الماتىدا ايگىلى كوماندانىڭ جاتتىقتىرۋ لاگەرى اشىلادى

[caption id="attachment_47672" align="aligncenter" width="700"] inform.kz[/caption] الماتى قالاسىندا الەمگە ايگىلى يسپانيانىڭ «بارسەلونا» فۋتبول كلۋبىنىڭ وقۋ اكادەمياسى تۇڭعىش رەت جاتتىقتىرۋ لاگەرىنە جاس فۋتبول اۋەسقويلارىن شاقىرادى. لاگەرگە قاتىسۋشىلار ەڭ ۇزدىك بالالار-جاسوسپىرىمدەر اكادەمياسىنىڭ ءادىسى بويىنشا فۋتبولدىڭ قىر-سىرىنا ۇيرەتىلەتىن بولادى, دەپ حابارلايدى inform.kz «بارسەلونانىڭ» وقۋ اكادەمياسى La Masia de Can Planes دەپ اتالادى. كاتالون تىلىنەن اۋدارعاندا «فەرمەر ءۇيى» دەگەن ماعىنا بەرەدى. قازىرگى تاڭدا بۇل الەمدەگى ەڭ ۇزدىك اكادەميالاردىڭ ءبىرى بولىپ ەسەپتەلەدى. كوپشىلىكتىڭ ماقتانىشىنا اينالعان فۋتبولشىلار ءدال وسى جەردەن تۇلەپ ۇشقان. ولاردىڭ قاتارىندا بەس دۇركىن «التىن دوپ» يەگەرى ليونەل مەسسي, 2010 جىلى يسپانيا قۇراما كومانداسىنىڭ ساپىندا الەم چەمپيونى بولعان حاۆي ەرناندەس, كارلەس پۋيول, جەرار پيكە, سەرحيو بۋسكەتس سىندى كوپتەگەن فۋتبولشىلار بار. سونىمەن قاتار, ايگىلى فۋتبولشىلاردىڭ ءبىرى بولعان يوحان كرويفف, حوسەپ گۆارديولا يسپانيالىق كلۋبتىڭ باس جاتتىقتىرۋشىسى قىزمەتىندە بولىپ, كوپتەگەن جەتىستىكتەرگە جەتكەن. مالىمەتتەر بويىنشا, 2002 جىلدان باستاپ ول الەمدەگى ەڭ ۇزدىك اكادەميا بولىپ تانىلعان. لاگەر تامىز ايىنىڭ 15-26 كۇندەرى م.گوركي اتىنداعى ورتالىق مادەنيەت جانە دەمالىس ساياباعىندا, «سپارتاك» ستاديونى بازاسىندا وتەتىن بولادى. ايان ءابدۋالي.