شىمكەنت. 28 مامىر. بۇدان ەكى اپتا بۇرىن ءىز-ءتۇزسىز جوعالىپ كەتكەن 18 جاستاعى ايگەرىم وسپانبەكوۆانى ءولتىردى دەگەن كۇدىكپەن قاماۋعا الىنعان الىشەر ارعىنبەكوۆتىڭ جانىندا تاعى ءۇش ادام بولعان. بۇل تۋرالى Otyrar.kz اقپارىنا سۇيەنگەن egemen.kz ءتىلشىسى حابارلادى.
كۇدىكتىنىڭ ادۆوكاتى ايگەرىم وسپانبەكوۆانىڭ ولىمىنە تاعى ءۇش ادامنىڭ قاتىستى ەكەنىن ايتىپ وتىر. مۇنى ول سوتتىڭ 18 جاستاعى ستۋدەنت قىزدى ءولتىردى دەگەن ايىپ تاعىلۋشىنى ۇستاۋ شاراسىن بەلگىلەۋگە ارنالعان وتىرىسىندا جەتكىزدى.
وتىرىس بارىسىندا پروكۋرور ايگەرىمنىڭ ولتىرىلۋىنە بايلانىستى وقيعانىڭ جۇرت جاعاسىن ۇستاتاتىن جاقتارىن بايانداپ بەردى.
«ءوزىنىڭ جەكە كولىگىمەن ادام تاسۋمەن اينالىسۋشى الىشەر ارعىنبەكوۆ 10 مامىر كۇنى جولدا كولىك كۇتىپ تۇرعان قىزعا نازار اۋدارادى. ول سوسىن قىزدىڭ جانىنا توقتايدى. شىمكەنتكە باراتىنىن بىلگەسىن اپارۋ قۇنى 500 تەڭگە ەكەنىن ايتادى. وسىدان كەيىن قىزدى مىنگىزىپ العان جۇرگىزۋشى وبلىس ورتالىعىنا قاراي ءجۇرىپ كەتەدى. بۇل كەزدە كولىكتە تەرگەۋ كىم ەكەندەرىن ءالى انىقتاي قويماعان تاعى ءۇش جولاۋشى بار ەكەن. ولار سارىاعاش اۋدانىنىڭ تەرريتورياسىندا تۇسەدى. تاكسيشى بۇدان ءارى وسپانبەكوۆانىڭ ءبىر ءوزىن شىمكەنتكە الىپ كەتەدى. ساعات 17:30-دا شىمكەنتتە, «ارعىماق» اۆتوبازارىنا جاقىن جەردە ارعىنبەكوۆ وسپانبەكوۆامەن ۇرسىسىپ قالادى. وسىدان كەيىن ول كولىگىن جولدىڭ جيەگىنە توقتاتىپ, وتۆەرتكاسىن الىپ, ارتقى ورىندىقتا وتىرعان وسپانبەكوۆانى كەۋدە جانە قارىن تۇسىنان بىرنەشە رەت ۇرادى. سوسىن ونىڭ قولىنان قۇنى 50 000 تەڭگە تۇراتىن Samsung Galaxy G5 ماركالى تەلەفونى مەن 8 500 تەڭگە اقشاسىن الادى. سودان سوڭ ارعىنبەكوۆ رۋلگە وتىرىپ, سارىاعاش اۋدانى جاققا قاراي جۇرەدى. قازىعۇرت كەنتىندەگى قوناەۆ كوشەسىنە كەلگەنىندە, كومەك سۇراپ ايعايلاي باستاعان وسپانبەكوۆانىڭ اۋزىن جاۋىپ تاستاۋ ءۇشىن ەكى قاباتتى «الماس» دۇكەنىنەن سكوتچ ساتىپ الادى. سوسىن وڭتۇستىك باعىتتا قاراي ءجۇرىپ كەلىپ, «بوگەتباي اتا» ەلەكترونيكا ماگازينى جانىنا توقتاپ, ارتقى ورىندىققا وتىرىپ, وسپانبەكوۆانىڭ اۋزىن سكوتچپەن جاۋىپ, ەكى قولى مەن اياعىن ارتقا قايىرىپ بايلايدى. سوسىن سۋمكاسىنىڭ بەلبەۋىمەن قىزدى تۇنشىقتىرىپ ولتىرەدى. سودان كەيىن دالا جاققا شىعىپ كەتەدى. اينالادا ەشكىم جوق ەكەنىن بايقاعاسىن, ءولى دەنەنى جەرگە كومىپ تاستايدى», - دەدى پروكۋرور.
«مەنىڭ قورعاۋىمداعى ادام تەرگەۋگە باسىنان ولىمگە قاتىستى تاعى ءۇش جاس جىگىتتىڭ بولعانىن مالىمدەدى. ولار جۇرگىزۋشىگە اقشالارىن تولەمەي, كولىكتەن شىققان دا, قىزدىڭ تەلەفونىن الىپ بەرە سالعان. سوسىن اقشالارىن اكەپ بەرگەسىن, تەلەفوندى الاتىندارىن ايتقان. بىراق سول كۇيى كەلمەي كەتكەن. قازىر وسى تەلەفوننىڭ مەنىڭ قورعاۋىمداعى ادامنىڭ قولىنان تابىلۋىنا بايلانىستى ايىپتاۋلار جاسالىپ جاتىر. ايىپتالۋشى جاس جىگىتتەردىڭ اتى-جوندەرىن عانا ەمەس, ءتىپتى تۋعان جىلدارىن دا ايتىپ بەرگەنىنە قاراماستان, تەرگەۋ وسى كەزگە دەيىن ءالى ءبىر رەت تە بەلگىسىز ۇشەۋدى ىزدەستىرۋدىڭ شاراسىن قولدانباي وتىر», - دەدى ادۆوكات.
بىراق قورعاۋشى بەلگىسىز جاس جىگىتتەردىڭ كىمدەر ەكەندەرىن اشىپ ايتپادى.
ەسكە سالا كەتەيىك, 25 جاستاعى الىشەر ارعىنبەكوۆ شىمكەنت قالاسى ءال-فارابي اۋداندىق سوتىنىڭ شەشىمى بويىنشا ستۋدەنت ايگەرىم وسپانبەكوۆانىڭ ولىمىنە ايىپتى رەتىندە قاماۋعا الىندى. قىز 10 مامىر كۇنى سارىاعاش اۋدانىنان شىمكەنتكە جولعا شىققاننان كەيىن جوعالىپ كەتتى. ول تۋرا ەكى اپتا وتكەننەن كەيىن ءولى كۇيىندە تابىلدى.
پوليتسيا الىشەر ارعىنبەكوۆتى جاڭا جول اۋىلىندا قولعا ءتۇسىردى. ونىڭ وتباسى, اتا-اناسى, ايەلى جانە ەكى كىشكەنتاي بالاسى بار كورىنەدى.
سوت تاراپتاردى تىڭداي كەلىپ, كۇدىكتىگە ازىرگە ەكى اي مەرزىمگە قاماۋ تۇرىندە شارا كورۋگە شەشىم شىعاردى.
«ايىپتالۋشى, بۇل سوت وتىرىسىندا ءسىزدىڭ قىلمىسقا قاتىسىڭىزدىڭ بار-جوقتىعى انىقتالمايدى. قازىر تەك ءسىزدى ۇستاۋعا قاتىستى قولدانۋ شاراسى عانا بەلگىلەنەدى. سىزگە 20 جىل تۇرمەدە وتىرۋ نەمەسە ومىرلىك جازاعا كەسىلۋ تۇرىندەگى ايرىقشا اۋىر قىلمىس ايىبى تاعىلاتىن بولعاندىقتان, كەپىلمەن شىعارۋ ماسەلەسى قارالمايدى. ۇيقاماق جايىنا كەلسەك, سوت ءسىزدىڭ جاعدايىڭىزدا ونى قولدانۋ مۇمكىن ەمەس دەپ تاپتى. ەگەر سىزدەر بۇعان كەلىسپەيتىن بولساڭىزدار, ءۇش كۇننىڭ ىشىندە ءوز بەتىڭىزشە نەمەسە ادۆوكاتىڭىز ارقىلى شاعىم بەرە الاسىز», - دەدى سۋديا.
باقتيار تايجان.
دەرەك, فوتو: Otyrar.kz.
