باقىت قۇشاعىنداعى بايقاۋ

ەلباسى نۇرسۇلتان نازارباەۆتىڭ 2013 جىلعى شەشى­مىمەن «مەرەيلى وتباسى» جالپىۇلتتىق بايقاۋىنىڭ جاريالانۋى ەلىمىزدەگى ەڭ جارقىن مەرەكەلەردىڭ قاتا­رىندا شاتتىق شاشۋدا. ويتكەنى, «مەرەيلى وتباسى» – ماڭگىلىك ەلدىڭ تىرەگى». سوندىقتان, اقمولا وبلىسىنداعى بايقاۋدىڭ قورىتىندى كەزەڭى وسى ۇرانمەن وتكىزىلۋى 320 ادام قاتىس­قان ءتالىم شارانىڭ سالتاناتىن اشا تۇسكەنى انىق. – مەملەكەت باسشىسى اتاپ وتكەندەي, وتباسى – قازاقستان قوعامىنىڭ تىرەگى, ەل جەتىستىكتەرىنىڭ نەگىزى, – دەدى وبلىس اكىمىنىڭ ورىنباسارى نۇرلان نۇركەنوۆ قۇتتىقتاۋ سوزىندە. – وتباسىلىق قۇندىلىقتاردى, وتباسى مەن نەكە­نى جانە كوپ بالالى بولۋ ونەگەلەرىن كەڭىنەن دارىپتەۋ, حال­قىمىزدىڭ ۇلىق مۇراتتارىنىڭ ءبىرى. مۇنداي ونەگەلى وتباسىلار ءبىزدىڭ وڭىرىمىزدە دە كوپتەپ سانالادى. جىل ساناپ بايقاۋعا قاتىسۋشىلاردىڭ سانى ارتىپ كەلەدى. بۇگىن ءبىز تاڭداۋلىلاردى انىقتاپ, قۋانىشتارىنا ورتاقتاسامىز. وسىناۋ قىمبات ءداستۇرىمىز ءاماندا جالعاسىن تابا بەرسىن. ۇيىمداستىرۋ كوميتەتىنىڭ شەشىمىمەن اگافونوۆ­تاردىڭ ينتەرناتسيونالدىق وتباسى, مۇعالىمدىك ءوتىلى 407 جىلدى قۇرايتىن لوشكوۆتاردىڭ اۋلەتى ارنايى جۇلدەگە يە بولدى. ال ءۇشىنشى ورىندى 11 بالا تاربيەلەپ, شاڭىراق قۇرعاندارىنا 60 جىل تولۋىن تويلاپ وتىرعان ايتقوجيندەر مەن قورعالجىن ەلىنە اتى كەڭىنەن تانىمال سمانوۆتاردىڭ ىنتىماقتى ۇياسى جەڭىپ الدى. جارقايىڭ اۋدانىنان كەلگەن راحيما سۇلتانوۆا اپاعا «دوستىق» مادەنيەت سارايىنا جينالعان قاۋىم تۇرەگەپ تۇرىپ قۇرمەت كورسەتتى. «باتىر انا» 49 جاسىندا جەسىر قالعانىمەن, تىرشىلىك اۋىرتپالىعىنا قايىسپاي, 25 نەمەرە, جەتى شوبەرە ءسۇيىپ وتىر. سونداي-اق, جاستىعىنا قاراماستان, وزدەرىنىڭ ءۇش بالاسى مەن ەكى نەمەرەسىن ءوسىرىپ, بۇعان قوسا, ءۇش بالانى اسىراپ العان زەرەندى اۋدانىنىڭ تۇرعىندارى سايران مەن گۇلنۇر ىبىراەۆتارعا ارنالعان قوشەمەت تە ايرىقشا بولدى. بۇل ەكى وتباسى جۇلدەلى ەكىنشى ورىننان كورىندى. بايقاۋدىڭ باس جۇلدەسى ساندىقتاۋ اۋدانىنىڭ قۇرمەتتى ازاماتى, بەلگىلى كاسىپكەر اتلان دوكاەۆ پەن ماكين قالاسىنىڭ تۇرعىنى, ءى توپتاعى مۇگەدەكتىگىنە قاراماستان 17 بالانى كۇتىمگە العان سەرىك اكىمباەۆتىڭ وتباسىنا بۇيىردى. الداعى قىركۇيەك ايىندا وسى وتباسىلاردىڭ بىرەۋى رەسپۋبليكالىق بايقاۋعا قاتىساتىن بولادى. شارا سوڭىندا ءبۇلدىرشىن داۋلەتحان ءالينۇردىڭ تۇساۋى كەسىلىپ, مەرەكەلىك كونتسەرت قويىلدى. باقبەرگەن امالبەك, «ەگەمەن قازاقستان» اقمولا وبلىسى