«سىرعالىم» تەلەحيكاياسى تاتار ەلىندە كورسەتىلۋدە

«قازاقستان» ۇلتتىق ارناسىنان كورسەتىلىپ, كوپشىلىكتىڭ ىستىق ىقىلاسىنا بولەنگەن «سىرعالىم» تەلەسەريالى تاتار تىلىنە اۋدارىلىپ, قازىر تاتارستاندا كورسەتىلىپ جاتىر. ونى «قازاقستان» تەلەراديوكورپوراتسياسىنان ەكى بىردەي تەلەارنا ساتىپ العان. ءا دەگەننەن-اق, كورەرمەندەردى وزىنە باۋراپ العان «سىرعالىم» قازىر كوپشىلىكتىڭ كۇندەلىكتى اسىعا كۇتەتىن سۇيىكتى سەريالىنا اينالىپتى. تاتارستان تەلەارناسى قىزى­عۋشىلىق تانىتقاندا, قازىرگى قوعام ازاماتتارىنىڭ كوكەيىندەگى الۋان سۇراققا وسى فيلم ارقىلى جاۋاپ ىزدەۋدى ءجون كورگەن بولۋى كەرەك. سونىمەن قاتار, قازاقستاندىقتار تۇسىرگەن حيكايا دا شەتەلدىك تەلەۆيزيا ماماندارىنىڭ نازارىنا ىلىگىپتى. قازىر جەرگىلىكتى «تاتارستان – جاڭا عاسىر» جانە «تنۆ پلانەتا» دەگەن قوس بىردەي ارنادا قازاق كينوتۋىندىلارى تاتارشا سويلەپ جاتىر. تاتارستاننىڭ باستى تەلەارنالارى «سىرعالىمدى» وسى جىلدىڭ اقپان ايىنان كورسەتۋدى باستادى. بارلىعى 48 سەريادان تۇراتىن تەلەحيكايا ەفيردە كۇندەلىكتى تاڭەرتەڭ, كەشكە جانە ءتۇن مەزگىلىندە, ياعني ءۇش مارتە كورسەتىلەدى. – ءبىز «قازاقستان» تەلەرا­ديوكورپوراتسياسىنىڭ ونىمدە­رىمەن تانىسىپ, تاتار كورەر­مەندەرى ءۇشىن دە قىزىقتى تۋىن­دىلار بار ەكەنىن كوردىك. ءبىز­دىڭ تاريحىمىز ورتاق, مادەنيەتىمىز جاقىن. سوندىقتان, تاتار حال­قىنا قازاقتاردىڭ قازىرگى تى­نىس-تىرشىلىگى, ءومىرى قىزىق بولادى دەپ وسى سەريالعا توقتادىق. كورەرمەنگە ۇناعان سوڭ «سىر­عالىمنىڭ» ەكىنشى ءبولىمىن دە ساتىپ الدىق», – دەيدى «تاتار­ستان – جاڭا عاسىر» تەلەارناسى باس ديرەكتورىنىڭ ورىنباسارى زۋفار زاكيروۆ. دۋبلياج ءىسىنىڭ بىرقاتار ماماندارى تەلەسەريالدى بارىنشا شىنايى اۋدارىپ, كورەرمەندەرگە ۇسىنۋدا. دىبىسىن جازۋ ءۇشىن كاسىبي اكتەرلەر كۇن-ءتۇن دەمەي جۇمىس ىستەپ جاتىر. ناتيجەسىندە, باۋىرلاس ەل قازاقستاندىق ءونىم­دى جاقسى قابىلدادى. قازىر تاتار­ستانداعى رەيتينگى جوعارى تەلەحي­كايالاردىڭ ءبىرى بولىپ سانالادى. – دۋبلياج جۇمىسىن جۇرگىزۋ بىزگە اسا قاتتى قيىندىق تۋدىرعان جوق – ءتىلىمىز بەن ءدىلىمىز ورتاق بولعاندىقتان, وڭاي. بىزگە نەگى­زىنەن ءماتىن ورىس تىلىندە كەلەدى. بىراق كەيبىر ساتتەردە قازاق ءتى­لىندەگى تۇپنۇسقاعا قاراپ وتىرىپ, تىكەلەي اۋدارامىز. مىنە, وسىنداي كەزدە اكتەرلەردىڭ ەموتسيا­سىن بۇرمالاماي, شىنايى بەرۋگە بولادى, – دەيدى دۋبلياج ءبولىمىنىڭ جەتەكشىسى الفيا ياروش. – قازاقتىڭ بۇل سەريالىنان جانىم راحاتتانادى. ەڭبەكتەگەن بالادان, ەڭكەيگەن قارتقا دەيىن كورسەتەدى. ەڭ باستىسى, باتىستىڭ فيلمدەرىندە بەلەڭ العان ۇيات­سىزدىق, زورلىق-زومبىلىق «سىر­عالىمدا» مۇلدەم جوق. قايتا تاتاردىڭ مادەنيەتىمەن ساباقتاس قازاقتىڭ سالت-ءداستۇرى, ۇلكەن كىسىلەردىڭ وسكەلەڭ ۇرپاققا ايتاتىن ۇلاعاتتى سوزدەرى, جاستاردىڭ قارت كىسىلەرگە قۇرمەتى ت.ب. سەكىلدى تاماشا ادامي قاسيەتتەرگە كۋا بولامىز, – دەيدى قازان قالاسىنىڭ تۇرعىنى نەيليا كۋزينا. ايتا كەتەيىك, «قازاقستان» رترك» اق سايتىندا تەلەكو­رەرمەندەردىڭ داۋىس بەرۋ ناتيجە­سىندە «سىرعالىم» «2014 جىلعى ۇزدىك حيكايا» جۇلدەسىن جەڭىپ العان. ال باستى ءرولدى سومداعان جۇلدىز ماحانوۆا «2014 جىلى ايەل ءرولىن سومداعان ۇزدىك اكتريسا» نوميناتسياسىن يەلەنگەن بولاتىن. ايان ءابدۋالي, «ەگەمەن قازاقستان»