رەسەيلىك اسكەري سەرجانتتىڭ ەرلىگى
سيريادا رەسەيدىڭ جاۋلاسۋشى جاقتاردى ءبىتىستىرۋ جونىندەگى ورتالىعىنىڭ اسكەري قىزمەتشىسى قازا تاپتى. مۇنى كەشە وسى ەلدىڭ قورعانىس مينيسترلىگىندەگى دەرەك كوزىنە سىلتەمە جاساي وتىرىپ, «نوۆوستي» اقپارات اگەنتتىگى حابارلادى.
اسكەري ۆەدومستۆودان تۇسكەن اقپاراتقا قاراعاندا, سەرجانت اندرەي تيموشەنكوۆ جارىلعىش قويىلعان ءاۆتوموبيلدىڭ گۋمانيتارلىق كومەك بەرىلىپ جاتقان جەرگە كەلىپ جارىلۋىنىڭ الدىن العان. سەرجانت قولباسشىلىق اتىنان مەملەكەتتىك ناگراداعا ۇسىنىلىپ وتىر. ال وقيعا 15 ماۋسىمدا ورىن السا, دارىگەرلەر اسكەريدىڭ ءومىرى ءۇشىن ءبىر تاۋلىكتەن استام ۋاقىت بويى كۇرەسسە دە ەش ناتيجە شىعارا الماعان.
اۆستريا ديپلوماتياسىنىڭ ۇسىنىسى
اۆستريانىڭ سىرتقى ىستەر ءمينيسترى سەباستيان كۋرتستىڭ پىكىرىنشە, ەۋرووداققا رەسەيمەن بەلگىلى ءبىر مامىلەگە كەلۋدىڭ جولىن ىزدەيتىن ۋاقىت جەتتى. ول ەو-نى رەسەيدەن سانكتسيالاردى كەزەڭ-كەزەڭىمەن الۋ باعىتىندا ءىس-قيمىل تانىتۋعا شاقىردى.
س.كۋرتستىڭ ايتۋىنشا, رەسەيگە قارسى شارالار – بۇرىس جول. بۇل جەردە مينيستر ماسكەۋدىڭ دە, ءوز كەزەگىندە, بريۋسسەلگە قاتىستى وڭ نيەت تانىتۋى ءتيىس ەكەنىن اتاپ كورسەتەدى. ەسكە سالا كەتسەك, ەۋرووداقتىڭ رەسەيگە قارسى ەكونوميكالىق سانكتسياسىنىڭ مەرزىمى وسى جىلدىڭ 31 شىلدەسىندە اياقتالادى. وسىنىڭ الدىندا ەۋروكوميسسيانىڭ توراعاسى جان-كلود يۋنكەر دە رەسەيدىڭ ەو-مەن قارىم-قاتىناسىن قالپىنا كەلتىرۋىنە مۇمكىندىك بار ەكەنىن مالىمدەگەن ەدى.
يران تەراكتىلەردىڭ الدىن الىپتى
يراننىڭ ارنايى قىزمەتتەرى كەڭ اۋقىمدى تەررورلىق ارەكەتتەردىڭ الدىن العانى تۋرالى مالىمدەپ وتىر. بۇل تۋرالى «رەيتەر» اگەنتتىگى حابارلادى. يران قارسى بارلاۋىنىڭ دەرەكتەرىنە سۇيەنسەك, تەررورشىلار ەل استاناسى – تەگەران جانە باسقا دا ءىرى قالالاردا جارىلعىشتار قويۋعا ارەكەت جاساعان.
«يسلاميست-ۆاححابيتتەردىڭ قىلمىستىق پيعىلدارىنا قاراعاندا, جاقىن كۇندەردە ەلدىڭ ءتۇرلى اۋداندارىندا جارىلىستار جاساۋ جوسپارلانىپتى. بۇگىندە لاڭكەستەر قاماۋعا الىندى, ولاردان بومبالار مەن كوپتەگەن جارىلعىش زاتتار تاركىلەندى», دەلىنەدى بارلاۋ ىستەرى جونىندەگى مينيسترلىكتىڭ مالىمدەمەسىندە. جارىلىستار تۋرا رامازان باستالاتىن 5 ماۋسىم مەن 4 شىلدە ارالىعىندا جۇزەگە اسىرىلماق ەكەن.
قىسقا قايىرعاندا:
- «نورماند تورتتىگى» (رەسەي, ۋكراينا, گەرمانيا, فرانتسيا) ەلدەرى باسشىلارىنىڭ جاڭا كەزدەسۋى ۆارشاۆادا وتەتىن ناتو ءسامميتىنىڭ الدىندا, ياعني شىلدە ايىنىڭ باسىندا ۇيىمداستىرىلۋى ىقتيمال. بۇل تۋرالى نەمىس ۇكىمەتىندەگى دەرەك كوزىنە سىلتەمە جاساي وتىرىپ, Stuttgarter Zeitung گازەتى حابارلادى.
- فۋتبولدان ەۋروپا چەمپيوناتىنىڭ كەزەكتى ىرىكتەۋ تۋرىندا يسلانديا مەن ۆەنگريا قۇرامالارى كەزدەسكەن ەدى. ۆەنگريالىق فاناتتار وزدەرىنىڭ فۋتبولشىلارىن ناتسيستىك يشارات ءبىلدىرىپ قارسى الىپتى. ءتىپتى, ويىن الدىندا قارسى جاقتىڭ جانكۇيەرلەرىمەن توبەلەسىپ تە السا كەرەك. ەۋروپا فۋتبول اسسوتسياتسياسىنىڭ وداعى (ۋەفا) ۆەنگرياعا قاتىستى تارتىپتىك ءىس اشتى.
- ومبىدا ەرتىس وزەنىندە بورتىندا 7 ادامى بار «اسسول» ۇلگىسىندەگى ياحتا سۋعا باتىپ كەتتى. جەتەۋدىڭ بەسەۋى وزدەرىنىڭ كۇش-جىگەرىمەن امان-ەسەن جاعاعا جەتسە, ەكى ادام ءىز-ءتۇزسىز جوعالىپ كەتكەن. ياحتا ومبى وبلىستىق جەلكەندى سپورت فەدەراتسياسىنىڭ يەلىگىندە بولعان كورىنەدى.
- بۇكىلرەسەي جەڭىل اتلەتيكا فەدەراتسياسىنىڭ باس حاتشىسى ميحايل بۋتوۆ حالىقارالىق جەڭىل اتلەتيكا اسسوتسياتسياسى كەڭەسىنىڭ قۇرامىنان ۋاقىتشا شىعارىلعان. مۇنىڭ رەسەي جەڭىل اتلەتشىلەرىنىڭ دوپينگ قولدانۋلارىنىڭ سالدارىنان بولىپ وتىرعان جايت ەكەنى انىق. ءسويتىپ, بۇگىندە رەسەيلىك بۇكىل جەڭىل اتلەتتەرگە وليمپياداعا بارماي قالۋ قاۋپى ءتونىپ تۇر.
يتاليا وپپوزيتسياسىنىڭ جەڭىسى
يتاليانىڭ «بەس جۇلدىز» وپپوزيتسيالىق ساياسي قوزعالىسى 20 مۋنيتسيپالدىق قۇرالىمدار سايلاۋىنىڭ 19-ىندا جەڭىسكە جەتتى. ءسويتىپ, اتالعان پارتيادان كانديداتتار ريم مەن تۋرين قالالارىنىڭ جاڭا مەرلەرى اتاندى. مۇنى كەشە ANSA اگەنتتىگى حابارلادى.
قوزعالىستىڭ كوشباسشىسى بەپپە گريللو بۇل جەڭىستى قازىردىڭ وزىندە تاريحي جەڭىس دەپ مالىمدەپ ۇلگەردى. جانە, ونىڭ سوزىنە قاراعاندا, بۇل الداعى ۇلكەن جەڭىستەردىڭ باستاماسى عانا. يتاليانىڭ بيلەۋشى دەموكراتيالىق پارتياسى ءوزىنىڭ جەڭىلىسىن مويىنداعان. يتاليا استاناسى – ريم قالاسىن ۆيردجينيا رادجي ەسىمدى ايەل باسقاراتىن بولدى. تۋريندەگى سايلاۋدا دا ايەل ادام جەڭىسكە جەتتى. ول – كيارا اپپەندينو. بۇل ايەل دە ءتۋريننىڭ مەرى اتاندى.
تاركىلەنگەن گەروين قۇنى – 4 ملن.$
رەسەيدىڭ سۆەردلوۆ وبلىستىق فەدەرالدىق قاۋىپسىزدىك قىزمەتىنىڭ ادامدارى ەسىرتكى تاسىمالداۋشى كۋرەرلەرگە قاتىستى وپەراتسيا بارىسىندا تاجىكستاننان پياز ارتىپ كەلگەن جۇك كولىگىنىڭ ىشىنەن 25 كيلوگرامم گەروين تاپتى.
وپەراتسيا وبلىس ورتالىعى – ەكاتەرينبۋرگ قالاسىنداعى №4 جەمىس-جيدەك بازاسىندا جۇزەگە اسىرىلعان. 20 توننا پياز ارتىلعان فۋرا تۋرا وسى بازاعا كەلىپ تابان تىرەگەن كورىنەدى. ەسىرتكى پيازدىڭ ىشىنە مۇقيات ءارى ۇقىپتى سالىنىپ جاسىرىلعاندىقتان, ونى قولمەن ارشىپ الۋدىڭ ءوزى ۇلكەن كۇش-جىگەردى تالاپ ەتكەن. تاركىلەنگەن گەرويننىڭ جالپى قۇنى – 4 ميلليون دوللار. وپەراتسيا قورىتىندىسىنا سايكەس, رف قك-ءنىڭ ءتيىستى باپتارى بويىنشا قىلمىستىق ىستەر قوزعالىپتى.
جاۋاپسىزدىقتىڭ سالدارى اۋىر
ماسكەۋ بيلىگى كارەليانىڭ سياموزەرو كولىندەگى شتورم سالدارىنان قازا تاپقان ماسكەۋلىك وقۋشىلاردىڭ ءتىزىمىن جاريالادى. 14 ءجاسوسپىرىمنىڭ 3-ەۋى – قىز بالا. 3-ەۋى 13-تە, قالعاندارىنىڭ ءبارى 12 جاستا.
كەشە رەسەي توتەنشە جاعدايلار مينيسترلىگىنىڭ ۇشاعىمەن بالالاردىڭ مايىتتەرى پەتروزاۆودسكىدەن ماسكەۋگە جەتكىزىلدى. ايتا كەتەتىن بولساق, 18 ماۋسىم كۇنى «پارك-وتەل سياموزەرو» ساۋىقتىرۋ لاگەرىندەگى 47 ۇل-قىز 4 پەداگوگتىڭ جول باستاۋىمەن ەكى قايىقپەن سياموزەروعا ءتۇسىپ, شتورمعا تاپ بولعان. كەيىن 13 وقۋشىنىڭ دەنەلەرى تابىلسا, بىرەۋىنىكى ءالى تابىلعان جوق. كارەليا باسشىسى الەكساندر حۋديلاينەن وپات بولعان بالالاردىڭ وتباسىلارىنا وڭىرلىك بيۋدجەت قارجىسىنان 1 ميلليون رۋبلدەن تولەۋگە ۋادە بەردى. اتالعان وقيعا بويىنشا قىلمىستىق ءىس قوزعالدى.
ينتەرنەت ماتەريالدارى نەگىزىندە ازىرلەندى
