الماتىعا... 63 ساعاتتا!

بەينەۋ-شالقار تەمىرجولى قۇرىلىسى باستالعان كەزەڭدە-اق ماڭعىستاۋلىقتار: «الماتىعا دەيىنگى جول قىسقاراتىن بولدى», دەپ قۋانعان ەدى.  الايدا, تەمىرجول قۇرىلىسى اياقتالىپ, پايدالانۋعا بەرىلگەنمەن, جاڭا جول بويىمەن ازىرگە جولاۋشىلار تاسىمالدايتىن پويىزداردىڭ جىبەرىلمەيتىندىگى ايتىلعان. ماڭعىستاۋلىق جولاۋ­شىلار­دىڭ قۋاناتىن دا ءجونى بار. ويتكەنى, كورشىمىز قىزىلوردا وبلىسى ارقىلى تىكەلەي جەتۋگە بولاتىن الما­تىعا بارۋ ءۇشىن, كەرىسىنشە جول­عا شىعۋعا تۋرا كەلەدى. ياعني, اتىراۋ باعىتىنا بەت الىپ, ماقات ستانساسىنان اقتوبە وبلىسىنىڭ اۋماعىنا قاراي بۇرىلىپ, قانداعاشتان وڭتۇستىككە قاراي جۇرگەندە, سى­­زىق بويىمەن ايتساق, ءبىر قا­بىرعاسى جوق ءتورتبۇرىش سىن­دى ارتىق ءجۇرىس جاساپ بارىپ شالقارعا جەتەتىن. بۇل ۇزاق جول, ارتىق ءجۇرىس قاقاعان قىستا دا, اپتاپ ىستىقتى جازدا دا جولاۋشىلار ءۇشىن قولايلى بولماعانى انىق. بيىل 6 شىلدەدەن باستاپ جاڭا جولمەن جولاۋشىلار پويىزى جىبەرىلىپ, «ماڭعىستاۋ-الماتى» پويىزى جولعا شىق­پاق. تەمىرجول ۆوكزالى انىق­تاماسىنىڭ مالىمەتىنشە, بۇ­رىنعى 74 ساعات 17 مينۋتتىق جول ەندى 63 ساعات 28 مينۋت بولىپ قىسقارسا, بيلەت باعاسى 1 مىڭ تەڭگەدەي ايىرماشىلىققا يە. ياعني, ماڭعىستاۋدان الماتىعا دەيىن كۋپە ۆاگون قۇنى 11 097 تەڭگە بولسا,  پلاتسكارت ۆاگون ءۇشىن 7 095 تەڭگە. سونداي-اق, جالپى قاشىقتىعى 3269 شا­قىرىمدى قۇراپ كەلگەن جول 471 شاقىرىمعا قىسقاراتىن بولادى. دەمەك, جولاۋشىلار ءدىت­تەگەن جەرىنە بۇرىنعىدان 10 ساعاتقا ەرتە جەتەدى دەپ كۇتىلۋدە. گۇلايىم شىنتەمىرقىزى, «ەگەمەن قازاقستان» ماڭعىستاۋ وبلىسى