بۇگىن ەلىمىزدە ۇلتتىق بىرىڭعاي تەستىلەۋ باستالدى

استانا. 2 ماۋسىم. ەلىمىزدە ۇلتتىق بىرىڭعاي تەستىلەۋ (ۇبت) 2-15 ماۋسىم ارالىعىندا وتەدى. بۇل تۋرالى inform.kz-كە سىلتەمە جاساعان egemen.kz ءتىلشىسى حابارلادى. ءبىلىم جانە عىلىم مينيسترلىگىنىڭ مالىمەتتەرى بويىنشا 2016 جىلى 121 092 وقۋشى مەكتەپ بىتىرەدى. ولاردىڭ 83 330-ى – قازاق تىلىندە, 37 762-ءسى – ورىس تىلىندە. ۇبت تاپسىرۋعا 86 991 تۇلەك ءوتىنىش ءبىلدىردى. بۇل جالپى ساننىڭ 72 پايىزىن قۇرايدى. ال قازاق تىلىندە – 63 021, ورىس تىلىندە – 23 970 تۇلەك تاپسىرادى. ۇبت 166 پۋنكتتە وتەدى. ونىڭ 116-سى اۋدان ورتالىقتارىندا, 50-ءى وبلىستىق ورتالىقتاردا, سونداي-اق استانا مەن الماتى قالالارىنىڭ جوعارعى وقۋ ورىندارىنىڭ عيماراتتارىندا ورنالاسقان. ءبىر پۋنكتتە تەستىلەۋدەن وتەتىندەر سانى 1 كۇندە 600 تۇلەكتى قۇرايدى. ايتا كەتەيىك, بيىل تالاپكەرلەرگە قويىلعان تالاپ وزگەرگەن جوق. وقۋشىلار 5 ءپان بويىنشا تەست تاپسىرادى, 3,5 ساعاتتا 125 سۇراقتىڭ جاۋابىن بەلگىلەۋى ءتيىس. جوعارى وقۋ ورنىنا تۇسەمىن دەسە, كەمىندە 50 بالل جيناۋى قاجەت. ال ۇلتتىق ۋنيۆەرسيتەتتە ءبىلىم العىسى كەلەتىندەردىڭ كورسەتكىشى 70 باللدان تومەن بولماۋى كەرەك. بىراق ازداعان وزگەرىستەر بار. سىناقتان ءسۇرىنىپ, 50 بالل جيناي الماعاندار ۇبت-نى قايتا تاپسىرا الادى. ايان ءابدۋالي. دەرەك: inform.kz. فوتو: namys.kz.