استانادا وقۋشىلار جاز بويى اۆتوبۋستاردا تەگىن جۇرەدى

استانا. 2 ماۋسىم. ەلوردادا 7-15 جاستاعى وقۋشىلار 1 ماۋسىم مەن 31 تامىز ارالىعىندا قالاىشىلىك قوعامدىق كولىكتەردە تەگىن جۇرەتىن بولدى. بۇل تۋرالى astana.gov.kz-كە سىلتەمە جاساعان egemen.kz ءتىلشىسى حابارلادى. وسى جىلدىڭ مامىر ايىنان باستاپ قالاداعى مەكتەپ وقۋشىلارىنا اتاۋلى كولىك كارتالارى بەرىلە باستادى. 7-15 جاستاعى بالالارعا اتالعان كارتالار وقۋ ورىندارىندا نەمەسە اتا-اناسىنىڭ قاتىسۋىمەن ASTRA PLAT كارتالارى ارنايى بەلگىلەنگەن ورىنداردا تەگىن تاراتىلدى. وسى ورايدا ايتا كەتەيىك, 2015 جىلى فوتوتىركەۋدەن وتپەگەن جانە كولىك كارتاسىن الماعان بالالار مامانداندىرىلعان ASTRA PLAT كاسسالارىنا بارۋى ءتيىس. مامانداندىرىلعان كاسسالار مەن كارتالاردى بەرۋ پۋنكتتەرى ورنالاسقان ورىندار تۋرالى 20 ماۋسىمنان كەيىن قوسىمشا حابارلاناتىن بولادى. اتالعان ەلەكتروندى جولاقى تولەۋ جۇيەسىن قولدانىسقا ەنگىزۋگە بايلانىستى ۇيىمداستىرىلعان اكتسيا بالالاردىڭ كولىك كارتالارىن پايدالانۋ كەرەكتىگىن ۇيرەتەدى. ايتا كەتەيىك, 1 قىركۇيەكتەن باستاپ وقۋشىلار قوعامدىق كولىكتەردە 50 پايىز جەڭىلدىكپەن جۇرەتىن بولادى. ال اتاۋلى كولىك كارتالارىن الماعان بالالار قالالىق قوعامدىق كولىكتەرمەن وقۋ ورنىنان بەرىلگەن انىقتامانى كورسەتىپ, تەگىن جۇرە الادى. تالعات رايىمبەك. دەرەك, فوتو: astana.gov.kz.