الەمدەگى ەڭ ۇزىن تەمىر جول تۋننەلى پايدالانۋعا بەرىلدى

استانا. 2 ماۋسىم. شۆەيتساريادا الەمدەگى ەڭ ۇزىن تەمىر جول تۋننەلى پايدالانۋعا بەرىلدى. بۇل تۋرالى 24.kz-كە سىلتەمە جاساعان egemen.kz ءتىلشىسى حابارلادى. تەمىر جول ءالپى تاۋىنداعى سەن-گوتارد اسۋىنىڭ استىنان سالىنعان. جەراستى جولىنىڭ ۇزىندىعى 57 شاقىرىمدى قۇرايدى. مالىمەتتەر بويىنشا, تۋننەلدىڭ قۇرىلىسى 20 جىل بۇرىن باستالعان ەكەن. وسىعان سايكەس, 12 ميلليارد دوللار كولەمىندە قارجى جۇمسالعان. جولاۋشىلار پويىزى بۇل جەردە ساعاتىنا 250 شاقىرىم, ال جۇك پويىزدارى 160 شاقىرىم جىلدامدىقپەن ءجۇرىپ وتە الادى. شۆەيتساريا بيلىگى ونىڭ ىسكە قوسىلۋى ەۋروپاداعى تاۋار تاسىمالىنىڭ ەداۋىر جەڭىلدەۋىنە ءارى ەل تۇرعىندارىنىڭ قالاارالىق جولدارعا كەتەتىن ۋاقىتى دا قىسقاراتىنىن مالىمدەدى. ايتا كەتەيىك, وسىعان دەيىن الەمدەگى ەڭ ۇزىن تەمىر جول تۋننەلى جاپونيادا بولاتىن. كۇنشىعىس ەلىندەگى جەراستى جولىنىڭ ۇزىندىعى – 53 شاقىرىم. ايان ءابدۋالي. دەرەك, فوتو: 24.kz.