اتىراۋدا يسپانيا ساياحاتشىسى جول اپاتىنا ءتۇستى

اتىراۋ. 5 ماۋسىم. اتىراۋ وبلىسىندا رەسەيگە باعىت العان يسپانيا ساياحاتشىلارىنىڭ ءبىرى جول اپاتىنا ۇشىرادى. بۇل تۋرالى azh.kz-كە سىلتەمە جاساعان egemen.kz ءتىلشىسى حابارلادى. يسپانيا ساياحاتشىلارى موتوتسيكلمەن اتىراۋ وبلىسى ارقىلى رەسەيدىڭ استراحان وبلىسىنا جەتۋدى كوزدەگەن. الايدا, يساتاي اۋدانىنداعى تۇششىقۇدىق اۋىلى تۇسىندا شەتەلدىك ساياحاتشىنىڭ ءبىرى الونسو كارلوس موتوتسيكلىمەن جول اپاتىنا تۇسكەن. كەشە تاڭەرتەڭ يساتاي اۋدانىنىڭ تۇرعىنى ەركەبۇلان عازەزوۆ جول بويىندا موتوتسيكلىمەن قۇلاپ جاتقان شەتەلدىكتى كورگەن. ول ونىمەن اعىلشىن تىلىندە سويلەسىپ, ءمان-جايعا قانىققان. ەركەبۇلاننىڭ شاقىرۋىمەن جەتكەن «جەدەل جاردەم» شەتەلدىك ساياحاتشىنى يساتاي اۋداندىق اۋرۋحاناسىنا جەتكىزگەن. دارىگەرلەر يسپاندىق ساياحاتشىنىڭ ءبىر اياعىنىڭ بالتىر سۇيەگى سىنعانىن, ورتا دارەجەلى جاراقات العانىن انىقتاپتى. قازىر شەتەلدىك ساياحاتشى وبلىستىق اۋرۋحاناعا جەتكىزىلدى. ونىڭ سەرىگى رەسەيگە جالعىز كەتكەنگە ۇقسايدى. جولداسبەك شوپەعۇل. دەرەك, فوتو: azh.kz.