جەڭىمپازدار جولدارىنان جاڭىلعان جوق

ماۋسىمنىڭ 13-ءى كۇنى فۋتبولدان فرانتسيادا ءوتىپ جاتقان ەۋروپا چەمپيو­ناتىندا 1-تۋردىڭ تاعى 3 ويىنى وينالدى. بۇلاردا دا بۇرىننان قۇرلىق بىرىنشىلىكتەرىندە توپ جارىپ جۇرگەن قۇرامالار جولدارىنان جاڭىلماي, جەڭىستەرىنە جەتتى. ءسويتىپ, دوپ دوداسى سورە تارتقان كۇننەن ۇندەستىگىن تاپقان ۇيلەسىم ودان ءارى جالعاستى. اتاپ ايتقاندا, يسپانيا – چەحيانى 1:0, يتاليا بەلگيانى 2:0 ەتىپ تىزە بۇكتىردى. ال يرلانديا مەن شۆەتسيا اراسىنداعى كەزدەسۋ 1:1 ەسەبىمەن تەڭ اياقتالدى. الاڭعا الدىمەن يسپانيا جانە چەحيا باس كوماندالارى شىقتى. وسى جولى ۆيسەنتە دەل بوسكەنىڭ شاكىرتتەرى ءبىرازدان بەرى وزدەرى ءۇشىن ۇردىسكە اينالىپ قالعان ستاتيستيكانى بۇزدى. بىراق ولارعا بۇل وڭايلىقپەن كەلگەن جوق, «قىزىل فۋريا» ساربازدارى نەگىزگى ۋاقىت بىتۋگە بار-جوعى 3 مينۋت قالعاندا عانا ماتچتاعى جالعىز گولدى سالىپ, تارازى باسىن وزدەرىنە قاراي اۋدارىپ اكەتتى. بۇلاي دەيتىنىمىز, يسپاندار تەرمە جاماعات تىزگىنىن جوعارىدا اتالعان مامان قولعا ۇستاعالى ءوزى قاتىسقان سوڭعى ءۇش ءىرى فۋتبول ءتۋرنيرىنىڭ بىردە-بىرىندە ءبىرىنشى كەزدەسۋدە جەڭىسكە جەتىپ كورمەگەن ەدى. سول كومپلەكس چەحتارمەن اراداعى ويىننىڭ ءون بويىندا بايقالىپ تۇردى. مۇنىڭ ۇستىنە, بۇعان دەيىنگى – 2008 جانە 2012 جىلدارعى ەۋروپانىڭ باس باسەكەلەرىندە التىن جۇلدەگەر اتانعان يسپانيا قۇراماسىنىڭ سول داڭقتى ءداستۇردى ءۇشىنشى مارتەگە جەتكىزۋدى ماقسات ەتىپ قويعاندارى جاۋاپكەرشىلىك جۇگىن تىم اۋىرلاتىپ جىبەرگەن سياقتى. سوندىقتان ءجونسىز قاتەلىك جىبەرىپ الۋدان قورىققان قۇرلىق چەمپيوندارى ساۋىسقاننان ساق قيمىل تاكتيكاسىنان اسا الماي جاتتى. بۇعان قوسا, تاپ وسى دودا قارساڭىندا ءوز الاڭىندا گرۋزيا قۇراماسىمەن وتكىزگەن ويىندا كۇتپەگەن جەردەن 0:1 بولىپ ۇتىلىپ قالۋلارى دا كوڭىلگە كۇماندى كۇتىرلەتىپ كىرگىزىپ جىبەرگەنگە ۇقسايدى. بۇلارعا قاراعاندا, چەحتار چەمپيونعا قارسى ويىنعا اسا كوپ الاڭداماي دايىندالىپ كەلگەندەي كورىندى. سوندىقتان دا پاۆەل ۆربانىڭ شاكىرتتەرى ماتچ باستالعانداي بويدا «توتىدايىن تارانۋعا» كوشكەن قارسىلاستارىنىڭ اۋەزە كوڭىل كۇيلەرىنە كوز توقتاتىپ جاتپاي, بىردەن الاڭ ءۇستىنىڭ اپاي-توپايىن شىعارىپ جىبەردى. سول ەكى ورتادا ولار ءبىرىنىڭ سوڭىنان ءبىرىن جونەلتكەن ەكى بىردەي بۇرىشتاما دوبىن بەرىپ ۇلگەردى. سونىڭ ارتىنشا قاقپاعا قاراي تۋرالاپ سوعۋعا بەلگىلەنگەن ايىپ دوبىن ۇرۋ قۇقىعىنا قول جەتكىزدى. بىراق چەحتار مۇنىڭ بىردە-ءبىرىن ءوز پايدالارىنا قاراي شەشە المادى. وسىدان كەيىن عانا ءوز-وزدەرىنە كەلگەن يسپاندار شابۋىل دەلبەسىنە قول سوزا باستادى. تايمنىڭ العاشقى شيرەگىنەن كەيىن ولار الاڭ ۇستىندە ۇستەمدىك ەتۋگە كىرىستى. مۇنىڭ سوڭى بىرنەشە بۇرىشتاما دوبىن بەرۋگە ۇلاستى. سول شابۋىلدىڭ شىرقاۋىندا پەتر چەحقا بىرنەشە رەت ءوز قاقپاسىن جوپەلدەمەدەن كەلگەن جۇيرىك دوپ­تاردان ساقتاپ قالۋعا تۋرا كەلدى. سونداي قاۋىپتى سوققىنىڭ ءبىرىن 29-مينۋتتا الۆارو موراتا جاسادى. ءبىر كەزدە «حالىق كومانداسى» قاقپاشىسىنىڭ ءسال العا شىعىپ كەتكەنىن بايقاعان اندرەس ينەستا الىستان دوپ جونەلتىپ تە كوردى. ال تايم بىتۋگە ساناۋلى ۋاقىت قالعاندا, چەح تاعى ەكى رەت سوققى الدىنا توسقاۋىل بولىپ تۇرا قالدى. ونىڭ كوماندالاستارى تەك سوڭعى 45-مينۋتتا توماش نەتسيدتىڭ كۇش سالۋىمەن ءبىر رەت قانا قارسى قاقپا جاققا قاۋىپ ءتوندىردى. ويىننىڭ ەكىنشى بولىگى دە يسپانداردىڭ ايقىن باسىم­دىلىعىمەن ءوتتى. الايدا, چەحتار مۇنداي قىسىمنىڭ بولاتىنىن الدىن الا بىلگەندەي, وعان وتە جاقسى دايىندالىپ كەلگەن بولىپ شىقتى. ولار قورعانىستا مۇقيات تا سەنىمدى وينادى. ەگەر 87-مينۋتتا اندرەس ينەستانىڭ پاسىنان جەرار پيكە گول سالىپ كەتپەگەندە, ماتچتىڭ تەڭ اياقتالاتىنى انىق ەدى. ال 93-مينۋتتا چەح ۆلاديمير داريدانىڭ سوققىسىن گولكيپەر داۆيد دە حەا وتە شەبەرلىكپەن قايتارىپ, قاقپاسىن انىق گولدان قورعاي ءبىلدى. بۇل يسپانداردىڭ ءتۋرنيردى جەڭىسپەن باستاۋىنا جول اشىپ بەردى. بۇعان قاراعاندا, يرلانديا – شۆەتسيا كەزدەسۋىنىڭ الدىن الا جارناماسى ونشالىقتى كۇشتى بولا قويعان جوق. سوعان قاراماستان, ەكى كوماندا دا وتە ءبىر ادەمى ويىن كورسەتتى. قارسىلاستار ءبىرىنشى تايمدى ءبىر قالىپتى قارقىندا وتكىزدى. وسى كەزەڭدە دجەفف حەندريك پەن زلاتان يبرايموۆيچ ءبىر-ءبىر رەتتەن قاۋىپ ءتوندىرىپ وتۋلەرىمەن ەستە قالدى. بۇلاردىڭ ءبىرىنشىسىنىڭ سوققىسىن شۆەد قاقپاشىسى اندرەاس يساكسسون تىزگىندەي بىلسە, ەكىنشىسى دوپتى قارسى الدىنان تۇرعان «قورعانعا» توپ ەتكىزۋمەن توقتادى. ال ءبىرىنشى تايمدا گول سوعۋدىڭ ناعىز قولايلى مەزەتىن يرلاند فورۆاردى شەين لونگ جىبەرىپ الدى. ونىڭ ورتا قاشىقتىقتان شىڭىلداتا جونەلتكەن دوبى قاقپا ماڭدايشاسىنان كەرى قايتتى. ءبىرىنشى تايمدا بەلسەندىلىگى ءسال جوعارى بولعان يرلانديا قۇراماسى ەسەپ اشۋدا دا الدا تۇردى. كوماندا مۇنى ماتچتىڭ كەلەسى بولىگى باس­تالعان شاقتا جاسادى. 48-مينۋتتا شيمۋس كوۋلمەننىڭ بەرگەن دوبىن زەڭبىرەكتىڭ وعىنداي زىرلاتا تەۋىپ, قاقپا تورىنان ءبىر-اق شىعارعان ۋەس حۋلاحان سوڭىندا ماتچتىڭ قاھارمانى دا اتاندى. نەگىزىنەن, يرلانديالىقتاردىڭ بارلىق شابۋىلدارى وسى ويىنشىنىڭ ارالاسۋى­مەن ۇيىمداستىرىلىپ جاتتى. ول بۇل جاعىنان يسپان قۇراماسىنداعى اندرەس ينەستانىڭ ءرولىن جاقسى اتقاردى. شۆەدتەر ەسەپتى 71-مينۋتتا يرلاند كيران كلاركتىڭ قاقپا الدىنا كولبەي بەرىلگەن دوپتى باسىمەن ءوز قاقپاسىنا سۇڭگىتىپ جىبەرۋىمەن تەڭەستىردى. تەك وسىدان كەيىن عانا سكانديناۆتار ءدۇر سىلكىنىپ, العا قاراي جوڭكىلە شابۋعا كوشتى. بىراق بۇل كەزدە الاڭداعى احۋالدى كۇرت وزگەرتىپ جىبەرەتىندەي كۇش ولاردا قالماعان دا ەدى. ءبىراز جۇرت قازىرگى كۇندەرى فيفا رەيتينگىسىندە ەكىنشى بولىپ تۇرعان بەلگيانىڭ 12-ورىنداعى يتاليادان ۇتىلىپ قالۋىن سەنساتسياعا ساناماسا دا, ءتۋرنيردىڭ باستى وكىنىشى رەتىندە باعالاپ جاتىر. ال ويىننىڭ ءجۇرۋ بارىسى مەن ونىڭ مازمۇنى «قىزىل پەرىلەردىڭ» بەكەردەن-بەكەر جەڭىلە سالماعانىن كورسەتتى. بۇعان بۇكىل ويىن بويىنا تىزگىننىڭ يتاليالىقتار قولىندا بولعانى دا ايعاق. ولاردىڭ باسىمدىلىعىن 32-مينۋتتا ەمانۋەلە دجاككەريني ءبىرىنشى گولعا اينالدىرا بىلسە, 93-مينۋتتا گراتسيانو پەللە سوڭعى نۇكتەنى قويىپ بەردى. كەشە تۇندە 1-تۋردىڭ ەڭ سوڭعى ەكى ويىنى وينالدى. سەرىك ءپىرنازار, «ەگەمەن قازاقستان»