اتىراۋ تۇرعىنى ءوزىنىڭ ءتىرى ەكەنىن دالەلدەدى

اتىراۋ. 1 ماۋسىم. اتىراۋ تۇرعىنى ءوزىنىڭ ءتىرى ەكەنىن دالەلدەۋ ءۇشىن سوتقا جۇگىنىپ, قايتىس بولعانى تۋرالى كۋالىكتىڭ كۇشىن جويدىردى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egmen.kz ءتىلشىسى حابارلادى. جىل باسىندا اتىراۋ وبلىسىنىڭ تۇرعىنى ەلەنا پريدانوۆانىڭ ازاماتتىق نەكەدەگى كۇيەۋى نيكولاي ورلوۆپەن بىرگە باسپاناسىز قالعانىن حابارلاعان ەدىك. ولاردىڭ وزدەرىنىڭ دە, ءتىپتى, ءۇش بالاسىنىڭ دا جەكە باسىن كۋالاندىراتىن قۇجاتتارى دا بولماعان. ءبىر تاڭدانارلىعى ەلەنا پريدانوۆانىڭ ءوزى ولىلەر ساناتىندا ەكەنى انىقتالعان ەدى. «ازاماتشا ەلەنا پريدانوۆا ۇزاق ۋاقىت بويى اتىراۋ وبلىسىنىڭ اۋىلدىق وكرۋگتەردىڭ بىرىندە ءومىر ءسۇرىپ, تۋىستارىمەن حابارلاسپاعان. بىرنەشە جىلدار وتكەننەن كەيىن تۇرمىستىق زورلىق-زومبىلىقتان زارداپ شەككەن ايەلدەرگە ارنالعان داعدارىس ورتالىعىنا تۇسكەن ۋاقىتتا ءوزىنىڭ قازا تاپقاندار ەسەبىندە تۇرعانىن بىلگەن. ءوز قۇقىعىن قورعاۋ ماقساتىندا اتىراۋ قالالىق سوتىنا وزىنە قاتىستى قايتىس بولۋ تۋرالى اكتىلىك جازبانىڭ جانە قايتىس بولۋ تۋرالى كۋالىكتى زاڭسىز دەپ ارىزبەن جۇگىنگەن. سوت وتىرىسىندا جەدەل-ىزدەستىرۋ شارالارىن جۇرگىزۋ بارىسىندا فوتو ارقىلى ارىزدانۋشىنىڭ تۋىستارى ءمايىتتى ەلەنا پريدانوۆاعا ۇقساس بولۋىنا بايلانىستى سول دەپ تانىعانى انىقتالدى. كەيىننەن ارىزدانۋشىنىڭ تۋىستارىنىڭ ءبىرى مۇنى قايتىس بولدى دەپ تانۋ تۋرالى كۋالىگىن العان. سوت وتىرىسىندا ارىزدانۋشىنىڭ بارلىق تۋىستارى ونى وزدەرىنىڭ اپكەسى, تاتەسى رەتىندە تانىعان. جيناقتالعان بارلىق دالەلدەمەلەردىڭ جيىنتىعىمەن سوت ارىزدانۋشى ەلەنا پريدانوۆانىڭ تالابىن نەگىزدى دەپ تانىپ, وعان قاتىستى قايتىس بولۋ تۋرالى اكتىلىك جازبانى جانە قايتىس بولۋ تۋرالى كۋالىكتى زاڭسىز دەپ تانىدى» – دەيدى اتىراۋ وبلىستىق سوتىنىڭ ءباسپاسوز حاتشىسى بورانباي عاليەۆ. جولداسبەك شوپەعۇل. دەرەك: اتىراۋ وبلىستىق سوتىنىڭ ءباسپاسوز قىزمەتى. فوتو: azh.kz.