رەسەي تاراپى باستاماشىلىق تانىتقان ساپار

استاناعا رەسەيلىك سوت ورگاندارىنىڭ دەلەگاتسياسى جۇمىس ساپارىمەن كەلدى. دەلەگاتسيا قۇرامىنا رەسەي فەدەراتسياسى جوعارعى سوتىنىڭ جانىنداعى سوت دەپارتامەنتى باس ديرەكتورىنىڭ ورىنباسارى ۆيكتور اگەەۆ, كوستروما وبلىستىق جانە سولتۇستىك كاۆكاز وكرۋگتىك اسكەري سوتتارىنىڭ توراعالارى, سوت دەپارتامەنتى باسقارمالارىنىڭ باستىقتارى, سونداي-اق, «پراۆوسۋديە» مەملەكەتتىك تالدامالىق جۇيەسىن قولداۋدىڭ اقپاراتتىق-ساراپتامالىق ورتالىعى» فەدەرالدىق مەملەكەتتىك بيۋدجەتتىك مەكەمەسىنىڭ باسشىسى لەونيد يۋحنەۆيچ ەنگەن. ساپار رەسەيلىك تاراپتىڭ باستاماسى بويىنشا وتۋدە. ماقساتى – ەلەكتروندى سوت تورەلىگىن ەنگىزۋ مەن سوتتار جۇمىسىن ۇيىمداستىرۋداعى قازاقستاندىق تاجىريبەنى زەردەلەۋ. ساپاردىڭ العاشقى كۇنى جوعارعى سوت توراعاسى قايرات ماميمەن, جوعارعى سوتتىڭ مامانداندىرىلعان القاسىنىڭ ءتورايىمى ايگۇل قىدىرباەۆامەن, جوعارعى سوت جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ باسشىسى ءىلياس يسپانوۆپەن, دەپارتامەنتتىڭ قۇرىلىمدىق بولىمشەلەرىنىڭ وكىلدەرىمەن بىرقاتار كەزدەسۋلەر ءوتتى. رەسەيلىك دەلەگاتسيا قازاقستاننىڭ سوت قۇرىلىسى مەن سوت ءىسىن جۇرگىزۋ بارىسىنان, سونداي-اق, ۇلت جوسپارىن ىسكە اسىرۋ شەڭبەرىندە سوت جۇيەسىندە ورىن الىپ جاتقان وزگەرىستەردەن حاباردار. شەتەلدىك قوناقتار ءۇشىن قازاقستان جوعارعى سوتىنىڭ اقپاراتتىق سەرۆيستەرى («تورەلىك» ااتج, «ە-قىزمەت», ىشكى پورتال, «سوت كابينەتى») مەن جوعارعى سوتتىڭ سوتتارمەن جانە ءىىم قىلمىستىق اتقارۋ جۇيەسى كوميتەتىنىڭ مەكەمەلەرىمەن بەينەبايلانىس جۇيەسىنىڭ تانىستىرىلىمى ءوتتى. ساپار اياسىندا اقپاراتتىق سەرۆيستەردىڭ جۇمىسىمەن تىكەلەي تانىسۋ ماقساتىندا استانا قالالىق سوتىنا بارۋ كوزدەلىپ وتىر. وسى ورايدا مەيمانداردى «سوت قۇجاتتارىمەن تانىسۋ», «سوت ىستەرىن قاراۋ كەستەسى», «سوتقا شاقىرۋ», «مەملەكەتتىك باج سالىعىن تولەۋ», «تالاپ ارىزدى تىركەۋ», «تالون بەرۋ», «سمس-حابارلاما الۋ», «ىستەردى اۆتوماتتى ءبولۋ» سەكىلدى سەرۆيستەردىڭ جۇمىسىمەن تانىستىرۋ جوسپارلانىپ وتىر. قوناقتارعا اۋديوبەينەتىركەۋ جۇيەسىنىڭ مۇمكىندىكتەرى, «سوت كابينەتى» سەرۆيسىنىڭ تالاپ ارىزدار مەن وتىنىشتەردى بەرۋ, حاتتاردى جىبەرۋ فۋنكتسيونالدارىنىڭ جۇمىسى كورسەتىلەتىن بولادى. ساپار بارىسىندا قازاقستان باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ كوميتەتىنىڭ ءتورايىمى ساۋلە ايتپاەۆامەن, جوعارى سوت كەڭەسىنىڭ توراعاسى اناتولي سمولينمەن كەزدەسۋ وتەدى. بۇعان قوسا, جوعارعى سوت سۋدياسى ەلەنا ماكسيۋتامەن جانە اسكەري سوت توراعاسى ساكەن ابدۋلاەۆپەن كەزدەسۋلەر جوسپارلانعان, دەپ حابارلادى جوعارعى سوتتىڭ ءباسپاسوز قىزمەتى.