بۇل – ۋاقىت تالابى

كەشە پرەزيدەنت جانىنداعى ورتالىق كوممۋنيكاتسيالار قىزمەتىندە «جاستار ءۇش تۇعىرلى ءتىل ساياساتىن قولدايدى. قازاقستانداعى جاستار دامۋىنىڭ باستى باعدارلارى» تاقىرىبىندا بريفينگ ءوتتى. بريفينگكە «قازاقستان جاس­تار كونگرەسى» زاڭدى تۇلعالار بىرلەستىگىنىڭ اتقارۋشى ديرەكتورى ايدىن ءسابيتوۆ, «سارىارقا» كاسىپكەرلەر قاۋىمداستىعى باسقارما كەڭەسىنىڭ مۇشەسى ەريك ساعيەۆ, «جاس ۇلان» بىرىككەن بالالار مەن جاسوسپىرىمدەر ۇيىمى توراعاسىنىڭ ورىنباسارى الەكساندر تەن, قازاقستان ستۋدەنتتەرى اليانسىنىڭ جەتەكشىسى مەرجان ابىلقاس جانە استاناداعى دارىندى ەر بالالارعا ارنالعان قازاق-تۇرىك ليتسەيىنىڭ مۇعالىمى اسەت قابديەۆ قاتىستى. بريفينگ بارىسىندا ايدىن ءسابيتوۆ ءۇش تىلدە ءبىلىم بەرۋ جۇيەسىن مەكتەپتەر مەن جوعارى وقۋ ورىندارىنا ەنگىزۋ قاجەتتىگىن 300 مىڭنان استام قازاقستاندىق جاستار قۋاتتاپ وتىرعانىن جەتكىزدى. ونىڭ ايتۋىنشا, بۇل ماسەلەدە «قازاقستان جاستار كونگرەسى» زتب, «جاسىل ەل» جاستار ەڭبەك جاساعىنىڭ رەسپۋبليكالىق شتابى, «بولاشاق» ستيپەندياتتارى قاۋىمداستىعى جانە باسقا دا ۇيىمدار ەرەكشە قولداۋ بىلدىرگەن. جيىندا جاستار ۇيىمدارىنىڭ وكىلدەرى قازىرگى تاڭدا حالىقارالىق اعىلشىن ءتىلىن ءبىلۋدىڭ ماڭىز­دىلىعىن قازاقستاننىڭ ءاربىر جاس ازاماتى تۇسىنەتىنىن, ءۇش ءتىلدى ءبىلۋدىڭ كەلەشەككە جول اشاتىنىن اتاپ ءوتتى. ولاردىڭ سوزىنە قاراعاندا, بولاشاقتا قازاقستاندى جاڭا بۋىن دامىتادى, سوندىقتان مەملەكەتىمىزدىڭ ەرتەڭ الەمنىڭ الدىڭعى قاتارلى ەلدەرىمەن ءبىر دەڭگەيدە بولۋ ءۇشىن جاستار اعىلشىن تىلىنە نەمقۇرايلى قاراي المايدى. جيىندا ەريك ساعيەۆ, مەر­جان ابىلقاس, اسەت قابديەۆ جانە الەكساندر تەن ءوز ويلارىن ورتاعا سالىپ, ءۇش تۇعىرلى ءتىل ساياساتىن جۇرگىزۋ ۋاقىت تالابى ەكەنىن جەتكىزدى. سونداي-اق, ولار مەملەكەتتىك ءتىلىمىزدىڭ مەرەيىن ءوسىرۋ باعىتىنداعى جۇمىستاردى دا كۇن تارتىبىنەن تۇسىرمەۋ كەرەكتىگىنە باسا نازار اۋداردى. ماسەلەن, قازاقشا ەركىن سويلەيتىن الەكساندر تەن مەملەكەتتىك ءتىلدى ۇيرەنۋ مەن دامىتۋدىڭ ماڭىزدىلىعىن ايتا كەلىپ, اعىلشىن ءتىلىن ءبىلۋدىڭ دە ۋاقىت تالابى بولىپ تۇرعانىن كولدەنەڭ تارتتى. ونىڭ ايتۋىنشا, وسكەلەڭ ۇرپاققا الەمدىك عىلىم جەتىستىكتەرىنە قول جەتكىزۋ, حالىقارالىق ۇدەمەلى تاجىريبەلەردى مەڭگەرۋ قاجەت. سوندىقتان, اعىلشىن ءتىلىن ءبىلۋ وتە ماڭىزدى. سونداي-اق, ول ءۇش تۇعىرلى ءتىل ساياساتى بارلىق جاستارعا تەڭ مۇمكىندىكتەر بەرەتىنىنە ەرەكشە اتاپ كورسەتتى. جولدىباي بازار, «ەگەمەن قازاقستان»