جەگەندەرى جەلكەسىنەن شىقتى

«قازپوشتا» اكتسيونەرلىك قوعامىنىڭ قوستاناي وبلىستىق فيليالى تاران اۋداندىق بولىمشەسىنىڭ ءۇش قىزمەتكەرى زەي­نەت­كەرلەردىڭ زەينەتاقىسى مەن مۇگەدەك­تەردىڭ جاردەماقىسىن مايشەلپەك دەپ ويلاپتى.  وزدەرى جاس تا ەمەس, جەر ورتاسىنا كەلىپ قالعان ايەلدەر قۇنىققاننان ۇيات پەن اردى جيىپ قويسا كەرەك. ايتپەسە, 50 جاستاعى ليۋدميلا رەيمەر, 49 جاستاعى سۆەتلانا ميتاك جانە 62 جاستاعى ورىنتاي قاناپيانوۆا وزدەرىنىڭ قىزمەتىن پايدالانىپ, زەينەتكەرلەردى ايتپاعاندا, عارىپ جاندار مەن جەتىمدەردىڭ جالعىز ناپاقاسىنا اينالعان جاردەماقىسىنا قول سالار ما ەدى؟ وسى ۇشەۋىن اقشا ۇرلاۋدىڭ ۇيىمداسقان توبىن قۇردى دەۋگە سايادى. ولار بۇرىن دا وسىعان ۇقساس قىلىقتارى ءۇشىن  شارتتى تۇردە سوتتالعان بولاتىن. بىراق  وزگەنىڭ اقشاسىن  جىمقىرىپ دانىككەن ايەلدەر ەندى اقشانى ءىرى كولەمدە ۇرلاپ, ودان بەتەر قۇنىعا باستاعاندا قولعا ءتۇستى. «قازپوشتانىڭ» قوستاناي وبلىستىق فيليالىنىڭ تاران اۋدانىنداعى ماي سەلوسىندا ورنالاسقان بولىمشەسىنىڭ باستىعى بولىپ ىستەيتىن ليۋدميلا رەيمەر  ءوزىنىڭ 2-ساناتتى قىزمەتكەرى سۆەتلانا ميتاك جانە وپەراتور ورىنتاي قاناپيانوۆامەن بىرىگىپ, 2012 جىلدىڭ 11 قاڭتارىنان باستاپ 2014 جىلدىڭ 16 ماۋسىمىنا دەيىن پوچتا كليەنتتەرىنىڭ جىلجىمايتىن شوتتارىنان باعدارلامادا شىعىستىق-كاسسالىق وردەر قۇرۋ ارقىلى اقشا سۋىرىپ الىپ وتىرعان. بۇل اقشالار زەينەتكەرلەر مەن مۇگەدەكتەردىڭ, جەتىم بالالاردىڭ شوتىنا سالىپ قويعان  قاراجاتتارى بولاتىن. سارى مايدان قىل سۋىرعانداي, بىلدىرمەي قالتالارىنا  باسىپ وتىرعان 6 ميلليون تەڭگەنى  ءۇش ايەل اكەسى بەرگەندەي شالپۋىتتاپ جۇمساعان. تەگىن كەلگەن پايدانى شەلەكتەپ توككەن ولاردىڭ قىلمىسى اشىلىپ, تەرگەۋ باستالعاندا ايەلدەرگە الگى 6 ميلليون تەڭگەنى ەڭبەكپەن تابۋ قيىن بولدى, ونىڭ 1 ميلليون تەڭگەسىن عانا قايتارا الدى. ءادىل سوت كىناسىن موينىنا قويعان ءۇش ايەلدىڭ دە ەندىگى ورنى توردىڭ ارعى بەتى دەپ تاپتى. ليۋدميلا رەيمەر 5 جىلعا, ورىنتاي قاناپيانوۆا 5 جىل 6 ايعا,  سۆەتلانا ميتاك 5 جىل 6 اي­عا باس بوستاندىعىنان ايىرىلىپ, مۇلكى تاركىلەندى. ولار جازاسىن جالپى رەجىمدەگى كولونيادا وتەيتىن بولادى.  سونىمەن قاتار سوت ءۇش ايەلدەن «قازپوشتا» اكتسيونەرلىك قوعامىنىڭ پايداسىنا 5 ميلليون تەڭگە شىعىن ءوندىردى. بۇل ەڭ ءبىر دۇرىس شەشىم بولدى. ءنازيرا جارىمبەتوۆا, «ەگەمەن قازاقستان» قوستاناي وبلىسى, تاران اۋدانى