تىنىستى تارىلتىپ, قوس وكپەنى قىسپاسا ەكەن...

استانامىز جىل ساناپ كوركەيىپ كەلەدى. قۇرىلىس ەندى ەسىلدىڭ وڭ جاعالاۋىندا مولىراق جۇرگىزىلمەكشى. دۇرىس-اق. جەر كەڭ عوي, قالانىڭ اۋماعى سوزىلىپ, وسىرىلە بەرسىن. بىراق ولاي بولماي ما دەگەن كۇمان دە كوكەيدەن كەتپەي ءجۇر. ءبىزدىڭ «ەگەمەن قازاق­ستان» گازەتىنىڭ كەڭسەسى ور­نالاسقان اۋدانداعى كەنە­سارى, سەمبينوۆ, اباي كو­شەلەرىنىڭ بويىنداعى حرۋ­ششەۆ زامانىندا تۇرعى­زىلعان 2 قاباتتى ۇيلەر بۇزىلىپ, قازىر ورىندارى بوساپ جاتىر. جەر كەڭىپ, تىنىسىمىز اشىلىپ قالدى. ەندى سول جەرلەرگە اعاشتار ەگىلىپ, گۇلزارلار وتىرعىزىلىپ, ادامدار دەمالاتىن ورىندار جاسالسا, ءتىپتى, ورىندى بولار ەدى. سپورتتىق الاڭدار جاساقتالىپ, جۇمىستان شارشاپ شىققاندا بوي جازاتىن جاعدايلار جاسالسا, ءوزىمىزدى الەمنىڭ دامىعان 30 ەلى تۇرعىندارىنىڭ بىرىندەي سەزىنەر ەدىك. الايدا, وسى اۋداندا سالىنعان بىرنەشە ءۇي تۇرعىندارىنىڭ كوڭىلى كۇپتى. ويتكەنى, ەكى قابات ۇيلەردەن بوساعان جەرلەردى اكىمدىك كاسىپكەرلەرگە ساتىپ, ال ولار 16-18 قاباتتى قوراپتار تۇرعىزىپ, ادام مەن ماشينا سانىن قۇ­مىرس­قانىڭ يلەۋىندەي قۇ­جىناتىپ جىبەرمەس پە ەكەن دەگەن كۇدىك ۇنەمى كۇش الۋدا. كوممۋنيكاتسياسى جەتىلگەن, ينفراقۇرىلىمى بار بۇل جەرلەردەن بيىك ۇيلەر تۇر­عىزۋ وڭاي. قۇ­رىلىسى قىم­باتقا ءتۇس­پەيدى. سون­دىقتان, ءبىر-بىرىنە جال­عاستىرىپ, بيىك ۇيلەردى قاپ­تاتسا... تى­نىسىڭ تارىلىپ, وكپەڭ قى­سىلعاننىڭ كوكەسى سوندا بولادى. وسىدان قورقامىز. الەۋمەتتىك باعدارلى ەكونوميكا جاسايمىز دەگەن سەرتىمىز بار ەدى, ۇكىمەت سونى ۇمىتا قويعان جوق شىعار. اۋەلى حالىقتىڭ قامىن ويلاپ, قانداي جولمەن بولسا دا اقشانى كۇرەپ تاپقىسى كەلەتىندەردىڭ ادىمىن اشتىرا قويماس دەگەن ءۇمىتىمىز دە جوق ەمەس... جاقسىباي سامرات, «ەگەمەن قازاقستان» استانا