اس بەرۋدەگى استا-توكتىك بۇدان بىلاي تەجەلۋگە ءتيىس

قازاقستان مۇسىلماندارى ءدىني باسقارماسى قازاقستاندىق­تار­دى قۇدايى اس بەرۋدە ىسىراپشىلىق جاساماۋعا شاقىرىپ وتىر. مۇنىڭ جايىن باس ءمۇفتي ەرجان قاجى مالعاجى ۇلى تارقاتىپ ايتىپ بەردى. «قۇدايى اس بەرۋدىڭ دە وزىندىك ءبىر ادەبى مەن ءتارتىبى بار ەمەس پە؟ قاي جاعىنان كەلگەندە دە, شەكتەن تىس شىعىنعا باتىپ, ىسىراپ ەتۋگە بولمايدى. مۇنى ءبىزدىڭ اسىل ءدىنىمىز دە قۇپتامايدى. ءبىز ەلىمىز بويىنشا بارشاعا ءتيىمدى بولاتىن قۇدايى استىڭ ورتاق ءمازىرىن ازىرلەپ, كوپشىلىككە ۇسىندىق. بۇل باستاماعا ەل اعالارى, اقساقالدار, زيالى قاۋىم وكىلدەرى, مەشىت جاماعاتى ۇلكەن قولداۋ كورسەتۋدە. ايتالىق, پاۆلودار وبلىسىنداعى ورتالىق مەشىتتىڭ اسحاناسىندا وسى اس ءمازىرى بويىنشا قۇدايى اس بەرىلىپ كەلەدى. جەرگىلىكتى جاماعات يگى باستاما ءۇشىن العىسىن ءبىلدىرىپ, ىزگى تىلەكتەرىن جەتكىزۋدە. قولعا العان جۇمىسىمىز وزگە دە وبلىستاردا جۇزەگە اسادى دەگەن ويدامىز», – دەدى ول. قازاقستان مۇسىلماندارى ءدىني باسقارماسىنىڭ پاۆلودار وبلىسى بويىنشا وكىل يمامى ناريمان يسەنوۆتىڭ پىكىرىنشە, مەشىتكە كە­لۋشى جەرگىلىكتى جاماعات اراسىندا: «نەسيە الىپ, قۇدايى اس بەرسەم بولا ما؟» – دەپ سۇراپ كەلەتىندەر دە بار. «بۇل – دىنىمىزدە قۇپتالمايتىن امال. ال ءبىز ۇسىنعان جاڭا اس ءمازىرى اسقا كەتەتىن شىعىندى ەكى ەسەگە ازايتادى», – دەيدى ول. قازىرگى كۇندەرى عۇلامالار كەڭە­سىندە تالقىلانىپ جاتقان «جا­نازا» كىتابىندا: «قايتىس بولعان كىسىنىڭ اتىنان اس بەرۋ – مۇسىلمان شاريعاتىندا مىندەتتى تۇردە اتقا­رىلۋى ءتيىس پارىز امالدارىنا جاتپايدى. ياعني, جاسالماعان جاع­دايدا ەشبىر ادام كۇناھار بولمايدى. جالپى العاندا, جۇرتقا تاماق تاراتۋدىڭ ساۋاپتى ءىس ەكەنىن حاديستەر مەن قۇراننىڭ كەيبىر اياتتارىنان بايقايمىز. دىنىمىزدە مىندەتتى تۇردە قارىزدانىپ نەمەسە وزىڭە قاجەتتى قارجىڭدى جۇمساپ, قايتىس بولعان كىسى اتىنان ۇلكەن مال سويىپ, ساداقا بەر دەگەن ۇكىم جوق. ساداقالار, قۇدايى استار بەرىلگەن جاعدايدا ىسىراپقا جول بەرىلمەستەن اتقارىلۋى ءتيىس», – دەپ اتاپ كورسەتىلگەن ەكەن. ايتا كەتەتىن جايت, ەلىمىزدە قۇدايى اس, ساداقا بەرۋ, مازار سالۋ, جەر­لەۋ سەكىلدى راسىمدەردى ءبىر ىزگە, ءبىر جۇيەگە كەلتىرۋ ماقساتىندا ازىرلەنىپ جاتقان «جانازا» كىتابى عۇلامالار كەڭەسىنىڭ ارالاسۋىمەن جۋىردا جارىققا شىقپاق. مۇرات ايتقوجا