قاراعاندى وبلىسىنىڭ بۇرىنعى اكىمى تۇرمەدەن بوساپ شىقتى

  قاراعاندى. 6 ماۋسىم. قاراعاندى وبلىسىنىڭ بۇرىنعى اكىمى باۋىرجان ابدىشەۆ مەرزىمىنەن بۇرىن تۇرمەدەن بوساپ شىقتى. بۇل تۋرالى egemen.kz ءتىلشىسى حابارلادى. باۋىرجان ابدىشەۆ ەكونوميكالىق قىلمىستار جاسالدى دەگەن ايىپپەن بەس جىلعا باس بوستاندىعىنان ايىرىلعان بولاتىن. وعان «زاڭدى كاسىپكەرلىك قىزمەتكە كەدەرگى كەلتىرگەن», «لاۋازىمدىق وكىلەتتىگىن اسىرا پايدالانعان» جانە «كاسىپكەرلىك قىزمەتكە زاڭسىز ارالاسقان» دەگەن ايىپتار تاعىلعان ەدى. الايدا, وبلىستىق سوتتىڭ اپپەلياتسيالىق القاسى بۇل ۇكىمدى جۇمسارتىپ, جازا مەرزىمىن ءۇش جىلعا دەيىن قىسقارتتى. سوتتالۋشى تۇزەۋ مەكەمەسىندە 1 جىل 7 اي 25 كۇن وتىرىپ شىقتى. تۇرمەدە ول سوتتالۋشىلارعا ارنالعان كونتسەرتتەردى ۇيىمداستىرۋعا ات سالىسىپتى. سونىمەن قاتار, الەۋمەتتىك-ەكونوميكالىق ساباقتار بويىنشا وقۋ ۇدەرىسىنە قاتىسىپ, سوتتالۋشىلاردىڭ ءبىلىم الۋىنا كومەكتەسكەن. باۋىرجان ابدىشەۆتىڭ وتەلمەگەن مەرزىمى – 1 جىل 3 اي 5 كۇن. قايرات ءابىلدينوۆ. دەرەك: egemen.kz. فوتو: qazaquni.kz.