وڭالتۋ ورتالىقتارىنىڭ ورنى بولەك

كەشە ورتالىق كوممۋنيكاتسيالار قىزمەتىندە «قاسيەتتى جول» قوعامدىق قايىرىمدىلىق قورى وكىلدەرىنىڭ قاتىسۋىمەن تسەرەبرالدى سال اۋرۋىنا شالدىققان بالالاردىڭ قۇقىعىن قورعاۋعا ارنالعان «قازاقستان جاقسى­لىق جاسايدى» اتتى بريفينگ ءوتتى. جوبا اياسىندا اتالعان قور ەل ايماقتارىندا 14 وڭالتۋ ورتالىقتارىن اشۋدى كوزدەپ وتىر. بۇگىنگى تاڭدا قازاقستاندا 13 433 بالا سال اۋرۋىنا شالدىققان بولسا, ولاردىڭ 2 621-ءى (20%) 2015 جىلى وڭالتۋدان تولىق ءوتتى. مەملەكەتتىك مەديتسينالىق مەكەمەلەردە ەم قابىلداۋ ورىندارىنىڭ تاپشىلىعى سالدارىنان 10-نان استام بالا جىلدار بويى كەزەك كۇتۋگە ءماجبۇر بولعان. «بالالارىن شەتەلدە وڭالتۋ ءۇشىن قاراجات ىزدەگەن اتا-انالار بىزگە ءجيى حابارلاسىپ جاتادى. ال ساپارلاردى ۇيىمداستىرۋدىڭ قيىندىقتارىن ايتپاعاندا, ناقتى ناتيجەگە قول جەتكىزۋ ءۇشىن جىلىنا كەم دەگەندە 2-3 رەت وڭالتۋدان ءوتۋ قاجەت. استانا قالاسىنداعى «قاسيەتتى جول» وڭالتۋ ورتالىعىنداعى تاجىريبەمىز بويىنشا ەگەر قازاقستاندا وڭالتۋ قىزمەتىن الەمدەگى ەڭ ۇزدىك ادىستەمە بويىنشا ۇيىمداستىراتىن بولساق, شەتەلگە شىعۋدىڭ قاجەتتىگى بولمايدى دەپ نىق سەنىممەن ايتا الامىز. ءبىز جاڭادان پايدا بولعان مەديتسينالىق جابدىقتاردى ۇدايى نازاردا ۇستاپ وتىرامىز. سەبەبى, ورتالىعىمىزدا بالالار ءۇشىن ەڭ ۇزدىك زاماناۋي مەديتسينالىق تەحنولوگيالاردىڭ بولعانىن قالايمىز. كەڭەس بەرىپ, ورتالىق قىزمەتكەرلەرىن وقىتىپ-ۇيرەتۋ ءۇشىن ەڭ ۇزدىك شەتەلدىك مامانداردى دا ۇنەمى ارنايى شاقىراتىن بولامىز. بۇل, ءسوزسىز, قازاقستاندا وڭالتۋ قىزمەتىنىڭ دامۋىنا وڭ ىقپالىن تيگىزەدى», – دەدى «قاسيەتتى جول» قوعامدىق قايىرىمدىلىق قورىنىڭ ديرەكتورى گۇلميرا ابەلدينوۆا. استانا قالاسىندا وڭالتۋ ورتالىعىن اشۋ جوباسى ءساتتى جۇزەگە اسىرىلعان سوڭ, قور ەكىنشى وڭالتۋ ورتالىعىن شىمكەنت قالاسىندا اشۋعا دايىندىق ۇستىندە وتىر. قوردىڭ ستاتيستيكالىق مالىمەتتەرى بويىنشا, 2015 جىلى وقو-دا سال اۋرۋىنا شالدىققان 3000-نان اسا بالا تىركەلگەن, ال وڭالتۋ ورىندارىنىڭ سانى نەبارى – 110. «ەگەر دە ءاربىر ايماقتا اكىمدىكتىڭ قولداۋىمەن ءبىر وڭالتۋ ورتالىعى اشىلار بولسا, مىڭداعان بالانىڭ بولاشاعى ءۇشىن وزەكتى ماسەلە شەشىلەر ەدى. ولار ەرتەڭگى كۇنى اياققا تۇرىپ, مەكتەپكە بارا الادى, ءسويتىپ, ءبىلىم الىپ, قىزمەتكە ورنالاسىپ, ءوز ەلىنىڭ تەڭ قۇقىلى ازاماتى اتانا الادى», – دەدى قوردىڭ ورتاق قۇرىلتايشىسى دينارا زاكيەۆا. سونىمەن قاتار, قور ادام كاپيتالىن دامىتۋعا, ءبىلىمدى تەرەڭدەتۋ جانە دۇنيەجۇزىنىڭ جەتەكشى ماماندارىمەن تاجىريبە الماسۋعا ەرەكشە ءمان بەرەدى. «ادام رەسۋرستارىنا ينۆەستيتسيا سالۋ» جوباسى اياسىندا قازاقستان رەسپۋبليكاسىنىڭ مەديتسينالىق قىزمەتكەرلەرى ءۇشىن ۇلىبريتانيا, تۇركيا, ءباا جانە رەسەيدىڭ جەتەكشى ماماندارىمەن شەبەرلىك-ساباقتارى وتكىزىلدى. راۋشان تاۋىرحانقىزى, «ەگەمەن قازاقستان»