جاڭا زاۋىت اشىلدى

جاقىندا استانا قالاسىندا «يپەك كاگىت تسەنترال ازيا» تۇرىك كومپانياسى گيگيەنالىق قاعاز ونىمدەرىن شىعاراتىن جاڭا زاۋىت اشتى. ءىرى ءوندىرىس وشاعىنىڭ اشىلۋى ەلىمىزدە جۇمىس ىستەپ جاتقان ءىرى تۇرىك ينۆەستورى – Ipek Kagit كومپانياسىنىڭ قازاقستانداعى قىزمەتىنە 10 جىل تولعانىنا ورايلاستىرىلىپ وتىر. ەلوردانىڭ قارقىندى دامۋ ۇردىسىندە ينۆەستيتسياعا ءبىرىنشى كەزەكتە باسىمدىق بەرىلىپ وتىر­عان­دىعى زاڭدى. قالا ەكونوميكاسىنا تارتىلعان بۇل ينۆەستيتسيالار از ۋاقىتتىڭ ىشىندە استانانىڭ ءوزىن-ءوزى تولىق قامتاماسىز ەتەتىن ەلىمىزدەگى ساناۋلى قالالاردىڭ قاتارىنا كىرۋگە مۇمكىندىك بەردى. باس قالانىڭ وندىرىستىك نىساندارىنىڭ قاتارىنا قوسىلعان جاڭا زاۋىت تا وسى رەتتە وزىندىك ۇلەسىمەن تانىلۋى ءتيىس. جالپى اۋدانى 50 000 شار­شى مەتردى قۇرايتىن جاڭا زاۋىت­تىڭ قۇنى 14 ميلليون دول­لاردى قۇراعان. جوبانى «دامۋ» كدق» اق-تىڭ شاعىن جانە ورتا بيزنەس سۋبەكتى­لەرىن قولداۋ­عا ار­نال­عان مەملە­كەت­تىك باعدار­لاما­سى­نىڭ بەلسەندى قاتىسۋشىسى – «قازينۆەستبانك» اق قارجىلان­دىر­دى. وندىرىستىك قۋاتى جىلىنا 17000 توننا گيگيەنالىق قاعاز ءونىم­دەرىن شىعارۋعا ارنالعان جاڭا زاۋىت «استانا – جاڭا قالا» ار­نايى ەكونوميكالىق ايما­عىن­دا ورنالاسقان. جۇمىسىن ەندى باس­تايتىن ءوندىرىس ورنىندا ەلور­دا­لىقتارعا ارنالعان جاڭا جۇمىس ورىندارى اشىلۋدا. جاڭا زاۋىتتىڭ اشىلۋ سال­تا­ناتىنا تۇرىك رەسپۋبليكا­سى­نىڭ قازاقستانداعى توتەنشە جانە وكىلەتتى ەلشىسى نەۆزات ۋيانىك جانە Eczacıbaşı Holding Co كوم­پا­نياسىنىڭ اتقارۋشى ۆيتسە-پرەزيدەنتى حاكان ۋيانىك قاتىستى. بۇل ءوندىرىس ورتالىعىنىڭ ونىمدەرى تاياۋ شەتەلدەرگە, ونىڭ ىشىندە رەسەيگە ەكسپورتتالاتىن بولادى. «ءبىز قازاقستانداعى 10 جىل­د­ىق قىزمەتىمىزدى ەڭ زاماناۋي زاۋىت­تىڭ اشىلۋىمەن اتاپ ءوتىپ وتىر­عانىمىزعا قۋانىشتىمىز. جوعارى ساپالى ءونىمنىڭ جانە Selpak برەندىنە ينۆەستيتسيا قۇيۋ­دىڭ ار­قاسىندا ءبىز قازاقستان نارى­عىن­داعى كوشباسشىعا اينال­دىق.  بۇگىنگى تاڭدا ءبىز بۇكىل وڭىردەگى كوشباسشى بولۋ­دى كوزدەپ وتىرمىز. جاڭا زاۋىتى­مىز­دىڭ ءون­دىرىستىك قۋاتىن ەكى ەسەگە ارت­تىرۋ بىزگە وسى ماقساتقا جەتىپ, كوم­پا­نيا­مىز­دىڭ ورتالىق ازيا اۋما­عىن­دا­عى قىزمەتىن كەڭەيتۋگە مۇمكىن­دىك بەر­مەك», – دەپ اتاپ ءوتتى حاكان ۋيانىك. زاۋىتتىڭ اشىلۋ سالتاناتىندا قوناقتار مەن جۋرناليستەر كومپا­نيا­نىڭ قازاقستانداعى قىزمەتىمەن تانىسۋعا مۇمكىندىك الدى. وسى رەتتە ايتا كەتەتىن بولساق, Ipek Kagit كومپانياسى – سانيتارلىق-گيگيە­نالىق ماقساتتاعى قاعاز ءونىم­دەرىن, اتاپ ايتقاندا, Selpak, Silen, Servis, Selpak Professional جانە Marathon سەكىلدى ساۋدا بەلگىلەرىن شىعاراتىن  ەڭ ءىرى تۇرىك ءوندىرىسى بولىپ تابىلادى. كومپانيا Eczacibaşı Group تۇرىك كومپانيالار توبىنىڭ قۇرامىنا كىرەدى. كوم­پا­نيانىڭ برەند­تەرى الەمنىڭ 60-تان اسا ەلىندە ساۋدا­لانۋدا, سونداي-اق, قاعازدان جاسالعان گيگيەنالىق ونىمدەردىڭ ىشىندەگى ەڭ تانىمال ءارى كوپشىلىكتىڭ كوڭىلىنەن شىققان ءبىرىنشى ورىنداعى ساۋدا بەلگىلەرى سانالادى. ورتالىق ازيادا جۇمىس جۇرگىزۋ ماقساتىندا 2006 جىلى «يپەك كاگىت تسەنترال ازيا» كومپانياسىنىڭ نەگىزى قالان­دى, قازىرگى تاڭدا ول – تمد اۋما­عىن­داعى قاعاز وڭدەيتىن ەڭ ءىرى زاما­ناۋي زاۋىتتاردىڭ ءبىرى بولىپ وتىر. ۇلان سانجار سۋرەتتە: زاۋىتتىڭ اشىلۋ سالتاناتىنان كورىنىس