الماتى. 2 ماۋسىم. الماتى قالاسىندا قازاق مەملەكەتتىك قىزدار پەداگوگيكالىق ۋنيۆەرسيتەتىندە اقىن ءارى جازۋشى ساۋلە دوسجانوۆامەن «كۇن شۋاعىم مەنىڭ» اتتى ادەبي-تانىمدىق كەزدەسۋ ءوتتى. بۇل تۋرالى egemen.kz ءتىلشىسى حابارلادى.
قىزدار ءۇشىن قىزىقتى اڭگىمەلەر وربىگەن كەزدەسۋدى ۋنيۆەرسيتەت رەكتورى دينار نوكەتاەۆا اشتى. Cتۋدەنتتەر اقىن شىعارمالارىنان كومپوزيتسيا ازىرلەپ, جازۋشىعا ارناعان ءتول تۋىندىلارىن وقىپ بەردى.
قازاق ادەبيەتىندە وزىندىك ورنى بار ساۋلە دوسجانوۆا شىنايى ءومىردى بەينەلەيدى, ايەلدەر تاقىرىبىندا كوسىلە جازادى. جازۋشىنىڭ «جىر ءتاج», «ارمان قالا» جىر جيناقتارى مەن «ءۇشىنشى ەسىكتىڭ قۇپياسى», «جاتقا تۋعان بالا», «ۇلكەن ۇيدەگى ۇرەي» اتتى پروزالىق كىتاپتارى بار.
«اكەم بار اقشاسىن ماعان جۇمساپ, كىتاپ ساتىپ الاتىن. سول كەزدەگى «جۇلدىز» جۋرنالىنىڭ بار ءنومىرى بولدى. ونى مەن «تۇمانباي اعا مولداعاليەۆ» اتىنداعى كىتاپحانا دەپ اتادىم. كەيىن الماتىدا بولعاندا ول كىسىنى ارنايى ىزدەپ بارىپ, تانىسىپ قايتتىم. سوندا اعامىز ەرەكشە قۋاندى. ءبىز ول كەزدە كىتاپتارىن تىزبەكتەپ بىلۋمەن قاتار, جىرلارىن جاتقا وقيتىنبىز. ءدان ريزا بولىپ, «سەن باقىتتىسىڭ, باقىتتى ايەل-انا بولاسىڭ», دەپ ايتقانى بار. قازىر ويلاپ قاراسام, كەرەمەت باتا ەكەن», – دەدى ساۋلە دوسجانوۆا.
كەش بارىسىندا ساۋلە ماعازبەكقىزى ءوز جىرلارىن وقىپ بەردى. وعان قوسا, قوس جازۋشىنىڭ باسىنان وتكەن وقيعالارىن, اسىل جارى جازۋشى دۇكەنباي دوسجانوۆتىڭ جۇرت بىلە بەرمەيتىن كەيبىر قاسيەتتەرىن, شىعارماشىلىق ادامنىڭ زايىبى مەن زيالى قاۋىم وكىلى بولۋدىڭ قانداي ەرەكشەلىكتەرى بار ەكەنى جايلى قىزىقتى ويلارىن ورتاعا سالدى.
ايناش ەسالي.
دەرەك, فوتو: egemen.kz.
