توپ ۇزدىكتەرى قارا ۇزە باستادى

فۋتبولدان فرانتسيادا ءوتىپ جاتقان ەۋروپا چەمپيوناتىنىڭ سوڭعى ءۇش كۇنىندە 8 كەزدەسۋ وينالدى. بۇلاردىڭ دەنى ءتۋرنيردىڭ كەلەسى كەزەڭىنە شىعاتىن كوماندالاردىڭ سۇلباسىن انىقتاپ بەرۋگە قىزمەت ەتتى. وسى كۇندەردىڭ كەنەرەسىندە ءبىر توپتاعى ويىندار دا تولىق وينالىپ ءبىتتى. اتاپ ايتقاندا, ا توبىنداعى كوماندالار ءوزارا كەزدەسۋلەرىن تولىق اياقتادى. كەشە تۇندە ۆ توبى دا ماتچ­تارىن مارەگە جەتكىزىپ توقتادى. ال ەرتەڭ بارلىق توپتاردا قورىتىندى شىعىپ بولادى. ءبىز بۇعان دەيىنگى جازبالارىمىزدا چەمپيوناتتا سەنساتسيا بولماعانىن بايانداعانبىز. سول قالىپ ءالى بۇزىلعان جوق. بىراق وسى ەسەپتى مەرزىمدەگى ءبىر جاڭالىق – سول كەزگە دەيىن بىردە-ءبىر رەت ورىن الىپ كورمەگەن ءىرى ەسەپتەر تىركەلدى. ولاردىڭ ەكەۋى دە 3:0 بولىپ اياقتالدى. ايتكەنمەن, ونى جاساعان جاساقتار شىن مانىندە دە قارسىلاستارىنان ايتارلىقتاي باسىم ەدى. ءبىرىنشى ءىرى ەسەپكە قۇرلىقتىڭ سوڭعى ەكى چەمپيوناتىنىڭ جەڭىم­پازى, الەمنىڭ ەكس-چەمپيونى يسپانيا قۇراماسى تۇركيامەن ويىندا قول جەتكىزدى. تۇرىكتەردىڭ بۇل تۋرنيردە ونشالىقتى جارقىراپ كورىنە قويماعانىن جۇرتتىڭ ءبارى ءبىلىپ وتىر. قۇرامىندا اردا تۋراننان باسقا باس كوتەرەتىن ەشكىمى جوق جاماعات سالعاننان سۇرەڭسىز ويىن كورسەتىپ كەلە جاتىر. ول وسىلايشا مۇندا العاشقى ويىنىندا بىردەي ۇتىلىس تاپقان ۋكراينادان كەيىنگى ەكىنشى ۇجىم بولدى. ال يسپاندار ونىمەن كەزدەسۋدە ماسەلەنى ەكىنشى تايمنىڭ باس جاعىندا-اق تولىق شەشىپ الدى. بۇل كەزگە دەيىن الۆارو موراتا (34, 48-مينۋتتار) مەن نوليتا (37) سوققان گولداردىڭ ارقاسىندا ويىن تاعدىرىن شەشىپ العان ولار سودان كەيىن قارقىندارىن ەداۋىر باستى. سوندا عانا تۇرىك «اي-جۇلدىزى» العا قاراي ۇمتىلدى. بىراق ولاردا ويلى ويىننان گورى اسىپ-ساسۋ, كۇيىپ-ءپىسۋ كوبىرەك كورىندى دە, شابۋىلدىڭ دۇرىس ناتيجە بەرۋىنە اپارىپ جەتكىزە قويعان جوق. بۇعان قاراعاندا, چەحيا مەن حورۆاتيا اراسىنداعى ويىن تارتىس­تىراق ءوتتى. ويىننىڭ ءبىرىنشى تايمىندا حورۆاتتار كوبىرەك تىزگىنگە يە بولدى. سونىڭ اسەرىمەن ولار يۆان پەريشيچتىڭ كۇش سالۋى ارقىلى 37-مينۋتتا ءبىرىنشى بولىپ ەسەپ تە اشتى. تاپ وسىدان كەيىن كوماندانىڭ فاناتتارى ماتچتىڭ توقتاۋىنا سەبەپكەرلىك ەتتى. ولار الاڭعا فايەر لاقتىرىپ, ءبىراز تۇتىندەتسە, وزدەرى وتىرعان سەكتوردا توبەلەس شىعاردى. ازەر قايتا جالعاسقان كەزدەسۋدە حورۆاتتار تاعى العا قاراي جوڭكىلە شاپتى. سول پارمەنىمەن 59-مينۋتتا يۆان راكيتيچتىڭ گولى ارقىلى ەسەپتى ەسەلەدى. ال چەحتاردىڭ ويىنى ەشبىر جۇرمەي قويدى. ولار الاڭعا ەندى عانا شىققان ميلان شكودانىڭ 76-مينۋتتا گول سوعۋىمەن ءبىر دوپتىڭ قارىمتاسىن قايتارا الدى. «حالىق كومانداسى» وسىنىڭ ارقاسىندا كوڭىلدەرىنە ءۇمىت وتىن جالعاپ, قاۋىرت قارسى شابۋىلدار ۇيىمداستىرا باستادى. بۇعان كەرىسىنشە ءوز جانكۇيەرلەرىنىڭ «وتىنا كۇيىپ» كەتە جازداعان حورۆاتتاردا ءبىراز ىركىلىس پايدا بولدى. مۇنىڭ سوڭى ويسىز ارەكەتتەرگە اپارىپ سوقتىردى. ءبىز 88-مينۋتتا دوماگوي ۆيدانىڭ ءوز قاقپاسى الدىندا كورەر كوزگە قولمەن دوپ قاعىپ جىبەرۋىن تەك وسىلاي باعالاي الار ەدىك. وسىعان بايلانىستى بەلگىلەنگەن پەنالتيدى توماش نەتسيد ءمۇلت جىبەرمەدى. ەسەپ – 2:2! وسى كۇنگى ءۇشىنشى ويىندا يتاليا شۆەتسيانى ارەڭ ۇتتى. ول بۇعان 88-مينۋتتا ەدەردىڭ گول سوعۋى ارقىلى قول جەتكىزدى. ال سەنبى كۇنگى ويىنداردىڭ شىمىلدىعىن اشقان بەلگيا – يرلانديا كەزدەسۋىندە وسى كۇندەرگى ەكىنشى ءىرى ەسەپ تىركەلدى. ماتچتىڭ باسىندا بۇلاردىڭ الدىڭعىلارى باسىم ەكەنى انىق بايقالىپ تۇرعانىمەن, سوڭى تالقانداۋمەن اياقتالاتىنىن ەشكىم پايىمداي قويماعان شىعار. عالاماتتىڭ ءبارى ەكىنشى تايمدا ورىن الدى. ونىڭ العاشقى 25-مينۋتىندا رومەلۋ لۋكاكۋ (48, 70) مەن اكسەل ۆيتسەلدىڭ (61) ەسەبىمەن ويىننىڭ تاعدىرى دا شەشىلدى. ءسويتىپ, وسى كۇندەرى الۆارو موراتادان كەيىن ەكىنشى ويىنشى دۋبل جاسالدى. بۇدان كەيىنگى ەكى ويىن دا تەڭ اياقتالدى. ماسەلەن, يسلانديا مەن ۆەنگريا 1:1 ەسەبىمەن تارقاسسا, پورتۋگاليا – اۆستريا ماتچىندا ەسەپ اشىلمادى. بۇل جولى دا كريش­تيانۋ رونالدۋدىڭ ويىنى ونشالىقتى مازالى بولمادى, سول سەبەپتى پورتۋگالدار دا اسا ءبىر باسىم­دىق كورسەتە المادى. جەكسەنبى كۇنى ا توبىنداعى ەكى ويىن عانا وينالدى. توپتارداعى ماتچ­تار ءبىرىنشى رەت ءبىر مەزگىلدە باستالدى. بۇل كەزدەسۋلەردىڭ ءناتي­جەلەرى ءبىر-بىرىنە اسەر ەتپەۋ ءۇشىن جاسالدى. مىنە, تاپ وسى ساتتە از­عانتاي سەنساتسيا ومىرگە كەلگەن سياق­تى. ءبىز بۇل جەردە بۇرىننان فۋتبولدا وزىندىك ءداستۇرى بار رۋمىنيا قۇراماسىنىڭ البانيادان 0:1 بولىپ ۇتىلىپ قالعانىن وسىنداي كۇتپەگەن ناتيجەگە بالاپ وتىرمىز. وسىنىڭ سالدارىنان رۋمىندار سوڭعى ورىندا قالدى دا, الباندار كەلەسى كەزەڭگە باراتىن بولىپ شىعا كەلدى. وسىمەن قاتار وتكەن شۆەيتساريا – فرانتسيا كەزدەسۋىندە ماسەلەنى وڭىنان شەشىپ قويعان قارسىلاستار اسا كوپ القىنۋعا بارمادى. سوندىقتان ونىڭ ەسەپ اشىلماعان كۇيدە اياقتالعانىنا تاڭعالۋعا بولمايتىن شىعار. سەرىك ءپىرنازار, «ەگەمەن قازاقستان»