بىرلەسكەن جۇمىستىڭ بەرەرى مول

كەشە استانادا شانحاي ىنتىماقتاستىق ۇيىمىنا (شىۇ) مۇشە مەملەكەتتەردىڭ جوعارى قارجى باقىلاۋ ورگاندارى باسشىلارىنىڭ ءۇشىنشى كەزدەسۋى ءوتتى. ءىس-شاراعا قىتاي حالىق رەسپۋبليكاسى, قىرعىز رەس­پۋبليكاسى, قازاقستان رەسپۋب­ليكاسى, رەسەي فەدەراتسياسى, تاجىكستان رەسپۋبليكاسى, وزبەكستان رەسپۋبليكاسى جوعارى قارجى باقىلاۋ (مەملەكەتتىك اۋديت) ورگاندارىنىڭ ءبىرىنشى باسشىلارى جانە وكىلدەرى قاتىستى. سىرتقى ىستەر ءمينيسترى ەرلان ىدىرىسوۆ قۇتتىقتاۋ ءسوز سويلەدى. كەزدەسۋگە قاتىسۋشىلار ەكونوميكانىڭ تۇراقسىزدىعى مەن جاھاندىق تاۋەكەلدەر جاعدايلارىندا مەملەكەتتىك ءاۋديتتى جۇرگىزۋدىڭ تيىمدىلىگىن ارتتىرۋ پروبلەمالارىن تالقىلادى. مەملەكەتتىك قارجىلىق باقىلاۋ (اۋديت) سالاسىنداعى وزەكتى ماسەلەلەر جانە ىنتىماقتاستىق پەرسپەكتيۆاسى جونىندە پىكىرلەر الماسىلدى. كەزدەسۋگە قاتىسۋشىلار الدىندا سويلەگەن سوزىندە ەسەپ كوميتەتىنىڭ توراعاسى قوزىكورپەش جاڭبىرشين پرەزيدەنت ن.ءا.نازارباەۆتىڭ تاپسىرماسى بويىنشا 2016 جىلدان باستاپ مەملەكەتتىك اۋديتكە كوشۋ جۇمىستارى جۇرگىزىلىپ جاتقانىن, ونىڭ نەگىزگى مىندەتى تەك قارجىلىق بۇزۋشىلىقتاردى انىقتاۋ عانا ەمەس,  سونىمەن قاتار, ولاردىڭ تۋىنداۋ سەبەپتەرىن ايقىنداۋ جانە الدىن الۋ ەكەنىن اتاپ ءوتتى. «قالىپتاسقان ەكونوميكالىق احۋال جانە رەسۋرستاردىڭ شەكتەۋلىگى جاعدايلارىندا مەملەكەتتىك اۋديت ورگاندارى بيۋدجەت قاراجاتىن پايدالانۋ تيىمدىلىگىن ارتتىرۋعا بارىنشا جاردەمدەسۋلەرى ءتيىس. وسىعان بايلانىستى, ءبىزدىڭ ەلدەرىمىزدىڭ مەملەكەتتىك اۋديت جانە قارجىلىق باقىلاۋىنىڭ جوعارى ورگاندارىنىڭ كۇش-جىگەرىن بىرىكتىرۋ شىۇ قىزمەتىنىڭ ماڭىزدى باعىتتارىنىڭ ءبىرى», دەدى ول. ەسەپ كوميتەتى توراعاسىنىڭ ايتۋىنشا, جوعارى قارجى باقىلاۋ (مەملەكەتتىك اۋديت) ورگاندارىنىڭ شىۇ شەڭبەرىندەگى ءوزارا ءىس-قيمىلى اۋديتورلىق ءىس-شارالار جۇرگىزۋ, پراكتيكالىق تاجىريبەمەن جانە بىلىممەن ەركىن جانە اشىق الماسۋ, جاڭا سىن-تەگەۋرىندەرگە دەن قويۋدىڭ بارىنشا ءونىمدى ادىستەرىن ازىرلەۋ جانە مەملەكەتتىك ءاۋديتتىڭ ناتيجەلىلىگىن ارتتىرۋ جولىمەن الەۋەتتى ورىستەتۋگە جانە كاسىبيلىكتىڭ وسۋىنە جاردەمدەسەتىن بولادى. قحر باس اۋديتورى ليۋ تسزياي الدىڭعى كەزەڭدەگى شىۇ-عا مۇشە مەملەكەتتەردىڭ جوعارى قارجى باقىلاۋ ورگاندارىنىڭ ءوزارا ءىس-قيمىلى تۋرالى ەسەپتى بايانداما جاسادى. سونداي-اق, قىرعىزستان ەسەپ پالاتاسىنىڭ توراعاسى ۋلۋكبەك ماريپوۆ, رەسەي ەسەپ پالاتاسىنىڭ اۋديتورى الەكساندر جدانكوۆ, تاجىكستان  ەسەپ پالاتاسىنىڭ توراعاسى ديلمۋرود اشۋربەك جانە وزبەكستان ەسەپ پالاتاسى توراعاسىنىڭ ورىنباسارى كاحرامون اكمالوۆ بايانداما جاسادى. كەزدەسۋدىڭ قورىتىندىسى بويىنشا شىۇ-عا مۇشە مەم­لەكەتتەردىڭ جقبو ىنتىماق­تاستىعى شەڭبەرىندە 2016-2017 جىلدارعا ارنالعان ءىس-شارالار جوسپارى, بىرلەسكەن مالىمدەمە جانە حاتتاما قابىلداندى.   «ەگەمەن-اقپارات»