استانا. «التىن بەلگى». اق ارمان

تاياۋدا قالانىڭ ورتالىق الاڭىندا استانا اكىمى ادىلبەك جاقسىبەكوۆ بىرىڭعاي ۇلتتىق تەستىلەۋدىڭ قورىتىندىسى بويىنشا ءوز ءبىلىمىن راستاعان 132 ەلوردالىق تۇلەككە «التىن بەلگى» توسبەلگىلەرىن تابىس ەتتى. ءداستۇرلى شاراعا پارلامەنت پەن قالالىق ءماسليحات دەپۋتاتتارى, ءبىلىم جانە عىلىم مينيسترلىگىنىڭ وكىلدەرى, سونداي-اق, مۇعالىمدەر مەن اتا-انالار قاتىستى. ەلوردا باسشىسى تۇلەكتەردى ايتۋلى وقيعامەن قۇتتىقتاپ, جاستارعا بولاشاقتا بۇدان دا ۇلكەن جەتىستىكتەر كۇتىپ تۇرعانىن ايتتى. «قازىرگى كەزدە سەندەردىڭ مىندەتتەرىڭ – ومىرلىك جولدا تىرەك بولاتىن, وزدەرىڭ ءۇشىن سەنىمدى سەرىك بولاتىن كاسىپتى تاڭداۋ», – دەدى ءا.جاقسىبەكوۆ. ودان ءارى اكىم مەملەكەت باسشىسىنىڭ ءبىلىم ماسەلەلەرىنە باسا نازار اۋداراتىنىن اتاپ ءوتتى. «بۇگىنگى تاڭدا مەملەكەت ءبىلىم الۋ ءۇشىن بارلىق جاعدايلاردى جاساپ وتىر: ەلىمىزدىڭ جەتەكشى جوو-نىڭ ەسىكتەرى سەندەر ءۇشىن ايقارا اشىق, ۇزدىك پەداگوگتار جۇمىس ىستەپ, ءبىلىم بەرۋ گرانتتارىنىڭ سانى ۇلعايتىلدى, ستيپەنديا ءوسىپ, الەمدىك دەڭگەيدەگى ۋنيۆەرسيتەت – «نازارباەۆ ۋنيۆەر­سيتەت» قۇرىل­دى, «بولاشاق» باعدارلاماسى ءجۇ­زەگە اسىرىلۋدا», دەدى ەلوردا اكىمى. قالا باسشىسى بالالاردى وقى­تىپ, ءار وقۋشىنى ءبىلىم نارىمەن سۋسىنداتقان ۇستازدار قاۋىمىنا ەرەكشە ال­عىسىن ءبىلدىردى. ەلوردالىق مەكتەپتەر تۇلەكتەرگە مىقتى ءبىلىم بازاسىن قالىپتاستىرىپ, ولاردىڭ بويىنا رۋحاني-ادامگەرشىلىك باعدار بەرىپ, جاستاردى ەرەسەك ومىرگە دايىندايدى. استانادا ءبىلىم سالاسىندا قولايلى جاعداي جاسالعان. جالپى ءبىلىم بەرەتىن مەكتەپتەر سانى جىل سايىن ارتىپ كەلەدى. وتكەن جىلى 7100 ورىندىق 6 مەكتەپ اشىلىپ, ءۇش اۋىسىمدىق وقۋدى تولىعىمەن جويۋعا قول جەتكىزىلدى. اتقارىلعان جۇمىستاردىڭ ناتيجەسىندە ءبىلىم ساپاسى ارتىپ كەلەدى. 2016 جىلى «التىن بەلگى» يەسى اتانعان ەلوردالىق تۇلەكتەردىڭ سانى وتكەن جىلمەن سالىستىرعاندا 112-دەن 132-گە, ۇبت بويىنشا ورتاشا بالل 86,6-دان 89,2 باللعا ءوستى. ەلوردالىق وقۋشىلار حالىقارالىق وليمپيادالار مەن عىلىمي جوبالاردا جۇلدەلى ورىندار يەلەنۋدە. وتكەن جىلى ولار اقش, برازيليا, گرۋزيا, وڭتۇستىك كورەيا, رەسەي مەملەكەتتەرىندە وتكەن جارىستاردان 268 مەدال يەلەنىپ قايتتى. ايتا كەتەيىك, استانادا 2015-2016 جىلعى وقۋ جىلىنىڭ قورىتىندىسى بويىنشا 4695 تۇلەك اتتەستات الادى, سونىڭ ىشىندە, 54-ءى ەرەكشە ۇلگىدەگى اتتەستاتتار. قالا اكىمى تۇلەكتەرگە اق جول تىلەپ, العان ءبىلىمدى ومىردە ءتيىمدى پايدالانۋعا شاقىردى. سالتاناتتى ماراپاتتاۋ ءراسىمى اياقتالعان سوڭ «التىن بەلگى» توسبەلگىلەرىنىڭ يەگەرلەرى ءداستۇرلى مەكتەپ ءۆالسىن بيلەپ, اسپانعا تۇلەكتەردىڭ تىلەكتەرى جازىلعان شارلار ۇشىرىلدى. تۇلەكتەردى قازاقستاندىق ەسترادا ونەرپازدارى قۇتتىقتادى. ۇلان سانجار