تسيرك ءارتيسى اەروپورتتا قالىڭدىعىن بۋىندىرىپ ءولتىردى

استانا. 2 ماۋسىم. رۋمىنيا تسيركىنىڭ ءارتيسى سەۆيليا اەروپورتىندا ۇشاقتان قالىپ قويعاندارى ءۇشىن قالىڭدىعىمەن ۇرىس-كەرىس بارىسىندا ونى اشۋمەن بۋىندىرىپ ءولتىردى. بۇل تۋرالى lenta.ru-عا سىلتەمە جاساعان egemen.kz ءتىلشىسى حابارلايدى. وقيعا يسپان ەلىنىڭ سەۆيليا قالاسىنداعى اەروپورتتا ورىن الدى. وندا 34 جاستاعى تسيرك ءارتيسى ءوزىنىڭ قالىڭدىعىن يتالياعا باراتىن ۇشاق رەيسىنەن قالىپ قويعاندارى ءۇشىن اشۋ شاقىرىپ, ونىڭ سوڭى قىزدى بۋىندىرىپ ولتىرۋمەن اياقتالعان. ەكى جاستىڭ اراسىنداعى كەلىسپەۋشىلىك اەروپورتتىڭ اۆتوتۇراعىندا ءورىس العان. پوليتسەيلەر وقيعا بولعان جەردەن 32 جاستاعى رۋمىنيا ازاماتشاسىنىڭ ءولى دەنەسىن تاپقان. «كۇدىكتى ءوز كىناسىن تولىق مويىندادى. ول قالىڭدىعىن ۇشاق رەيسىنەن قالىپ قويعاندارى ءۇشىن ولتىرگەن. قازىر اتالعان دەرەك بويىنشا تەرگەۋ امالدارى جۇرگىزىلۋدە», – دەيدى جەرگىلىكتى پوليتسەيلەر. ايتا كەتەيىك, وتكەن جىلدىڭ 18 قازان كۇنىندە ىستامبۇل اەروپورتىندا ءدال وسىعان ۇقساق جاعداي ورىن العان بولاتىن. وندا بريتانيا ازاماتشاسى ۇشاقتان قالىپ قويعانى ءۇشىن وزىنە قول سالعان. تالعات رايىمبەك. دەرەك: lenta.ru. فوتو: ispaniya411.ru.