اقتوبەلىك دارىگەرلەر

ۇلىبريتانيا ازاماتشاسىن اجالدان اراشالاپ قالدى وسىدان بىرنەشە كۇن بۇرىن يسلامابادتان لوندونعا ۇشقان ۇشاقتىڭ شۇعىل تۇردە اقتوبە حالىقارالىق اۋەجايىنا قونۋىنا تۋرا كەلدى. وعان 64 جاستاعى جولاۋ­شى ايەلدىڭ بۇيرەگى سىر بەرگەنى سەبەپ بولعان. وكپە قابىنۋى مەن ديابەتكە شالدىققان جولاۋشىنى اقتوبەلىك اق حالاتتىلار ەمدەپ جاتىر. ءبيبى نۇر مۇحامەديدىڭ كۇيەۋى مەن بالالارى انالارىن الىپ كەتۋ ءۇشىن لوندوننان اقتوبەگە ارنايى ۇشىپ كەلدى. ولار دارىگەرلەرگە قايىرىمدىلىقتارى ءۇشىن شىنايى العىستارىن ءبىلدىرىپ, ەس­تەلىككە سۋرەتكە ءتۇسۋدى دە ۇمىت­پادى. پاكىستان ەلىندە تۋعان ۇلى­بريتانيا ازاماتشاسىنىڭ دەنساۋ­لىعى كوكتە ناشارلاپ, ۇشاق قونۋعا ءماجبۇر بولعان. ناۋقاس اۋىر حالدە كلينيكالىق اۋرۋحانانىڭ جانساقتاۋ بولىمىنە تۇسكەن. ءبو­لىم­نىڭ مەڭگەرۋشىسى قامالحان ەرماعامبەتوۆ كلينيكاداعى مۋلتيفيلترات دەگەن اپپاراتتىڭ اسا كۇردەلى جاعدايداعى ناۋ­قاس­تاردى ەمدەيتىنىن, ءبىر جارىم جىلدان بەرى 25 ناۋقاسقا ەم جاسالعانىن, ءبارى دە ساۋىعىپ شىق­قانىن جەتكىزدى. دارىگەرلەردىڭ ايتۋىنشا, ناۋ­قاس­تىڭ زات الماسۋ پروتسەسى بۇزى­لىپ, اعزاسى لاستانۋى سالدارىنان بۇيرەگى اۋىرىپ, ديابەتى اسقىنىپ كەتكەن. قامالحان قۋان ۇلىنىڭ مالىمدەۋىنشە, قازىر جاعدايى قا­لىپتى, دارىگەرلىك قاداعالاۋدا. – وتە اۋىر جاعدايداعى قاتاڭ ناۋقاس كلينيكالىق ءولىم دياگنوزىمەن ءبىزدىڭ ەمدەۋ ورنىنا جەتكىزىلگەن بولاتىن. وسى ۇجىم كورسەتكەن مەديتسينالىق كومەكتىڭ ارقاسىندا 4 كۇن كومادا بولعان ناۋقاس ەسىن جيىپ, جاعدايى جاقسارىپ, ەلىنە قاي­تۋعا دايىندالىپ جاتىر, – دەدى وبلىستىق كلينيكالىق اۋرۋحانانىڭ باس دارىگەرى سامات دانياروۆ. ونى ەمدەۋگە اقتوبەدە جۇمىس ىستەيتىن پاكىستاندىق كارديولوگ ينامۇللاح حان دا كومەكتەسكەن ەكەن. ول وتانداسىنىڭ اجال اۋزىنان امان قالعانى تۋرالى ءوز ەلىنە حابارلاعان كورىنەدى. ول دا قازاق حالقىنا, دارىگەرلەرىنە ريزاشىلىعىن ءبىل­دىرگەن. ساتىبالدى ءساۋىرباي, «ەگەمەن قازاقستان» اقتوبە