انادولىداعى بيىلعى دەمالىس ماۋسىمىنىڭ ەرەكشەلىگى قانداي؟
«ەگەمەن قازاقستان» گازەتىنىڭ تۇركياداعى مەنشىكتى ءتىلشىسى بولىپ البينا ءاشىم جۇمىسقا كىرىستى. ول بۇعان دەيىن «قازاقستان» تەلەراديو كورپوراتسياسىنىڭ سولتۇستىك قازاقستان فيليالىندا, «7 تەلەارنادا», «قازاقستان» ۇلتتىق ارناسىندا قىزمەت ەتكەن.
تۇركيا... تەڭىز... تۋريزم...تەراكت... سوڭعى ءسوز الدىڭعى ءۇش ۇعىمنىڭ ۇيلەسىمدى سيپاتىنا مۇلدە كىرىگە قويمايدى. كەيىنگى ۋاقىتتا «تۇركيا» دەگەندە انتالياداعى «بەس جۇلدىزدى» دەمالىس ورىندارىنان بۇرىن جۇرتشىلىقتى الاڭداتقان ءتۇرلى توسىن جاعدايلار ويعا كوبىرەك ورالاتىن بولدى. انادولى ەلىنىڭ قاۋىپسىزدىگىنە كولەڭكە ءتۇسىرگەن تەررورلىق ارەكەتتەر سوڭعى ءبىر جىلدا ءجيىلەپ كەتتى. الەمدى دۇرلىكتىرىپ, تۇرىك حالقىنىڭ ۇرەيىن قاشىرعان انكارا مەن ىستانبۇلداعى جارىلىستار بەيبىت تۇرعىنداردىڭ مازاسىن الدى.
تۇركيا استاناسىنىڭ ءدال تورىندە جارتى جىلدا ءۇش رەت وسىنداي ارەكەت جاسالسا, ىستانبۇلدا تۋريستەردىڭ مەكەنىنە اينالعان ايگىلى سۇلتاناحمەت مەشىتىنىڭ جانىندا تەرروريستەر تەرىس پيعىلدارىن ىسكە اسىردى. بۇل ءىرى توتەنشە جاعدايلار ءتىزبەگى عانا. تەلەديدارعا تەلمىرىپ, جاڭالىقتاردان جاعىمدى حابار كۇتەتىن تۇرىك باۋىرلارىمىزدى تولاستاپ بارىپ, قايتا باس كوتەرەتىن تەراكتىلەر ابدەن ابىگەرگە سالدى. كۇنى كەشە عانا ىستانبۇل مەن ماردين قالالارىندا تاعى جارىلىس بولدى... وتكەن جىلدىڭ شىلدە ايىنان باستاپ جاۋىزداردىڭ قولىنان كوپتەگەن جازىقسىز ادام قازا تاپتى.
«قارا بۇلتتاي تۇنەرگەن تەرروردى تۇركيا تۇبىمەن قۇرتۋعا قاۋقارلى». ەل پرەزيدەنتى رەدجەپ تايىپ ەردوعان وسىلاي دەيدى. ەسەڭگىرەگەن حالىق ەسىن جيىپ, تىرشىلىگىن جاساۋعا ءتيىس. انادولى ابىرويىن ايرانداي توككەن سودىرلاردىڭ سازايىن بەرىپ, تورتكۇل دۇنيەنىڭ تۇركياعا دەگەن سەنىمىن قايتا وياتقانى ءجون.
تۇركياداعى تەراكتىلەر تۋريستەردىڭ دە بەرەكەسىن كەتىرگەنى انىق. ەلدىڭ مادەنيەت جانە تۋريزم مينيسترلىگى بىلتىرعى ساۋىرمەن سالىستىرعاندا بيىل شەتەلدىك مەيمان سانى 28,1 پايىزعا ازايعانىن ايتادى. بۇل – 1999 جىلدان بەرگى ەڭ تومەن كورسەتكىش. سوندىقتان, تۇركيا تۋريزمدەگى توقىراۋدان شىعۋ ءۇشىن ءتۇرلى امال-ءتاسىل جاساپ جاتىر. انادولىداعى اعايىن تەڭىز جاعالاۋىنداعى دەمالىستان بولەك, بالامالى ءتۋريزمدى دامىتۋعا كىرىستى. ياعني, مەديتسينالىق, ەكسترەمالدى سپورت ءتۋريزمىن جانداندىرماقشى.
تاعى ءبىر باعىت – كينويندۋستريا سالاسى ارقىلى ەلگە مەيمان تارتۋ. تۇرىك تەلەحيكايالارى كەيىپكەرلەرىنىڭ قازاقستاندا اسا تانىمال ەكەنى جاسىرىن ەمەس. تۇركىتىلدەس ەلدەردە عانا ەمەس, دۇنيەجۇزىندە ۇلكەن سۇرانىسقا يە بولىپ وتىرعان فيلمدەر پاك سەزىمگە تولى ماحاببات حيكايالارىن كورسەتىپ قانا قويمايدى. بۇل – ءبىر جاعىنان, انادولى ەلىنە جاسالعان جارناما. ادەتتە مۇنداي تەلەحيكايالاردا تۇركيانىڭ ەڭ كورىكتى جەرلەرى, مادەنيەتى مەن ادەت-عۇرپى, حالىقتىڭ قوناقجايلىلىعى, كوزدىڭ جاۋىن الاتىن قىزىلدى-جاسىلدى ۇلتتىق بۇيىمدارى, ءتىل ۇيىرەتىن ءدامدى تاعامدارى تانىستىرىلادى. كوركەم فيلمدەگى عاجايىپتار الەمىن كوزبەن كورگىسى كەلەتىندەر كوپ كورىنەدى. تۋريستىك فيرمالاردىڭ وكىلدەرى ىستانبۇلعا تەلەحيكايا ءىزىمەن كەلىپ, تانىمال فيلمدەر ءتۇسىرىلگەن جەرلەرگە ساياحات جاساۋشىلاردىڭ از ەمەس ەكەنىن ايتادى. وسى تاجىريبەنى تۋريستىك اگەنتتىكتەر بيىل انتالياعا دا قولدانباقشى.
جەرورتا تەڭىزى جاعالاۋىندا جاقىندا جاڭا تاعى ءبىر تەلەحيكايا ءتۇسىرىلدى. تۇرىكتەر مەن ارابتاردىڭ جاراسىمدى شاڭىراق استىنداعى ءومىرى بەينەلەنگەن تەلەحيكايا اراب ەلدەرىنەن تۋريستەردى تارتۋعا باعىتتالعان. تۇركياعا ەڭ كوپ كەلەتىن رەسەيلىكتەردىڭ سانى بيىل كۇرت تومەندەگەندىكتەن, ولاردىڭ ورنىن تۋريستىك فيرمالار وسىلايشا تولتىرماقشى.
تەررورعا دا, توقىراۋعا دا تىزە بۇكپەگەن تۇرىك حالقى بىرلىگىن بەكەم ۇستاپ, تىرلىگىن لايىقتى جالعاستىرىپ كەلەدى. «قارا جامىلعان كۇندەر ارتتا قالىپ, ءاردايىم تىنىشتىق ورناسىن» دەگەن اق ارمان انادولى جۇرتىن ۇنەمى العا جەتەلەيدى. اشىق اسپان استىندا اعايىنعا قۇشاعىن جايىپ: «قوش كەلدىڭىز, تۇركياعا!» دەپ, قوناق كۇتىپ, دۋمان جاساۋ – كوزى اشىق, كوكىرەگى وياۋ ءاربىر تۇرىكتىڭ ماقسات-مۇراتى...
البينا ءاشىم,
«ەگەمەن قازاقستان» – انكارادان
