بۇگىنگى كۇندە بۇكىل الەم بەرىكتىكتى سىناۋدى باستان كەشىرۋدە. ادامداردا بەيبىت قاتار ءومىر ءسۇرۋ مەن ادامگەرشىلىكتىڭ رۋحاني ىرگەتاسىنىڭ السىرەۋىنىڭ سەبەبىنەن جەر شارىنىڭ جەكەلەگەن ايماقتارىندا قاقتىعىستار شيەلەنىستى. جالعان ءدىني ۇراندارمەن بۇركەمەلەنگەن ەكسترەميزم مەن تەرروريزم بۇكىل ادامزاتتىڭ قاۋىپسىزدىگىنە قاۋىپ توندىرۋدە.
قازاقستان دا وتكەن جەكسەنبىدە اقتوبە قالاسىندا ادام ولىمىنە اكەلگەن سوراقى سيپاتتاعى زورلىق اكتىلەرىمەن بايلانىستى وقيعانى باسىنان كەشىردى. وسى ز ۇلىمدىقتى جاساعان لاڭكەسشىلەر ەڭ باستى نارسەدەن قاتە جىبەردى – قازاقستان حالقىن لاڭكەستىكتىڭ ەشقانداي تۇرىمەن قورقىتا المايدى. بۇنداي ارەكەتتىڭ مۇسىلماندار ءۇشىن قاسيەتتى رامازان ايىنىڭ قارساڭىندا ورىن العانى ونىڭ زىمياندىعىن كورسەتەدى.
ادامگەرشىلىككە جات بۇل ارەكەت عاسىرلار بويى بەيبىت جانە تاتۋ كورشىلىكتە ءومىر ءسۇرىپ كەلە جاتقان ءتۇرلى ەتنوستار مەن مادەنيەت جانە ءدىن وكىلدەرىنەن تۇراتىن قازاقستان حالقىن ودان سايىن بىرىكتىرە ءتۇستى. ءبىزدىڭ ەلىمىزدىڭ تاريحى ءبىزدىڭ قاسيەتتى جەرىمىزدە عاسىرلار بويى قازاقستاندى تۋعان ءۇيى سانايتىن يسلام, پراۆوسلاۆيە, كاتوليك جانە يۋدايزم وكىلدەرى قاتار ءومىر ءسۇرىپ, ەڭبەك ەتىپ وتىرعانىن دالەلدەيدى.
قازاقستان پرەزيدەنتى ن.ءا.نازارباەۆ ءوزىنىڭ قازاقستان حالقىنا جولداۋىندا: «ءوزىمىزدىڭ ىنتىماعىمىز بەن بىرلىگىمىزدىڭ ارقاسىندا ءبىز كوپتەگەن جەتىستىكتەرگە قول جەتكىزدىك. قوعامداعى بىرلىك پەن ەلدەگى تۇراقتىلىق بولمايىنشا ءبىزدىڭ بولاشاق دامۋىمىز, بارلىق ويعا العاندارىمىزدى جۇزەگە اسىرۋ مۇمكىن ەمەس. سوندىقتان ۇلتارالىق كەلىسىمدى قامتاماسىز ەتۋ ساياساتى ماڭىزدى باسىمدىققا يە بولىپ قالا بەرەدى», – دەۋى وسىنى اڭعارتادى.
ەلباسىمىز حالىقارالىق قاۋىمداستىققا «الەم. XXI عاسىر» مانيفەسىن جاريالاي وتىرىپ, «سوعىسسىز الەم» ورتاق باعدارلاماسى شەڭبەرىندە الەم ەلدەرىن قازىرگى تاڭداعى زاماناۋي داعدارىستى ەڭسەرۋ جولىندا كۇش-جىگەرىن بىرىكتىرۋگە شاقىردى.
ادام – جاراتۋشىنىڭ عاجاپ جاراتىلىسى. الەمدىك جانە ءداستۇرلى دىندەردىڭ نەگىزگى وسيەتتەرىنىڭ ءبىرى كىسى ولتىرۋگە تىيىم سالۋ بولىپ تابىلادى. تەرروريستەر مەن ەكسترەميستەردىڭ قانداي دا ءدىني ماتىندەردى پايدالانىپ, قانداي دا جوعارى بەدەلدى تۇلعالاردىڭ اتتارىن جامىلعانىمەن, ولاردىڭ ءىس-ارەكەتتەرىنەن ءوز اينالاسىنا قايعى-قاسىرەت, ازاپ جانە كۇيزەلىس تاراتۋ ارقىلى ز ۇلىمدىققا قىزمەت ەتەتىندەرىن كورۋگە بولادى.
وسىعان بايلانىستى ءبىز, قازاقستاننىڭ جەتەكشى ءدىني بىرلەستىكتەرىنىڭ باسشىلارى مەن وكىلدەرى, قازاقستان رەسپۋبليكاسى پرەزيدەنتىنىڭ الەمدەگى بەيبىتشىلىكتى ساقتاۋعا باعىتتالعان باستامالارىنا تولىعىمەن قولداۋ بىلدىرەمىز.
ءبىز اقتوبەدە ورىن العان قىلمىستىق ارەكەتتەردى ءۇزىلدى-كەسىلدى ايىپتايمىز, سونداي-اق, ەكسترەميزم مەن تەرروريزمنىڭ كەز كەلگەن كورىنىستەرى مەن ءتۇرلەرىن ءۇزىلدى-كەسىلدى قابىلدامايمىز, زورلىق-زومبىلىقتىڭ كەز كەلگەن ءتۇرىن ءدىني تۇرعىدان اقتاۋ ارەكەتتەرىن ايىپتايمىز.
ءدىن مەن ەكسترەميزمنىڭ ۇيلەسپەيتىنىن مالىمدەيمىز, جازىقسىز ادامداردىڭ ولىمىنە اكەپ سوعاتىن الەمنىڭ ءتۇرلى ايماقتارىندا ورىن الىپ جاتقان قاتىگەز تەرروريستىك ارەكەتتەرگە ۇلكەن الاڭداتۋشىلىق بىلدىرەمىز.
ءبىز بارلىق وتانداستارىمىزعا: ءبىزدىڭ ورتاق قۇندىلىقتارىمىزعا قارسى شىققان جانە الەمنىڭ تۇراقتى دامۋىنا قارسى باعىتتالعان ەكسترەميزم مەن تەرروريزم يدەولوگياسىنا قارسى تۇرۋعا, بارلىق ادامزاتتىڭ قاۋىپسىزدىگىنىڭ نەگىزى ادامداردىڭ بەيبىت ءومىر ءسۇرۋ بولىپ تابىلاتىندىقتان, قوعامدىق تۇراقتىلىقتى ساقتاۋعا ىقپال ەتۋگە, ءوز كۇشىمىزدى قازاقستاننىڭ ءوسىپ-وركەندەۋى جولىنداعى جاسامپاز ەڭبەك پەن ادامگەرشىلىك مۇراتتاردى ىلگەرىلەتۋگە جۇمىلدىرۋ ارقىلى ەتنوسارالىق جانە كونفەسسياارالىق كەلىسىمدى ودان ءارى نىعايتۋعا جاعداي جاساۋعا ۇندەۋ جاريالايمىز.
قازاقستان مۇسىلماندارى ءدىني باسقارماسىنىڭ باسشىسى, باس ءمۇفتي ە.مايامەروۆ قازاقستان رەسپۋبليكاسىنداعى ورىس پراۆوسلاۆ شىركەۋىنىڭ باسشىسى, استانا جانە قازاقستان ءميتروپوليتى الەكساندر استاناداعى قاسيەتتى ءماريام ارحيەپارحياسىنىڭ ارحيەپيسكوپى توماش پەتا قازاقستاننىڭ باس ءراۆۆينى ە.كوگەن
