ورتاق مۇددە ورايىنداعى قابىلداۋ

قازاقستان پرەزيدەنتى نۇرسۇلتان نازارباەۆ ەۋروپا قايتا قۇرۋ جانە دامۋ بانكىنىڭ پرەزيدەنتى سۋما چاكرابارتيمەن كەز­دەس­تى, دەپ حابارلادى مەملەكەت باسشى­س­ىنىڭ ءباسپاسوز قىزمەتى. كەزدەسۋ بارىسىندا ەقدب-نىڭ قازاقستانداعى قىزمەتىنىڭ نەگىزگى باعىتتارى قاراستىرىلىپ, بۇدان ارعى پەرسپەكتيۆالىق جوسپارلارى ايقىندالدى. قازاقستان پرەزيدەنتى شەت­ەلدىك ينۆەستورلارى كەڭەسى ەقدب-نىڭ قاتىسۋىمەن قۇرىلعانىنا نازار اۋداردى. مەملەكەت باسشىسى بيىل بانكتىڭ قۇرىلعانىنا جانە ءبىزدىڭ ەلدىڭ تاۋەلسىزدىك العانىنا 25 جىل تولۋىنىڭ سيمۆولدىق ءمانى بار ەكەنىن اتاپ ءوتتى. – وسى جىلداردىڭ بارىندە ەقدب رەسپۋبليكامىزدىڭ سەنىم­دى سەرىكتەسى بولىپ كەلەدى. ءبىز­دىڭ ىنتىماقتاستىعىمىزعا 20 جىلدان اسىپ بارادى, مۇن­داي ءوزار­ا ءىس-قيمىلدى وتە جوعا­رى باعالايمىز. 2014 جىلى ىنتى­ماق­تاستىعىمىزدىڭ جاڭا ستراتەگيا­سى قابىلداندى, ول اسا اۋقىم­دى جۇ­مىستى قامتيدى, – دەدى مەم­لەكەت باسشىسى. س.چاكرابارتي ەقدب-نىڭ شەتەل ينۆەستورلارى كەڭە­سىن جاڭادان شەتەلدىك ينۆەس­تورلاردى تارتۋ­دىڭ جانە ءبىزدىڭ ەلدەگى رەفور­مالاردى ىلگەرى­لەتۋدىڭ ءتيىمدى تەتىگى رەتىندە قاراس­تىراتىنىن ايتتى. – كەڭەس مۇشەلەرى ءسىزدىڭ كوش­باس­شى­لىعىڭىزدى جوعارى باعا­لاي­دى. جالپى, ءبىزدىڭ سەرىك­تەس بول­عانىمىزعا 20 جىلدان اسىپ بارا جاتقانىمەن, ونىڭ شارىق­تاۋ كەزەڭى سوڭعى جىلدارمەن تۇس­پا-تۇس كەلىپ وتىر. سونداي-اق, سىزگە جانە ءسىزدىڭ ەلدىڭ ۇكى­مەتى­نە بيىل ەقدب پرەزيدەنتى قىزمەتىنە قايتادان ۇسىنىلعان مەنىڭ كانديداتۋرامدى قولدا­عان­دارىڭىز ءۇشىن العىس ايتامىن. بۇل ىن­تىماقتاستىعىمىزدى جالعاس­تىرۋ ءۇشىن تاعى 4 جىلعا مۇمكىندىك بەرەدى, – دەدى ەۋروپا قايتا قۇرۋ جانە دامۋ بانكىنىڭ پرەزيدەنتى. س.چاكرابارتي ءبىزدىڭ ەلدىڭ اگروونەركاسىپ كەشەنىن دامىتۋ سالاسىندا قول جەتكىزىلگەن ءوزارا ءىس-قيمىلدىڭ دەڭگەيى جوعارى ەكەنىن اتاپ ءوتتى. سونداي-اق, ول ەقدب قىزمەتى ءۇشىن «استانا» حالىقارالىق قارجى ورتالى­­عىنىڭ قۇرىلۋىنىڭ ماڭىز­دىلىعىن ايتتى جانە ەلىمىزدەگى جەكەشەلەندىرۋ ۇدەرىسىنە دە قىزىعۋشىلىق ءبىلدىردى.