قازاق قالامگەرىنە – ماحمۇد قاشقاري سىيلىعى

كورنەكتى جازۋشى, دراماتۋرگ, سىنشى, مەملەكەتتىك سىيلىقتىڭ لاۋرەاتى ءسابيت دوسانوۆقا «تۇرىك الەمىنە سىڭىرگەن اسا زور ەڭبەگى ءۇشىن» بەرىلگەن ماحمۇد قاشقاري اتىنداعى حالىقارالىق سىيلىقتى تاپسىرۋ سالتاناتىنا ارنالعان ادەبي كەش ءال-فارابي اتىنداعى قازاق ۇلتتىق ۋنيۆەرسيتەتى كىتاپحاناسىنىڭ ۇلكەن كونفەرەنتس-زالىندا ءوتتى. باسقوسۋدى ۋنيۆەرسيتەت رەكتورى عالىمقايىر مۇتا­نوۆ اشىپ, جۇرگىزىپ وتىردى. ازەر­بايجان جازۋشىسى, «شى­نار» جۋرنالىنىڭ باس رەداكتورى, قاشقاري اتىنداعى قوردىڭ توراعاسى ەلحان زال ماحمۇد قاشقاري سىيلىعىن ءسابيت دوسانوۆقا سالتاناتتى تۇردە تاپسىردى. «ءسابيت دوسانوۆ بۇل سىيلىقتى كوركەم پروزاداعى العاشقى تۋىندىسى «اق ارۋانا» پوۆەسى ءۇشىن الىپ وتىر. وسى ۋاقىتقا دەيىن بۇل ەڭبەك ورىس, فرانتسۋز, وزبەك, قىرعىز, ازەربايجان, تۇرىك, ت. ب. تىلدەرگە اۋدارىلىپ, الىس-جاقىن ەلدەردەن لايىقتى باعاسىن الىپ ۇلگەردى» دەدى ول. الماتى قالاسى اكىمدىگىنىڭ ىشكى ساياسات باسقارماسىنىڭ باسشىسى نۇرلان سىدىقوۆ قالا اكىمى باۋىرجان بايبەكتىڭ ارنايى قۇتتىقتاۋىن جەتكىزدى. جيىن بارىسىندا ءسابيت دوسانوۆقا «قازۇۋ-عا 80 جىل» التىن مەدالى تابىس ەتىلدى. سونى­مەن قاتار, شىعارماشىلىق كەشتە قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى عالىم جايلىباي, جازۋشى, مەملەكەتتىك سىي­لىقتىڭ لاۋرەاتى دۋلات يسابە­كوۆ, ماسكەۋ قالاسىنداعى قازاق مادەني اۆتونومياسىنىڭ قۇتتىق­تاۋىن الىپ كەلگەن جارقىن قو­ڭىر­بايقىزى كەش يەسىنە اقجارما تىلەكتەرىن ايتتى. قازاقستاننىڭ ەڭبەك سىڭىرگەن قايراتكەرى, كۇيشى-كومپوزيتور ءشامىل ءابىلتاي قالامگەرگە ارنا­عان «سابەڭ سال» اتتى ءانىن تامىلجىتا شىرقاسا, اقساقال ساتيريك مىڭباي ءراش ءسابيت دوسانوۆقا ارناعان «تەكتىلەر توعىسۋى» اتتى قيالدىق ەلەگياسىن, سونداي-اق, اقىن مىرزان كەنجەباي ارناۋ ولەڭىن وقىدى. جيىندا ءسوز العان كەش يەسى, بەلگىلى قالامگەر, پروفەسسور ءسابيت دوسانوۆ: «مەن بۇل ۋني­ۆەرسيتەتتىڭ 1964 جىلعى تۇلەگى بولامىن. بىلايشا ايتقاندا, اتا-انام سەكىلدى. ەندەشە, بۇل وقۋ ورنىندا بولعان ادەبي كەش مەن ءۇشىن ۇلكەن قۇرمەت», دەپ وتىرعان جاستارعا جالپى كوپشىلىككە اتالى ءسوز ارنادى. «ەگەمەن-اقپارات»