اۋىر اتلەتيكا فەدەراتسياسى مالىمدەمە جاسادى

استانا. 4 ماۋسىم. قازاقستان اۋىر اتلەتيكا فەدەراتسياسى رەسپۋبليكا سپورتشىلارىنىڭ دوپينگ-تەكسەرىسىنە بايلانىستى مالىمدەمە جاسادى. بۇل تۋرالى sports.kz اقپارىنا سۇيەنگەن egemen.kz ءتىلشىسى حابارلادى. بۇگىنگى كۇنى قازاقستان ۇلتتىق وليمپيالىق كوميەتىنەن الىنعان مالىمەتكە قاراعاندا, 2008 جىلى بەيجىڭ جانە 2012 جىلى لوندون وليمپيالىق ويىندارىنا قاتىسقان قازاقستاندىق بەس سپورتشى «ب» دوپينگ-تەكسەرىسىنىڭ قوسىمشا زەرتتەۋلەرىنەن ءوتىپ جاتىر. «بۇقارالىق اقپارات قۇرالدارىندا ءبىزدىڭ سپورتشىلارىمىز تۋرالى جاريالانىپ جاتقان ءارتۇرلى اقپارلارعا قاتىستى مىنانى مالىمدەيمىز: حالىقارالىق اۋىر اتلەتيكا فەدەراتسياسىنان, حالىقارالىق وليمپيالىق كوميتەتتەن (حوك) قازاقستان اۋىر اتلەتيكا فەدەراتسياسى تاراپىنا ءبىزدىڭ سپورتشىلارىمىزدىڭ تارتىپتىك شارالارعا تارتىلعاندارىن, ديسكۆاليفيكاتسياعا ۇشىراعاندارىن, سپورتتىق جارىستاردان الاستاتىلعاندارىن بىلدىرەتىن الدەقانداي ءبىر مالىمەت كەلىپ تۇسكەن جوق», – دەلىنگەن مالىمدەمەدە. «قازاقستان اۋىر اتلەتيكا فەدەراتسياسى پروتسەسكە قاتىسۋشى تاراپ بولىپ تابىلمايدى. پروتسەسس تاراپى رەتىندە حالىقارالىق وليمپيالىق كوميتەت پەن قازاقستان ۇلتتىق وليمپيالىق كوميتەتى جۇمىس جاساۋدا. وسىعان بايلانىستى زەرتتەۋدىڭ ناتيجەلەرى جونىندەگى بارلىق اقپارات قازاقستان ۇلتتىق وليمپيالىق كوميتەتىنە كەلەدى», – دەلىنگەن ماتىندە بۇدان ءارى. مالىمدەمەدە قازىرگى تاڭدا قازاقستان اۋىر اتلەتيكا قۇراماسىنىڭ بەلگىلەنگەن كۇنتىزبەلىك جوسپارعا سايكەس, سپورتتىق-جاتتىعۋ جۇمىستارىن جالعاستىرىپ جاتقانى ايتىلادى. بۇل كۇندەرى قازاقستان رەسپۋبليكاسى ۇلتتىق وليمپيالىق كوميتەتىنىڭ وكىلدەرى لوزاننادا (شۆەيتساريا) ءجۇر. «بۇدان ارعى اقپارات پەن پروتسەستىڭ بۇگە-شىگەسى ولاردىڭ كەلىپ تۇسۋلەرىنە قاراي بەرىلىپ تۇرادى», – دەپ ءمالىم ەتەدى اۋىر اتلەتيكا فەدەراتسياسى. تالعات رايىمبەك. دەرەك, فوتو: sports.kz.