قاراعاندىدا دارىندى جاستارعا قۇرمەت كورسەتىلدى
كەنشىلەر استاناسىندا وبلىستاعى دارىندى بالالاردىڭ باسىن قوسقان تۇلەكتەر تويى ءوتتى. «اريستا» مەيرامحاناسىندا ۇيىمداستىرىلعان بۇل سالتاناتقا ەڭ ۇزدىك تۇلەكتەر, جالپى ءبىلىم بەرۋ پاندەرى بويىنشا حالىقارالىق جانە رەسپۋبليكالىق كونكۋرستاردىڭ, عىلىمي جوبالار مەن وليمپيادالاردىڭ جەڭىمپازدارى مەن جۇلدەگەرلەرى, بارلىعى 200-گە تارتا العاداي جاس قاتىستى.
ارۋلار اق كويلەك, بوزبالالار سىپتاي بولىپ سموكينگ كيگەن كەشكە وبلىس اكىمى نۇرمۇحامبەت ابدىبەكوۆ تە قاتىسىپ, جاستارعا اق تىلەككە تولى قۇتتىقتاۋ ءسوزىن ارنادى.
«سىزدەر مەكتەپتى قازاقستان رەسپۋبليكاسى تاۋەلسىزدىگىنىڭ 25 جىلدىعى قارساڭىندا ءبىتىرىپ وتىرسىزدار. تاريح ءۇشىن بۇل قاس-قاعىم ءسات شىعار, ال ءبىزدىڭ ومىرىمىزدە بۇل بيىك بەلەس, – دەدى ءوڭىر باسشىسى. – ءسىزدەردىڭ جارقىن بولاشاقتارىڭىزدان مول ءۇمىت كۇتەمىز. جاستارىمىزدىڭ قابىلەتتى, تالانتتى, اقىلدى جانە ارمانشىل ەكەندىگىنە دەگەن سەنىمىمىز مول. سىزدەردىڭ باتىلدىقتارىڭىز بەن ونەر تاپقىش قاسيەتتەرىڭىز, شىعارماشىلىق قابىلەتتەرىڭىز بەن ءومىردى جاقسى جاققا قاراي وزگەرتۋگە دەگەن قۇلشىنىستارىڭىز ارقايسىڭىزدىڭ لايىقتى دا قامسىز بولاشاقتارىڭىزدى قامتاماسىز ەتەتىنى ءسوزسىز. بارلىقتارىڭىزعا بەلسەندى ومىرلىك ۇستانىمى بار, ەلىمىزدىڭ ناعىز پاتريوتى جانە ادال ازاماتى بولۋ باقىتىن تىلەيمىن!».
بيىل وبلىستا 121 تۇلەك «التىن بەلگى» بەلگىسىنىڭ يەگەرى بولدى. سولاردىڭ ىشىندە جەزقازعانداعى قازاق-تۇرىك ليتسەيىنىڭ تۇلەگى تىلەپبەرگەن ابىشەۆ جاقىندا وتكەن ۇلتتىق بىرىڭعاي تەستىلەۋ سىناعىندا ەڭ جوعارى كورسەتكىشكە قول جەتكىزىپ, 125 ۇپاي جيناعان بولاتىن. وبلىس باسشىسى دارىندى بوزبالاعا ارنايى مەدالعا قوسا ەۋروپا قالالارىنا ساياحات جاساۋعا مۇمكىندىك بەرەتىن تاماشا تارتۋ – سەرتيفيكاتتى سالتاناتتى تۇردە تابىس ەتتى.
سونىمەن قاتار, حالىقارالىق وليمپيادالار مەن جارىستاردىڭ جەڭىمپازدارىنا «جاس دارا» مەدالدارى تاپسىرىلدى. مىسالى حيميا ءپانى بويىنشا ماسكەۋدە وتكەن حالىقارالىق وليمپيادانىڭ ەكى دۇركىن جەڭىمپازى تيىشكۇل مۇراتقا وبلىس اكىمى ارنايى سىيلىق – «وتان» قول ساعاتىن سىيعا تارتتى.
تۇلەكتەر كەشىندە مەكتەپتى كەلەسى جىلى بىتىرەتىن دارىندى بالالارعا دا تاۋەلسىزدىك پەن بەيبىتشىلىكتى جانە كەلىسىم مەن دامۋدى بەينەلەيتىن «امانات» مۇسىنشەلەرى تابىس ەتىلدى. ولاردىڭ اتا-انالارى دا العىس حاتتارىنا يە بولدى.
بۇدان باسقا, وسى كەشكە قاتىسقان تۇلەكتەردىڭ بارلىعىنا سپورتتىق قۇرال-سايمان الۋعا مۇمكىندىك بەرەتىن ارنايى سەرتيفيكاتتار سىيعا تارتىلدى.
ايتا كەتەتىن جايت, بيىل وبلىستىڭ وزا شاپقان تۇلەكتەرى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ, ءسۇلەيمەن دەميرەل اتىنداعى ۋنيۆەرسيتەتتىڭ, قاراعاندى مەملەكەتتىك تەحنيكالىق ۋنيۆەرسيتەتىنىڭ, قاراعاندى مەديتسينالىق ۋنيۆەرسيتەتىنىڭ, Fontys (گوللانديا), Solfridge, Unist (وڭتۇستىك كورەيا), Yale Univesity, ريۋ حەيۆەن, كوننەكتيكۋت (اقش) جانە م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتى سىندى شەتەلدىك جوعارى وقۋ ورىندارىنىڭ گرانتتارىن جەڭىپ العان بولاتىن.
كەشتىڭ رەسمي ءبولىمى ءتامام بولعاننان كەيىن كەزەك مەرەكەلىك كونتسەرتكە كەلىپ, جۇزدەرى باقىتتان بالبۇل جانعان ورەندەر ونەر مايتالماندارىنىڭ ورىنداۋىنداعى اسەم اندەردى تىڭداپ جانە جۇپتاسىپ ۆالس ءبيىن بيلەدى.
قايرات ءابىلدينوۆ,
«ەگەمەن قازاقستان»
قاراعاندى
