نارەستە قۇنى... 5000 دوللار ما؟

اردان بەزگەندەردىڭ الاياق­تىعى گيپپوكرات انتىنا ادالدىق تانىتاتىن اق حالاتتىلار اراسىندا دا كەزدەسەدى دەسەك, سەنەر مە ەدىڭىز؟ سەنۋىڭىزگە تۋرا كەلەدى دەي الامىز. بۇعان بۇل­تارتپايتىن دەرەك رەتىندە, اتىراۋداعى پەرزەنتحانانىڭ ورتا بۋىن قىزمەتكەرى ىڭگالاپ جارىق دۇنيە ەسىگىن اشقان بەيكۇنا نارەستەنى ساۋدالاعانى دالەل بولا الادى. شىر ەتىپ ومىرگە كەلگەن شاقالاق پەن ونىڭ اناسىنىڭ ءومىرىن ساقتاۋعا قول ۇشىن سوزادى دەيتىن اق حالاتتىنىڭ ادامگەرشىلىككە جات ارەكەتى ۇيىم­داسقان قىلمىسقا قارسى كۇرەس باس­قارماسىنىڭ قىزمەتكەرلەرىمەن ءبىراز ۋاقىت باقىلاۋعا الىنىپتى. ويتكەنى, پەرزەنتحانا قىز­مەت­كەرى ساتىلاتىن بالا ءۇشىن الدىن الا كەلىسىلگەن 5 000 اقش دوللارىنىڭ تەڭ جارتىسىن الىپ قويعان. ال 2 500 اقش دوللارىن جاڭا تۋعان ءسابيدى پەرزەنتحانادان شىعاراردا الۋعا كەلىسكەن. سول كەزدە نارەستەگە انىقتاما قوسا بەرۋدى كوزدەپتى. قۋ قۇلقىنىن اقشا تەسكەن مەديتسينا قىزمەتكەرىن پوليتسەيلەر وتكەن جەكسەنبىدە ۇستادى. – كۇدىكتىنىڭ ورتالىق ازيا ەلدە­رىنىڭ بىرىنەن كەلىپ, وسىندا بوسانعان جاس انانى بالاسىنان باس تارتۋعا كوندىرگەنى انىقتالدى. ءسابي ساتۋشى ۋا­قىتشا وقشاۋلاۋ ورنىنا قاماۋعا الىنىپ, قىلمىستىق كودەكستىڭ 135-بابىمەن سوتقا دەيىنگى تەرگەپ-تەكسەرۋ باستالدى, – دەپ حابارلادى وبلىستىق ىشكى ىستەر دەپارتامەنتىنىڭ ءباسپاسوز حاتشىسى گۇلنازيرا مۇحتاروۆا. جولداسبەك شوپەعۇل, «ەگەمەن قازاقستان» اتىراۋ