ورتاق ۇستانىمدار ورايىنداعى اڭگىمە

پارلامەنت ءماجىلىسى توراعاسىنىڭ ورىنباسارى گۇلميرا يسىمباەۆا لاتۆيا ساەيمى (پارلامەنت) توراعاسىنىڭ ورىنباسارى ليبينيا-ەگنەرەمەن كەزدەستى, دەپ حابارلادى ءماجىلىستىڭ ءباسپاسوز قىزمەتى. ايتا كەتەيىك, لاتۆيا دەلەگا­تسياسى استاناعا «دىندەر تەرروريزمگە قارسى» حالىقارالىق فورۋمىنا قاتىسۋ ءۇشىن ارنايى كەلگەن بولاتىن. كەزدەسۋ بارىسىندا پارلا­مەنت­ارالىق ءوزارا ءىس-قيمىل ماسە­لەلەرىنە ايرىقشا كوڭىل بولىنە وتىرىپ, قازاقستان-لاتۆيا قا­رىم-قاتىناسىن دامىتۋعا باسا نازار اۋدارىلدى. تاراپتار اتاپ وتكەن­دەي, كوپجاقتى ىقپالداستىق جانە حا­لىقارالىق ساياساتتاعى وزەكتى ماسەلەلەر توڭىرەگىندە ءبىزدىڭ ەل­دەرىمىزدىڭ ۇستانىمدارى وتە ۇقساس. وسى رەتتە ۆيتسە-سپيكەرلەر ءبىزدىڭ ەلدەرىمىز مۇشەسى بولىپ تابىلاتىن بۇۇ الاڭدارى, باسقا دا حالىقارالىق پلاتفورما اياسىندا جان-جاقتى ارىپتەستىك تۇرعىسىنان قولعا الىنىپ جاتقان شارالارعا توقتالدى. گ.يسىمباەۆا لاتۆيا تاراپىنا قازاقستاننىڭ دسۇ-عا كىرۋ جانە 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە كانديداتۋراسىن قولداعانى ءۇشىن العىسىن جەتكىزدى. سونىمەن قاتار, استانادا وتەتىن «ەكسپو-2017» كورمەسىنىڭ دايىندىق جانە ءوتۋ بارىسىندا لاتۆيانىڭ بەلسەنە قاتىساتىنىنا سەنىم ءبىلدىردى. گ.يسىمباەۆا مارتەبەلى مەيماندى ءماجىلىستىڭ قازىرگى تىنىس-تىرشىلىگىمەن تانىستىرىپ, قازاقستان پرەزيدەنتىنىڭ بەس ينستيتۋتتىق رەفورماسىن, «قازاقستان-2050» ستراتەگياسىن زاڭنامالىق قولداۋ تۇرعىسىندا اتقارىلىپ جاتقان جۇمىستاردان حاباردار ەتتى. ليبينيا-ەگنەرە لاتۆيا ساەيمى توراعاسىنىڭ اتىنان ءماجىلىس سپيكەرىنە بەرۋ ءۇشىن لاتۆياعا رەسمي ساپارمەن كەلۋگە شاقىرۋدى تابىس ەتتى.