تاجىكستان پرەزيدەنتىنىڭ قىزى سەناتور بولدى

استانا. 2 ماۋسىم. تاجىكستان استاناسى – دۋشانبە قالالىق جانە استانالىق اۋداندار حالىق دەپۋتاتتارى ءماجىلىسىنىڭ سەسسياسى جەكسەنبى كۇنى تاجىكستان پرەزيدەنتى اپپاراتىنىڭ اتقارۋشى جەتەكشىسى, مەملەكەت باسشىسىنىڭ قىزى وزودا راحموندى ەلدىڭ جوعارعى پالاتاسىنىڭ مۇشەسى ەتىپ سايلادى. بۇل تۋرالى ras.kz-كە سىلتەمە جاساعان egemen.kz ءتىلشىسى حابارلادى. پرەزيدەنت ەمومالي راحمون قىزىنىڭ كانديداتۋراسى دۋشانبە قالاسى حالىق دەپۋتاتتارى ءماجىلىسىنىڭ 14 ءساۋىر كۇنى وتكەن كەزەكتى سەسسياسىندا ۇسىنىلعان بولاتىن. وعان دەيىن, ەكى پالاتالى پارلامەنت پايدا بولعان 2000 جىلدان بەرى پرەزيدەنت اپپاراتىنىڭ بۇرىنعى جەتەكشىلەرى ماتلۋحبون داۆلاتوۆ مەن باحتيەر حۋدوەرزودا كەزىندە وسىلايشا سەناتور بولىپ سايلانعان ەدى. زاڭ عىلىمدارىنىڭ 38 جاستاعى كانديداتى وزودا راحمون بيىلعى جىلعى قاڭتار ايىندا پرەزيدەنت اپپاراتىنىڭ اتقارۋشى جەتەكشىسى بولىپ تاعايىندالعان. بۇعان دەيىن ول تاجىكستان سىرتقى ىستەر ءمينيسترىنىڭ ءبىرىنشى ورىنباسارى بولىپ كەلدى. ەلدەگى پارلامەنتتىڭ جوعارعى پالاتاسى 33 مۇشەدەن قۇرالسا, سولاردىڭ 25-ءى تاۋلى باداحشان, سوگدى جانە حاتلون وبلىستارى, رەسپۋبليكالىق باعىنىستاعى اۋداندار مەن دۋشانبە قالاسى دەپۋتاتتارىنىڭ سەسسيالارىندا داۋىس بەرۋ جولىمەن سايلانادى. ال جوعارعى پالاتانىڭ سەگىز مۇشەسى تىكەلەي پرەزيدەنتتىڭ جارلىعىمەن تاعايىندالادى. راحمون وزودا ەمومالي 1978 جىلعى 3 قاڭتاردا تۋعان. زاڭ عىلىمدارىنىڭ كانديداتى. توتەنشە جانە ۋاكىلەتتى ديپلوماتيالىق رانگىسى بار. ەڭبەك جولىن دۋشانبەدەگى تاجىك ۇلتتىق ۋنيۆەرستەتىن بىتىرگەننەن كەيىن 2000 جىلى باستاعان. 2004-2006 جىلدارى اقش-تىڭ دجوردجتاۋن جانە مەريلەند ۋنيۆەرسيتەتتەرىن بىتىرگەن. 2005 جىلدان ەلشىلىك قىزمەتتە بولعان. تاجىك, ورىس جانە اعىلشىن تىلدەرىندە ەركىن سويلەيدى. تۇرمىس قۇرعان, 5 بالاسى بار. تالعات رايىمبەك. دەرەك: ras.kz. فوتو: 7news.kz.