اقش اباقتىسىنان بوساتىلدى

مۇحيتتىڭ ارعى جاعىنداعى سولتۇستىك امەريكادا ءجۇرىپ, لاڭكەستىك ارەكەتكە قاتىسى بار دەگەن ايىپپەن 3,5 جىلعا باس بوستاندىعىنان ايىرىلعان ازامات تاجاياقوۆ اقش اباقتىسىندا جازاسىن تولىق وتەپ, ەلگە ورالدى. كەشە ونى الماتى اەروپورتىنان كۇتىپ الۋعا اتا-اناسى, تۋعان-تۋىستارى مەن دوستارى كەلدى. ۇلىن كورىپ, باۋىرىنا باسقان اكەسى قۋا­نىشىنا ورتاقتاسقان ەل-جۇرتقا شەكسىز العىسىن جەتكىزدى. – وتباسىمىز ءۇشىن بۇگىن – ەڭ باقىتتى كۇن. مەن ەلباسىنا, ەلىمىزدىڭ باس پروكۋراتۋراسىنا, سىرتقى ىستەر مينيسترلىگىنە جانە تىلەكشى بولعان حالقىما راحمەت ايتامىن. ويتكەنى, ۇلىم 25 جىلعا سوتتالۋى مۇمكىن ەدى. الايدا, اتالعان تۇلعالار مەن وكىلەتتى ورگاندار ارالاسىپ, مەرزىمىن قىسقارتتى. مەنىڭ بۇگىن باقىتتان باسىم اينالىپ تۇر, – دەدى ءامىر ىسماعۇلوۆ. ال وسىنشاما ۋاقىتتان كەيىن تابانى تۋعان جەرگە تيگەن ازامات: «قازىر جۇرەگىم توقتاپ قالارداي بولىپ تۇر. قاتتى سوعىپ جاتىر. قۋا­نىشىمدا شەك جوق. كەلىپ كۇتىپ العاندارىڭىزعا راحمەت. اكەم قو­ڭىراۋ شالىپ, جاعدايىمدى ءبىلىپ تۇردى. ول كىسىگە دە العىسىم شەكسىز. ءۇش جارىم جىل بولدى قازاقستاندا بولماعانىما. ەت جەپ دەمالىپ, قىمىز ءىشىپ جاتقىم كەلەدى», – دەدى. بۇگىندە وتانىنا ورالعان قان­داسىمىز اقش تۇرمەسىندە ءتىل ءۇي­رەنگەنىن ايتتى. ول اعىلشىن, يسپان, قىتاي تىلدەرىن جەتىك مەڭگەرىپتى. – مەن ەندى امەريكاعا بارىپ, وقۋىمدى جالعاستىرا المايمىن. سوندىقتان دا ەندىگى ماقساتىم – قىتايدا وقىپ, ءبىلىم الۋ. بىراق ەڭ اۋەلى تۋعان مەكەنىم – اتىراۋعا اتتانامىن. ول جاقتا تىنىعىپ, دەمالىپ, اتا-انامنىڭ قاسىندا بولامىن, – دەيدى ول. ەستەرىڭىزگە سالا كەتەيىك, اقش تۇرمەسىندە جاتقان تاعى ءبىر وتانداسىمىز دياس قىدىرباەۆتىڭ جازاسىن تولىق وتەۋىنە ءالى 2 جىل بار. تالعات رايىمبەك, «ەگەمەن قازاقستان»