەردى. تۇتاس العاندا, يواحيم ءليوۆتىڭ شاكىرتتەرى قاقپاعا تۋرالاپ 13 سوققى جاساي الدى. سونىڭ بىرەۋى عانا قاقپاعا دارىدى. دەگەنمەن, جەڭىسكە جەتۋ ءۇشىن وسىنىڭ ءوزى جەتىپ جاتتى. سوڭعى تۋردان كەيىن 7 ۇپاي جيناعان نەمىستەر تۋرنير كەس­تەسىندە ءبىرىنشى ورىن الدى. وسىن­شاما ۇپايى بار پولشا ءبىر دوپتى كەم سوعۋى سالدارىنان ەكىن­شى ورىنعا جايعاستى. ءسوي­تىپ, ەكى قۇراما دا 1/8 فينالعا شىقتى. ال 3 ۇپايى بار سولتۇستىك يرلانديا سوڭعى ەكى توپتاعى ويىندار قو­رىتىندىسىن كۇتەدى. مارسەلدە كەزدەسكەن ۋك­راينا جانە پولشا كوماندالارى كەز­دەسۋى تاعدىرىن كۋبا بلاششيكوۆسكي 54-مينۋتتا سوققان جالعىز گول شەشىپ كەتتى. شىنتۋايتىندا, بۇل ماتچتىڭ تۋرنيردەگى احۋال تۇر­عىسىندا پالەندەي ءمانى بولعان جوق. قانداي ەسەپپەن جەڭسە دە, ءۇشىنشى ورىن الا المايتىنى ايداي انىق بولىپ قويعان ۋكرايندارعا سوندىقتان تاس-تال­قان بولىپ جەڭىلىپ, بار ابىرويدان ايىرىلماسا جەتىپ جاتتى. ال پولياكتار توپ باسىنا تالاساتىن باستى باسەكەلەسى – گەرمانيا­نىڭ سولتۇستىك يرلانديادان جە­ڭى­لە قويا­­تىنىنا سەنىمدى ەمەس ەدى. مىنە, كەزدەسۋ دە سول سەبەپتى ساقتىققا كو­بى­رەك كوڭىل بولگەن قالىپتا ءجۇرىپ جاتتى. پولياكتار ماتچتىڭ باستاپقى بولىگىندە-اق مەرگەندىكتەرىمەن كوزگە تۇسەر كەزدى وڭتايلى پايدالانا المادى. كەرەمەت مەزەتتەردى اركاديۋش ميليك پەن روبەرت لەۆاندوۆسكي بوس كەتىردى. سودان كەيىن تىزگىندى ۋكرايندار قولعا الىپ, لۋكاش فابيانسكي قاقپاسى الدىندا بىرنەشە قاۋىپتى ساتتەردى جاسادى. ەكىنشى تايمنىڭ باسىندا ادام ناۆالكا الاڭعا كوماندا ليدەرلەرىنىڭ ءبىرى – جارتىلاي قورعاۋشى ياكۋب بلاشيكوۆسكيدى شىعاردى. اينالىپ كەلگەندە, كوماندانى جەڭىسكە جەتەلەگەن دە وسى ويىنشى بولىپ شىقتى. بۇدان كەيىن وينالعان ەكى ويىن دا جۇرتتى ەلەڭ ەتكىزگەن ناتيجە الىپ كەلدى. سونىڭ ىشىندە حورۆاتتار قالاي بولعاندا پلەي-وفف ايماعىنا ءتۇسىپ تۇرعاندارىن ماتچ الدىندا-اق بىلگەندەرىنە قا­را­ماستان, وزدەرىنىڭ مىڭداعان تىلەۋلەستەرىنىڭ كوڭىلدەرىنەن شىعۋدى كوزدەپ, كەزدەسۋگە بارىن سالا كىرىستى. باس جاتتىقتىرۋشى انتە چاچيچ وسىنىڭ الدىندا چەحتارمەن وتكەن ويىنعا قاراعاندا, ستارت­تىق قۇرامعا التى بىردەي جاڭا ويىنشىنى ەنگىزىپ, بۇرىنعى تاكتيكاسى وزگەرەتىنىن بايقاتتى. بۇلاردىڭ بىرقاتارى امال جوق­تىقتان جاسالدى. مىسالى, كوماندا ليدەرلەرى لۋكا مودريچ پەن ماريو ماندجۋكيچ جاراقات الىپ قالۋلارىنا بايلانىستى ءماج­بۇرلىكتەن ويىنعا قوسىلا المادى. ەۋروپانىڭ ءىس باسىنداعى چەمپيونى بولسا, قاتارىنان ءۇشىنشى رەت ءبىر قۇراممەن الاڭعا شىقتى. ول كەزدەسۋدىڭ 7-مينۋتىندا-اق الۆارو موراتونىڭ وڭ قاناتتان تسەسك فابرەگاس جىبەرگەن دوپتى قاقپاعا قاراي بۇرىپ جىبەرۋىمەن ەسەپ اشتى. بىراق وسىدان كەيىن يسپاندار بوساڭسىپ سالا بەردى. سوسىن تىزگىندى قولعا العان حورۆاتتار ولاردى بارىنشا قىسپاققا سالدى. اقىرىندا ۇزىلىسكە دەيىن نيكولا كالينيچتىڭ كۇش سالۋىمەن تارازى باسىن تەڭەستىرىپ تە ۇلگەردى. ولار ەكىنشى تايمدا دا قارقىنىنان تانبادى. ال 72-مينۋتتا سەرحيو راموس ۇرعان پەنالتيدى دانيەل سۋباشيچ قايتارعاننان كەيىن شابۋىلدى ۇدەتتى. سونىڭ ناتيجەسىندە ويىن سوڭىندا يۆان پەريشيچ كومانداسىن العا شىعاردى – 2:1! ال كوپشىلىك ءتۋرنيردىڭ ءساتسىز كوماندالارىنىڭ بىرىنە ساناپ قويعان تۇرىكتەردىڭ چەحتاردى 2:0 ەتىپ ۇتىپ كەتۋى شىن جاڭالىق بولدى. وسى جەڭىستىڭ ارقاسىندا ەكى كوماندا ءبىر-بىرىمەن ورىن الماسىپ, انادولى جىگىتتەرى ءۇشىنشى ورىنعا جىلجىدى. كەشە تۇندە يسلانديا – اۆس­تريا, ۆەنگريا – پورتۋگاليا, شۆە­تسيا – بەلگيا, يتاليا – يرلانديا كەزدەسۋلەرىمەن توپتىق ويىندار تولىق اياقتالدى. سەرىك ءپىرنازار, «ەگەمەن قازاقستان»