ەلباسى نۇرسۇلتان نازارباەۆ قازاقستان رەسپۋبليكاسى پارلامەنتى ءماجىلىسىنىڭ «نۇر وتان» پارتياسى فراكتسياسىنىڭ جينالىسىنا قاتىستى, دەپ حابارلادى پرەزيدەنتتىڭ ءباسپاسوز قىزمەتى.
جيىن بارىسىندا مەملەكەت باسشىسى پارلامەنت ءماجىلىسىنىڭ توراعاسى لاۋازىمىنا ن.نىعماتۋليننىڭ كانديداتۋراسىن قاراستىرۋ تۋرالى ۇسىنىس بەردى.
– بارشاڭىز نۇرلان زايروللا ۇلىن جاقسى بىلەسىزدەر. ول قاراعاندى وبلىسىنىڭ اكىمى, «نۇر وتان» پارتياسى توراعاسىنىڭ ءبىرىنشى ورىنباسارى بولىپ جۇمىس ىستەدى. سوڭعى جىلدارى ءماجىلىستىڭ V شاقىرىلىمىن باسقارىپ, كوپشىلىگىڭىزبەن بىرگە ەڭبەك ەتتى. ونىڭ پرەزيدەنت اكىمشىلىگىندەگى ەكى جارىم جىل ىستەگەن قىزمەتى پرەزيدەنتتىك سايلاۋ, ءماجىلىس جانە بارلىق دەڭگەيدەگى ءماسليحاتتار سايلاۋى سياقتى قاۋىرت ساياسي كەزەڭدەرگە سايكەس كەلدى. ەلىمىز ءۇشىن اۋقىمدى ساياسي جۇمىستار ءجۇرگىزىلدى. سايلاۋلار جوعارى دەڭگەيدە ۇيىمداستىرىلىپ, جاقسى باعاعا يە بولدى. حالقىمىز ىنتىماعىن كورسەتىپ, ءبىزدى قولدادى. سوندىقتان جۇمىستى ودان ءارى جالعاستىرۋىمىز قاجەت, – دەدى قازاقستان پرەزيدەنتى.
نۇرسۇلتان نازارباەۆ پارلامەنتتىڭ اتقارۋشى بيلىكپەن اراداعى ءوزارا ءىس-قيمىلدى بەلسەندىرەك جۇرگىزۋى قاجەتتىگىنە نازار اۋداردى.
– ءبىز ۇكىمەتكە جۇمىستى بايىپپەن جۇرگىزۋگە مۇمكىندىك بەردىك, بەلگىلى ءبىر جەتىستىكتەرگە قول جەتكىزىلدى. بىراق بۇل جەتەكشى ساياسي پارتيامىز «نۇر وتان» مەن ونىڭ فراكتسياسى ۇكىمەتتىڭ الدىنا قويىلاتىن مىندەتتەردىڭ ورىندالۋىنا قاتاڭ قاراماۋى ءتيىس دەگەندى ءبىلدىرمەيدى. ورىندالۋى قاجەت ستراتەگيالىق باعدارلامالار بار. ءبىزدىڭ ءوز ەلىمىزدە دە, شەتەلدەردە دە ورىندالۋىن جۇرت باقىلاپ وتىرعان نەگىزگى مىندەتىمىز – بەس ينستيتۋتتىق رەفورمانىڭ ىسكە اسىرىلۋى جونىندەگى «100 ناقتى قادام» ۇلت جوسپارىن جۇزەگە اسىرۋ», – دەدى مەملەكەت باسشىسى.
سونداي-اق, قازاقستان پرەزيدەنتى ءماجىلىس توراعاسى قىزمەتىندە اتقارعان جۇمىسى ءۇشىن ب.ىزمۇحامبەتوۆكە العىس ايتتى.
– بۇگىن «ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسى تورالقاسىنىڭ كەزەكتەن تىس وتىرىسى ءوتىپ, ونىڭ بارىسىندا باقتىقوجا ىزمۇحامبەتوۆ كەڭەس توراعاسى بولىپ سايلاندى. ەلىمىز ءۇشىن بۇل – وتە ماڭىزدى ماسەلە. كوپتەگەن كورنەكتى قايراتكەرلەردىڭ باسىن قوسىپ وتىرعان ۇيىم ارداگەرلەردىڭ ماسەلەسىمەن دە, جاستاردىڭ ادامگەرشىلىك تاربيەسىمەن دە اينالىسادى, – دەدى نۇرسۇلتان نازارباەۆ.
