جايىن ۇستاعان جايىنوۆ

وتكەن جىلى گازەتىمىزدە كازتالوۆ اۋدانىنداعى قايىڭدى اۋىلىنىڭ تۇرعىنى اسىلۇلان جايىنوۆ قاراوزەن ايدىنىنان سالماعى 45 كيلو, ۇزىندىعى 2 مەتر بولاتىن ءنان جايىن ۇستاپ العانى جونىندە كەڭەيتىلگەن اقپارات جاريالاعان بولاتىنبىز. ارينە, ول براكونەر ەمەس. جۇمىستان قولى بوساعان كەزدە اۋىل ىرگەسىندەگى وزەنگە كەلىپ قارماق سالۋ ونىڭ تەك قۇر ەرمەگى عانا. بالىق تۇرلەرىنىڭ اراسىندا ەڭ قوماعايىنىڭ ءبىرى – وسى جايىن دەسە دە بولادى. ماسەلەن قۇستىڭ ىشىندە ۇيرەك اۋزىنا نە تۇسكەنىن تالعاماي جۇتا بەرەتىن بولسا, جايىن دا سولاي وزىنە ىلىنگەن سۋداعى تىرشىلىك ەتەتىن جاندىكتىڭ قاي-قايسىسىن دا تاڭداماستان قىلعىتا بەرەتىنگە ۇقسايدى. بۇل رەتتە اسىلۇلان جايىن ۇستاۋ ءۇشىن قارماعىنا قۇرباقا ءىلۋدى ادەتكە اينالدىرىپتى. وتكەن جىلى ۇستاعان جايىنى سوعان ىلىكسە, بۇل جولى دا ءدال سولاي بولىپتى. ۇلكەن قۇرباقانى قاپقان اڭعال جايىن قارماققا قالاي ىلىنگەنىن اڭعارماي قالىپتى. ايتەۋىر, وسى جولى ا.جايىنوۆ قاسىنداعى سەرىگىمەن ەكەۋلەپ ءجۇرىپ بالىقتىڭ «شوشقاسىن» جاعاعا سۇيرەپ الىپ شىعىپتى. ونىڭ بيىل ۇستاعان سوڭعى جايىنىنىڭ سالماعى 70 كيلو تارتىپتى. ال ۇزىندىعى 2 مەتر, 20 سانتيمەتردەن اسقان ەكەن. بۇل بىلتىرعى ۇستالعان جايىننىڭ سالماعىنان 25 كيلوعا ارتىق, 20 سانتيمەترگە ۇزىن. بۇگىندە جايىنوۆتىڭ جايىن ۇستاۋداعى «ءىس-تاجىريبەسى» قارماق سالعاندى ەرمەك ەتەتىن وڭىردەگى وزگە اۋەسقويلاردىڭ دا نازارىن اۋدارىپ, ولاردىڭ قاتتى قىزىعۋشىلىعىن تۋعىزىپ وتىر. وسى ارادا تاعى ءبىر ايتايىن دەگەنىمىز, قاراوزەن – ايگىلى ەدىل وزەنىنىڭ ءبىر ساعاسى. ول ءوز ارناسىن رەسەي اۋماعىنداعى ەدىلدەن تارتادى. مۇنىڭ ءوزى مۇندا ءىرى بالىقتاردىڭ ءوسىپ-ونۋىنە ىڭعايلى جاعداي جاسالعانىنىڭ ءبىر كورىنىسى دەۋگە بولادى. ءارى وزەن سۋىنىڭ تەرەڭ ەكەندىگىنىڭ ايعاعى. وسى جاعىمدى ءجايت رەسەيلىكتەر ەدىل وزەنىن قورعاۋعا, ونداعى بالىق قورىنىڭ كوبەيۋىنە مەملەكەتتىك دەڭگەيدە كوڭىل ءبولىپ وتىرعانىن تانىتادى. ال ورال ءوڭىرى اۋماعىنداعى جايىق وزەنى مەن شالقار كولىنىڭ دەڭگەيى جىلدان جىلعا تارتىلىپ مۇنداعى بالىق تۇرلەرىنىڭ مۇلدەم ازايىپ جانە ۇساقتالىپ بارا جاتقانى ءبارىمىزدى ويلاندىرۋعا ءتيىستى. تەمىر قۇسايىن, «ەگەمەن قازاقستان» باتىس قازاقستان وبلىسى, كازتالوۆ اۋدانى, قايىڭدى اۋىلى