رامازان ايىندا ورازا تۇتىپ, اۋىزدارىن بەكىتكەن مۇمىندەر ءۇشىن سارىدە (سۋحۋر) نەندەي اۋقات ءىشىپ, اۋىزاشاردا (يفتار) نەمەن جۇرەك جالعاۋ كەرەكتەگى جونىندە اقىل-كەڭەس بەرىپ جاتقان سايتتار دا از ەمەس. سولاردىڭ ءبىرى – «يسلام.رۋ» ورازا كەزىندە اسا قاتتى قينالماۋ ءۇشىن كەرەك بولاتىن ءوز نۇسقالارىن ۇسىنادى.
پورتال العا تارتىپ وتىرعان 6 سۋسىندى دا ءبىزدىڭ جاعدايىمىزدا جاساۋعا بولادى ەكەن. ەندى سولارعا نازار اۋدارىپ كورىڭىزدەر.
- قالماق شايى نەمەسە ۇيعىردىڭ «اتكەن شايى»
داعىستان جەرىندە تۇراتىن مۇسىلمان ايەلدەر سول جاقتا «قالماق شايى» اتانىپ جۇرگەن, ءبىزدىڭ جاقتا «اتكەن شاي» دەلىنەتىن شايدى سارىدە ءىشىپ العاننىڭ پايداسى كوپ ەكەنىن جەتكىزەدى. ال شايدىڭ قۇرامى شىنىندا باي. ول ءسۇت پەن سارى ماي قوسىلىپ, كوك شاي جاپىراعىنان دايىندالادى. بۇلارعا ازداعان تۇز سەبىلەدى. وسىلاي ازىرلەنگەن سۋسىن ادامنىڭ قارنىن توق ەتىپ تۇرادى, قانداعى قانت قۇرامىن جاقسى رەتتەيدى, ورگانيزمنىڭ قورعانىس فۋنكتسياسىن كۇشەيتەدى. وسى شايعا جاقسىلاپ قانىپ العان ادامنىڭ اعزاسى كەشكە دەيىن ءشولدىڭ ەكپىنىن باسا الادى. بۇعان تاۋلى ايماق تۇرعىندارى تالاي جىلداردان بەرى كوز جەتكىزىپ كەلەدى.
- ۇيىتىلعان ايران
قولدان ۇيىتىلعان قۇنارلى ايران كوپكە دەيىن قارىندى دا اشىرمايدى, شولگە دە توتەپ بەرۋگە كومەكتەسەدى. سەبەبى, ونىڭ قۇرامىندا ميكروەلەمەنتتەر, اعۋىزدار مەن دارۋىشتەر كوپ. ايران اس قورىتۋ جۇيەسىنىڭ جاقسى جۇمىس جاساۋىنا دا جاعداي جاسايدى. ورازا كەزىندە مۇنىڭ ماڭىزى دا زور. ءۇي جاعدايىندا ايراندى قالاي دايىنداۋ كەرەك ەكەنىن ءبىز ايتىپ جاتپايمىز. ونى ۇيىتىپ جۇرگەندەر مۇنى ءبىزسىز دە جاقسى بىلەدى. جانە ءار ايەلدىڭ ءوز ءتاسىلى بولۋى دا مۇمكىن.
- ءسۇت قوسىلعان بانان كوكتەيلى
ۇسىنۋشىلاردىڭ ايتۋلارىنشا, بۇل - ءشول مەن اشتىقتى بىردەن قايتاراتىن وتە كەرەكتى سۋسىن. ەر كىسىلەر مەن بالالارعا بىردەي سۇيىكتى بولىپ تابىلاتىن بالمۇزداقتان, سۇتتەن, شىرىننان جانە جەمىستەن جاسالعان سۋسىن ادامعا ءوزىنىڭ پايدالى دارۋىشتەرىمەن قاتار, وتە جاقسى كوڭىل كۇي دە اكەلەدى. دەگەنمەن, سارىلىك ءۇشىن سۋسىن دايىنداپ جاتقان كەزدە ءتاتتى نارسەنىڭ ءشول شاقىراتىنىن ۇمىتپاعان ابزال. سوندىقتان وعان قويىلاتىن سۋسىننىڭ قۇرامىندا ۇيىتىلعان ءتاتتى ءسۇت (سگۋششەنكا), توساپ سەكىلدى ءتاتتى تاعامداردىڭ بولماۋىن قاداعالاۋ كەرەك. مۇنىڭ ورنىنا بالمۇزداق, بانان, اپەلسين شىرىنى سەكىلدى سۋسىنداردى الىپ, سالقىنداتىپ قويساڭىزدار, سول سەنىمدەرىڭىزدى اقتايدى.
- رايحان ءشارباتى
بۇل – وزگەشە سۋسىن. بىراق ونى ءىشىپ كورگەن ادام ءشولدى كەز كەلگەن كومپوت پەن شىرىنعا قاراعاندا اناعۇرلىم ارتىق باساتىنىن بىردەن بايقايدى. ال مۇنداي عاجايىپ سۋسىندى ازىرلەۋ ءۇشىن ءبىر بۋما بازيليك ۇستىنە 1,5 ليتر قايناعان سۋ قۇيىلادى دا, 2 شاي قاسىق قانت قوسىلادى. سوسىن ءبىر ليموندى بىرنەشە تىلىككە ءبولىپ سالادى. وسىدان كەيىن-اق سۋسىن ءسىزدىڭ كوز الدىڭىزدا ءوزىنىڭ ءتۇسىن وزگەرتىپ, جايناپ سالا بەرەدى. كەيىن سالقىنداعان كەزىندە توڭازىتقىشتا 2-3 كۇن ۇستاۋلارىڭىز كەرەك.
- «شولگە قارسى كۇرەس» كوكتەيلى
ەگەر كۇننىڭ ىستىقتىعى سىناپ باعاناسىنان 30 ولشەمنەن جوعارى كوتەرىلىپ كەتەتىن بولسا, مۇنداي كۇندەرى سارىگە تاپ وسىنداي كوكتەيل دايىنداعاننان ارتىعى جوق. ونى دايىنداۋ دا وڭاي: ستاكانداعى سۋعا ليموننىڭ جارتى, اپەلسيننىڭ جارتى شىرىنىن سىعىپ قۇيىڭىز دا, وعان ازداعان تۇز قوسىڭىز. سوسىن سالقىنداتىپ الۋ كەرەك. وسى قاراپايىم عانا كومپونەنتتەر مەزگىلدىڭ ەڭ ىستىق كەزىنىڭ وزىندە ءسىزدى اسا قاتتى شولدەتپەي ۇستاپ تۇرا الادى. بىراق اسقازان-ىشەك جولدارىندا سىرقاتى بار جانداردىڭ مۇنداي سۋسىندى ىشپەگەنى دۇرىس.
- بال قوسىلعان سۋ
ەمدىك قاسيەتى بار, اعزانى ازىقتاندىرۋعا ۇلەس قوساتىن, جۇمساق, ءدامدى بۇل سۋسىننىڭ پايدالى جاقتارى وتە كوپ. بال قوسىلعان سۋدى ءىشۋ اللا ەلشىسىنىڭ سۋنناسى. ول ءۇي جىلىلىعىنا جاقىن سۋدا ەرىتىلىپ جاسالادى. وعان ءبىر قاسىق تابيعي الما سىركە سۋىن قوسۋ كەرەك. وسى قاراپايىم سۋسىندا سارىدە ءىشۋ ادامدى كوپتەگەن ارۋ-سىرقاۋدان ساقتاپ, قوسىمشا قۋات بەرەدى. ونىڭ ورازا كەزىندەگى پايداسى زور بولماق.
مىنە, ءبىزدىڭ تاپقان كەزەكتى كەڭەسىمىز وسى بولدى. مۇمكىندىك بولىپ جاتسا, پايدالانىپ كورگەننەن زيان شەكپەيتىندەرىڭىز انىق.
تالعات رايىمبەك.
مانبە, فوتو:
islam.ru.
