شاقالاققا ءومىر سىيلاعان

اقتاۋدا ەسىمى حالىق اراسىندا ىقىلاسپەن ايتىلاتىن ساناۋلى دارىگەرلەردىڭ ءبىرى – وبلىستىق بالالار اۋرۋحاناسىنىڭ حيرۋرگى قۇرمان قايرانوۆ. ءوز اتىنا ايتىلاتىن جىلى لەبىزدەرگە دالەل سىندى قۇرمان بۇدان جارتى جىل بۇرىن وتە اۋىر وتا جاساپ, جاڭا تۋعان نارەستەنىڭ وڭەش بىتەۋلىگىن اشىپ بەردى. مۇنى ادام وڭەشىنىڭ ءوزارا جالعاسپاعان ەكى بولىككە ءبولىنۋى دەپ تۇسىندىرۋگە بولادى, مۇنداي جاعدايدا ادام اس قابىلداي الماي, اشتىقتان ءولىپ كەتەتىنى انىقتالعان. دەمەك, 18 جىلدىق تاجىريبەسى بار ول ماڭعىستاۋدا وڭەش بىتەۋلىگىن ەكونوسكوپيالىق جولمەن اشقان العاشقى حيرۋرگ. وتا بارىسىندا ق.قايرانوۆ وبلىستىق پەريناتالدىق ورتالىقتىڭ حيرۋرگ-گينەكولوگتارىنىڭ كومەگى­مەن بالانىڭ كەۋدە جاسۋشاسىن اشپاي, وڭەشتىڭ ەكى سوقىر ۇشىن بىرىكتىردى. ال, بۇل ءۇشىن قۇرمان الدىن الا سيمۋلياتسيالىق زالدا, ارنايى ساتىپ الىنعان مالدىڭ ىشەك-قارنىمەن قولىن جاتتىقتىرىپ, دايىندالعان. حيرۋرگ بولسا, مۇنداي كۇردەلى وتانى كوپتەگەن بالالاردىڭ كوتەرە المايتىندىعىن, سوندىقتان وتانى بالا ومىرگە كەلگەن سوڭ العاشقى تاۋلىكتەردە جاساعان ءجون ەكەندىگىن ايتقان. سونداي-اق, ول ءوز الدىنا بارلىق وتانى لاپاروسكوپيالىق ادىسكە اۋىستىرىپ جاساۋدى مىندەت ەتىپ وتىر. قازىرگى تاڭدا ماڭعىستاۋ وبلىسى بالا تۋ كورسەتكىشى بويىنشا رەسپۋبليكادا ءبىرىنشى ورىندا, وڭىردە جىلىنا 8 مىڭداي نارەستە دۇنيەگە كەلەدى. بىراق, ولاردىڭ اراسىنان دامۋىندا اقاۋ بار بالالار دا كەزدەسەدى, سوندىقتان پەريناتالدىق ورتالىقتا اشىلعان نەوناتالدى حيرۋرگيادا ەكى جىلدا 50 وتا جاسالعان. قازىر جاعدايى ءبىراز جاقسارعان كىشكەنتاي تۇراربەكتىڭ اناسى ۇلىنىڭ وسكەندە قۇرمان اعاسى سىندى حيرۋرگ بولىپ, جۇرتقا جاقسىلىق سىيلاعانىن قالايدى ەكەن. دۇرىس-اق. بولسىن دەيمىز. ويتكەنى, ماڭعىستاۋدىڭ ماقتاۋلى دارىگەرى رەتىندە ارىپتەستەرىنىڭ مەرەيىن ءوسىرىپ, سالانىڭ ساڭلاعى سانالعان قۇرمان قايرانوۆتاي ءوز ءىسىنىڭ شەبەرى, بىلىكتى دارىگەرلەر كوپ ەمەس جانە قولى التىن دارىگەرلەر حالىققا قاشاندا كەرەك. گۇلايىم شىنتەمىرقىزى, «ەگەمەن قازاقستان» ماڭعىستاۋ وبلىسى