كەشە باس پروكۋراتۋرادا «شىمكەنت پيۆو» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى توقتار تولەشوۆكە قاتىستى قىلمىستىق ءىستىڭ تەرگەلۋ بارىسى تۋرالى بريفينگ ءوتتى. وعان باس پروكۋراتۋرانىڭ دەپارتامەنت باستىعى قۇسايىن يگەمباەۆ پەن ۇلتتىق قاۋىپسىزدىك كوميتەتى ءباسپاسوز قىزمەتىنىڭ وكىلى رۋسلان كاراسەۆ قاتىستى. گازەتىمىزدىڭ 3-بەتىندە ولاردىڭ سويلەگەن سوزدەرىنىڭ تولىق ءماتىنى بەرىلىپ وتىر.
قۇسايىن يگەمباەۆ,
باس پروكۋراتۋرانىڭ
دەپارتامەنت باستىعى:
بۇدان بۇرىن حابارلانعانداي, ارنايى پروكۋروردىڭ باسشىلىعىمەن ۆەدومستۆوارالىق ارنايى تەرگەۋ توبى ترانسۇلتتىق قىلمىستىق توپتى قارجىلاندىرۋ, ۇيىمداسقان قىلمىستىق توپتى باسقارۋ, زاڭسىز ەسىرتكى زاتتارىن ساقتاۋعا كۇدىكتى رەتىندە «شىمكەنت پيۆو» جشس باس ديرەكتورى توقتار تولەشەۆكە جانە ونىڭ اينالاسىنداعى بىرنەشە ادامعا قاتىستى قىلمىستىق ءىستەردى تەرگەۋدە.
كورسەتىلگەن ارەكەتتەرمەن قاتار, تولەشەۆكە اۋىر جانە اسا اۋىر قىلمىستار, سونىڭ ىشىندە ادام ۇرلاۋدى جانە ءولتىرۋدى ۇيىمداستىرۋ, ءتۇرلى دارەجەدەگى دەنە جاراقاتىن كەلتىرۋ, بوتەننىڭ مۇلكىن قاساقانا جويۋ, رەيدەرلىك ءتارىزدى قىلمىستار بويىنشا ايىپ تاعىلۋدا.
سونىمەن بىرگە, قازىرگى كەزدە تولەشەۆتىڭ جالپى قىلمىستىق قىلمىستارعا عانا ەمەس, سونىمەن قاتار كونستيتۋتسيالىق قۇرىلىمنىڭ نەگىزىنە قارسى قىلمىستارعا دا قاتىستىلىعى انىقتالدى.
قىلمىستىڭ بۇل بولىگىن تەرگەۋدى قۇزىرەتتىلىگى بويىنشا قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى ءجۇرگىزۋدە.
ۇلتتىق قاۋىپسىزدىك كوميتەتى قىزمەتكەرلەرى دەمالىس كۇندەرى استانا, الماتى جانە شىمكەنت قالالارىندا بەلگىلى كاسىپكەر ت.تولەشەۆتىڭ بىرقاتار جاقتاستارىن تۇتقىنداعانى بەلگىلى بولدى. بۇل جونىندە كەشە قازاقستان رەسپۋبليكاسى باس پروكۋراتۋراسىندا وتكەن بريفينگتە ۇلتتىق قاۋىپسىزدىك كوميتەتى ءباسپاسوز قىزمەتىنىڭ وكىلى رۋسلان كاراسەۆ مالىمدەدى.
كەلتىرىلگەن مالىمەتتەرگە قاراعاندا, تۇتقىندالعاندار قاتارىندا باس پروكۋروردىڭ بۇرىنعى ءبىرىنشى ورىنباسارى, كونستيتۋتسيالىق كەڭەستىڭ بۇرىنعى مۇشەسى, ەكىنشى سىنىپتى ادىلەت كەڭەسشىسى ءىلياس باقتىباەۆ, وڭتۇستىك قازاقستان وبلىسى ءىشكى ىستەر دەپارتامەنتىنىڭ بۇرىنعى باسشىسى, گەنەرال-مايور حيبراتۋللا دوسقاليەۆ, ءوڭتۇستىك قازاقستان وبلىسى ءىىد باستىعىنىڭ بۇرىنعى ءبىرىنشى ورىنباسارى, پوليتسيا پولكوۆنيگى ساكەن ايتبەكوۆ, قر قورعانىس مينيسترلىگى «وڭتۇستىك» ايماق باسشىلىعىنىڭ 35748 جانە 55652 اسكەري بولىمدەرىنىڭ كومانديرلەرى, پولكوۆنيكتەر بەكزات جۇمين جانە قايرات پەرنەباەۆ بار. ولار ۋاقىتشا تەرگەۋ يزولياتورىنا وتىرعىزىلعان. قازىرگى كەزدە تەرگەۋ امالدارى جۇرگىزىلۋدە.
ۇلتتىق قاۋىپسىزدىك كوميتەتى ءباسپاسوز قىزمەتىنىڭ وكىلى ر.كاراسەۆ بۇل رەتتە قاماۋعا الىنعان ءىرى كاسىپكەر توقتار تولەشەۆتىڭ ءوزى بيلىكتى كۇشپەن باسىپ الۋعا دايىندىق جۇمىستارىن ءجۇرگىزگەندىگىمەن دە ءبولىستى. «تولەشەۆتىڭ بۇرىن بيلىكتى كۇشپەن باسىپ الۋعا دايىندىق جۇمىستارىن جۇرگىزگەندىگى, ال وتكەن جىلدان بەرى بەلسەندى دە ناقتى ارەكەتتەرگە بارعاندىعى جونىندە تولىق مالىمەتتەر الىنعان. ونىڭ ارەكەت جوسپارىندا جەدەل ءىس-ارەكەتتەر وشاقتارىن قۇرۋ ارقىلى ەلدەگى جاعدايدى تۇراقسىزداندىرۋ, نارازىلىق اكتسيالارى مەن جاپپاي تارتىپسىزدىكتەردى ۇيىمداستىرۋ, سونىڭ اياسىندا بالاما ۇكىمەتتى قالىپتاستىرۋدى جوسپارلاۋ جانە ارەكەت ەتۋشى بيلىك قۇرىلىمىن وزگەرتۋ قاراستىرىلعان», – دەدى ۇلتتىق قاۋىپسىزدىك كوميتەتى ءباسپاسوز قىزمەتىنىڭ وكىلى. سونداي-اق, كاسىپكەر تولەشەۆ تاراپىنان اتىراۋ, استانا, الماتى, ورال جانە قىزىلوردا قالالارىندا «جەر رەفورماسى» بويىنشا نارازىلىق اكتسيالارى وتكەن جىلدىڭ جەلتوقسانىندا دايىندالىپ, قارجىلاندىرىلعاندىعى تۋرالى ناقتى دالەلدەر الىنعاندىعى دا بەلگىلى بولىپ وتىر.
ر.كاراسەۆ ءمالىم ەتكەندەي, نارازىلىق اكتسيالارى بۇدان دا ەرتەرەك وتكىزىلۋى ءتيىس بولىپتى. الايدا, تولەشەۆتىڭ تۇتقىندالۋىنا بايلانىستى بۇل قارسىلىق اكتسيالارىن وتكىزۋ ونى ۇيىمداستىرۋشىلار تاراپىنان كەيىنگە قالدىرىلعان. سولاردىڭ كەيبىرى قازىر ۇستالعان. ر.كاراسەۆتىڭ سوزىنە قاراعاندا, قازىرگى تاڭدا تەرگەۋ ورگاندارى تاراپىنان ەلىمىزدىڭ وزگە دە وڭىرلەرىندە ۇيىمداستىرىلعان نارازىلىق اكتسيالارىن قارجىلاندىرۋ فاكتىلەرى جان-جاقتى تەكسەرىلۋدە. بۇدان باسقا, تولەشەۆ تەرگەۋ يزولياتورىندا وتىرىپ, 2016 جىلدىڭ مامىرىندا وڭتۇستىك قازاقستان وبلىسى سارىاعاش قالاسىندا جاپپاي تارتىپسىزدىكتى ۇيىمداستىرۋعا ارەكەتتەنگەنى دە اتالماي قالمادى. ونى كاسىپكەر ەلدەگى جاعدايدى پايدالانىپ جۇزەگە اسىرماق بولىپتى. «ءوز جوسپارلارىن جۇزەگە اسىرۋ ماقساتىندا تولەشەۆ قۇقىق قورعاۋ ورگاندارىنىڭ بۇرىنعى جانە ارەكەت ەتۋشى جوعارى لاۋىزىمدى تۇلعالارىن, سونداي-اق ەلىمىزدىڭ قارۋلى كۇشتەرى بولىمدەرىنىڭ كەيبىر باسشىلارى قاتارىنان ماقساتتى تۇردە ءوزىنىڭ جاقتاستارىن ىزدەستىرگەن», دەدى ر.كاراسەۆ. ونىڭ ايتۋىنشا, تولەشەۆ ءوزىنىڭ قىلمىستىق ارەكەتتەرىن ىسكە اسىرۋ ماقساتىندا پايدالانۋعا جوسپارلانعان جاسىرىن ورىندارداعى ەداۋىر قارۋ-جاراق, وق-دارىلەر مەن جارىلعىش زاتتاردى ۇلتتىق قاۋىپسىزدىك ورگاندارى تاركىلەگەن.
ال تولەشەۆتىڭ ءوزى بىلتىر قاڭتار ايىندا شىمكەنت قالاسىندا كۇشتىك قۇرىلىمدار تاراپىنان جۇرگىزىلگەن ارنايى وپەراتسيا بارىسىندا تۇتقىندالعان-دى. سونىڭ بارىسىندا قارۋ سالىنعان بىرنەشە پاكەت تاركىلەنگەنى ءمالىم. بۇل رەتتە استانا قالاسى الماتى اۋدانىنىڭ №2 اۋداندىق سوتىندا ءبىرىنشى اقپاننان باستاپ تولەشەۆتى تۇتقىنداۋ تۋرالى سانكتسيا بەرىلگەندىگىن دە ايتا كەتكەن ورىندى. وعان قىلمىستىق ءىستىڭ 297-بابىنىڭ 3-تارماعى بويىنشا «ەسىرتكى قۇرالدارىن, پسيحوتروپتىق زاتتاردى جانە ولاردىڭ بالامالارىن زاڭسىز ساتۋ, ساقتاۋ, ساتىپ الۋ, قايتا وندەۋ جانە ءازىرلەۋ», 266-بابىنىڭ 3-ءبولىمى بويىنشا «قىلمىستىق توپتى قارجىلاندىرۋ, سونىمەن قاتار, م ۇلىكتى تاراتۋ, قارجىلاندىرۋ ارنالارىن ازىرلەۋ» بابى بويىنشا ايىپ تاعىلۋدا.
