ولگا رىپاكوۆا «گاۋھار ليگاسىن» جەڭىپ الدى

استانا. 6 ماۋسىم. قازاقستاندىق ولگا رىپاكوۆا بريتانيانىڭ بيرمينگەم قالاسىندا جەڭىل اتلەتيكادان وتكەن «گاۋھار ليگاسى» جارىسىنىڭ التىنشى كەزەڭىندە جەڭىمپاز اتاندى. بۇل تۋرالى egemen.kz ءتىلشىسى حابارلادى. ول ءۇش قارعىپ سەكىرۋدە جارىستىڭ باستى ءفاۆوريتى كولۋمبيالىق كاترين يبارگۋەننەن 5 سم ارتىق سەكىرىپ, باس جۇلدەنى جەڭىپ الدى. رىپاكوۆا 14 مەتر 61 سم-گە دەيىن سەكىرسە, يبارگۋەن 14 مەتر 56 سم ناتيجە كورسەتتى. جارىستا ۋكراينالىق ولگا سالادۋحا ءۇشىنشى ورىن الدى. ول 14 مەتر 40 سم-گە دەيىن سەكىردى. وسى سىندا رىپاكوۆا سوڭعى ءتورت جىلدا كولۋمبيالىق جەڭىلاتلەتتى جەڭگەن جالعىز سپورتشى بولدى. 2012 جىلدان بەرى اتالعان جارىستا ونىڭ الدىنا ەشكىم شىعا الماعان. ول جاقىندا ريم قالاسىندا وتكەن «گاۋھار ليگاسى» جارىسىنىڭ بەسىنشى كەزەڭىندە  كۇمىس جۇلدەگەر, شانحاي جانە دوحادا وتكەن باسەكەدە قولا مەداليست بولعان ەدى. قازىرگى كەزدە «گاۋھار ليگاسى» جارىسىندا ولگا رىپاكوۆا, كاترين يبارگۋەن, ولگا سالادۋحا مەن يامايكالىق شانيكا توماس جۇلدەلى ورىنداردان كورىنىپ كەلەدى. وسى تورتتىك وليمپيادادا ءبىر-بىرىنە باسەكەلەس بولاتىنى ءسوزسىز. رىپاكوۆانىڭ ءوزى التىنشى كەزەڭنىڭ جەڭىمپازى بولعاندا وسىنداي ناتيجەمەن تاعى دا وليمپيادا چەمپيونى اتانۋىم ابدەن مۇمكىن, دەدى. «گاۋھار ليگاسى» – بۇل جىل سايىن حالىقارالىق جەڭىل اتلەتيكا فەدەراتسيالارى قاۋىمداستىعىنىڭ ۇيىمداستىرۋىمەن وتەتىن كوممەرتسيالىق جارىس. ول 2010 جىلدان بەرى وتكىزىلىپ كەلەدى. جارىس جىل سايىن 14 رەت ۇيىمداستىرىلادى. ونى دەمەۋشىلەر تابىلىپ جاتسا, ءبىر قالا بىرنەشە رەت وتكىزۋى مۇمكىن. ال جالپى, ول دۇنيە ءجۇزىنىڭ ءار قالاسىندا وتەدى. بۇعان دەيىن «التىن ليگا» وتكىزىلگەن بولاتىن. داستان كەنجالين. دەرەك, فوتو: egemen.kz